ಕ್ಯೂ ಆರ್​ ಕೋಡ್​  
ತುಮಕೂರು

ಡ್ರಗ್ಸ್​ ದಂಧೆಯಲ್ಲಿ ಪೊಲೀಸ್​ ಪೇದೆ ಮಗ

ಪ್ರಮುಖ ಮುಖ್ಯಾಂಶಗಳು

  • 6 ಮಂದಿ ಗ್ಯಾಂಗ್ ಬಂಧನ
  • ಹೈಡ್ರೋವಿಡ್​ ಗಾಂಜಾ ಸೊಪ್ಪು
  • ಡ್ರಗ್ಸ್​ ತಡೆಯಲು ಕ್ಯೂ ಆರ್​ ಕೋಡ್​
ತುಮಕೂರು: ನಗರದಲ್ಲಿ ಗಾಂಜಾ ಹಾಗೂ ಹೈಡ್ರೋವಿಡ್​ ಗಾಂಜಾ ಅಕ್ರಮ ಮಾರಾಟ ಮಾಡುತ್ತಿದ್ದ ಗ್ಯಾಂಗ್​ ಅನ್ನು ತಿಲಕ್​ ಪಾರ್ಕ್​ ಪೊಲೀಸರು ಬಂಧಿಸಿದ್ದಾರೆ.
ನಗರದ ಶೇಷಾದ್ರಿಪುರಂ ಕಾಲೇಜು ಬಳಿ ಗಾಂಜಾ ಸೊಪ್ಪು ಹಾಗೂ ಮತ್ತು ಬರಿಸುವ ವಸ್ತು ಮಾರಾಟ ಮಾಡುತ್ತಿದ್ದ 6 ಮಂದಿ ಗ್ಯಾಂಗ್​ ಅನ್ನು ಜು.11 ರಂದು ಮಾಲು ಸಮೇತ ಬಂಧಿಸಲಾಗಿದೆ. ಸತೀಶ್​ (31), ಪ್ರಮೋದ್​ ಕುಮಾರ್​ (28), ದಿಶಾಂತ್​ (21), ದರ್ಶನ್​ (28), ಅಮೋ ನಾಗಭೂಷಣ್​ (31) ಹಾಗೂ ಬೆಂಗಳೂರಿನ ಮಾರತ್​ಹಳ್ಳಿಯ ಮಂಜುನಾಥ್​ (35) ಬಂಧಿತರು. ಈ ಗ್ಯಾಂಗ್​ನಲ್ಲಿ ಡಿಎಆರ್​ ಪೇದೆ ಮಗ ದಿಶಾಂತ್​ ಇದ್ದು ಬೆಂಗಳೂರಿನ ಡ್ರಗ್​ ಪೆಡ್ಲರ್​ ಮಂಜುನಾಥ್​ ಗಾಂಜಾ, ಹೈಡ್ರೋವಿಡ್​ ಗಾಂಜಾವನ್ನು ಈ ತಂಡಕ್ಕೆ ಪೂರೈಸುತ್ತಿದ್ದದು ತನಿಖೆ ವೇಳೆ ಬಯಲಾಗಿದೆ.
2 ಲಕ್ಷ ರೂ., ಬೆಲೆಬಾಳುವ 1 ಕೆಜಿ 655 ಗ್ರಾಂ ಗಾಂಜಾ ಸೊಪ್ಪು, 2.30 ಲಕ್ಷ ರೂ., ಮೊತ್ತದ 23 ಗ್ರಾಂನಷ್ಟು ಹೈಡ್ರೋವಿಡ್​ ಗಾಂಜಾ ಸೊಪ್ಪು ಹಾಗೂ ಮಾರಾಟಕ್ಕೆ ಬಳಸುತ್ತಿದ್ದ 40 ಲಕ್ಷ ರೂ., ಮೌಲ್ಯದ ಫಾರ್ಚೂನರ್​ ಕಾರನ್ನು ಆರೋಪಿಗಳಿಂದ ವಶಪಡಿಸಿಕೊಂಡಿದ್ದಾರೆ.
ಡ್ರಗ್ಸ್​ ತಡೆಯಲು ಕ್ಯೂ ಆರ್​ ಕೋಡ್​ ಸ್ಕ್ಯಾನ್​ ಮಾಡಿ
ಡ್ರಗ್ಸ್​ ದಂಧೆ ತುಮಕೂರಿನಲ್ಲಿ ದಿನೇ ದಿನೇ ಹೆಚ್ಚುತ್ತಿದ್ದು ಇದಕ್ಕೆ ಕಡಿವಾಣ ಹಾಕಲು ಪೊಲೀಸರು ಅಕ್ರಮವಾಗಿ ಮಾದಕ ವಸ್ತುಗಳ ಮಾರಾಟ ಹಾಗೂ ಸಾಗಾಣಿಕೆ ತಡೆಗೆ ಕ್ಯೂ ಆರ್​ ಕೋಡ್​ ಮಾದರಿ ರೂಪಿಸಿದ್ದಾರೆ. ಡ್ರಗ್ಸ್​ ದಂಧೆ ಬಗ್ಗೆ ಯಾವುದೇ ಮಾಹಿತಿ ಇದ್ದರೂ ಕ್ಯೂ ಆರ್​ ಕೋಡ್​ ಸ್ಕ್ಯಾನ್​ ಮಾಡಿ ಮಾಹತಿ ಹಂಚಿಕೊಳ್ಳಬಹುದು. ಮಾಹಿತಿದಾರರ ಹೆಸರು, ಇನ್ನಿತರ ವಿವಿರವನ್ನು ಗೌಪ್ಯವಾಗಿ ಇಡಲಾಗುವುದು ಎಂದು ಎಸ್ಪಿ ಕೆ.ವಿ.ಅಶೋಕ್​ ತಿಳಿಸಿದರು.