ತುಮಕೂರಿನ ಎನ್​ ಆರ್​ ಕಾಲನಿಯ ನಿವಾಸಿಗಳು ಸ್ಮಶಾನ ಭೂಮಿ ಅಕ್ರಮ ಪರಭಾರೆ ಖಂಡಿಸಿ ಜಿಲ್ಲಾಧಿಕಾರಿ ಕಚೇರಿವರೆಗೆ ಪಾದಯಾತ್ರೆ ನಡೆಸಿ ಡಿಸಿ ಶುಭಕಲ್ಯಾಣ್​ಗೆ ಮನವಿ ಸಲ್ಲಿಸಿದರು. ಕೆ.ದೊರೈರಾಜ್​, ಎ. ನರಸಿಂಹಮೂರ್ತಿ, ವಾಲೆ ಚಂದ್ರಯ್ಯ, ರೂಪಶ್ರೀ, ಹನುಮಂತರಾಯಪ್ಪ, ನರಸೀಯಪ್ಪ, ಶ್ರೀನಿವಾಸ್​, ನಾರಾಯಣಮೂರ್ತಿ, ಜಯಮೂರ್ತಿ, ಕಿರಣ್​, ನರಸಿಂಹಯ್ಯ, ನರಸಿಂಹರಾಜು, ಜಿ. ವೆಂಕಟೇಶ್​, ಬಿ.ಪಿ. ಅಂಜನಮೂರ್ತಿ, ಶೆಟ್ಟಳ್ಳಯ್ಯ, ಕೇಬಲ್​ ರಘು, ಕಿಶೋರ್​, ಎನ್​. ರಾಜಣ್ಣ, ಅನ್ನಪೂರ್ಣಮ್ಮ, ನಾಗಮ್ಮ, ಇಂದಿರಮ್ಮ ಮತ್ತಿತರರು ಇದ್ದರು.  
ತುಮಕೂರು

ಸ್ಮಶಾನ ಭೂಮಿ ಅಕ್ರಮ ಪರಭಾರೆ

ಪ್ರಮುಖ ಮುಖ್ಯಾಂಶಗಳು

  • ತುಮಕೂರಿನ ಎನ್​ ಆರ್​ ಕಾಲನಿ ನಿವಾಸಿಗಳ ಪ್ರತಿಭಟನೆ
  • ಸುಳ್ಳು ದಾಖಲೆ ಸೃಷ್ಟಿಸಿ ಲೇಔಟ್​ ನಿರ್ಮಾಣ
  • ಡಿಸಿ ಕಚೇರಿ ವರೆಗೆ ಪಾದಯಾತ್ರೆ
ತುಮಕೂರು:

ಎನ್​.ಆರ್​. ಕಾಲನಿಯ ಮಾದಿಗ ಜನಾಂಗದ ಹರಿಜನ ಸ್ಮಶಾನ ಭೂಮಿ ಅಕ್ರಮ ಪರಭಾರೆ ಖಂಡಿಸಿ ಎನ್​ಆರ್​ ಕಾಲನಿ, ನಿರ್ವಾಣಿ ಲೇಔಟ್​, ಅಂಬೇಡ್ಕರ್​ ನಗರ ನಿವಾಸಿಗಳು ಜಿಲ್ಲಾಧಿಕಾರಿ ಕಚೇರಿ ಬಳಿ ಮಂಗಳವಾರ ಬೃಹತ್​ ಪ್ರತಿಭಟನೆ ನಡೆಸಿದರು.

ಎನ್​ಆರ್​ ಕಾಲನಿಯಿಂದ ಜಿಲ್ಲಾಧಿಕಾರಿ ಕಚೇರಿವರೆಗೆ ಪಾದಯಾತ್ರೆ ಮೂಲಕ ತೆರಳಿದ ಸ್ಥಳಿಯ ನಿವಾಸಿಗಳು ಸ್ಮಶಾನ ಭೂಮಿ ಅಕ್ರಮ ಪರಭಾರೆ ಮಾಡಿರುವರ ವಿರುದ್ಧ ಘೋಷಣೆಗಳನ್ನು ಕೂಗಿದ್ದಲ್ಲದೆ, ಸ್ಮಶಾನಭೂಮಿ ಉಳಿಸುವಂತೆ ಒತ್ತಾಯಿಸಿದರು. ಪಾಲಿಕೆ ವ್ಯಾಪ್ತಿಯ 19 ಹಾಗೂ 20ನೇ ವಾರ್ಡ್​ನ ಎನ್​ಆರ್​ ಕಾಲನಿ ದೊಡ್ಡಟ್ಟಿ, ಪಿಕೆಎಸ್​ ಕಾಲನಿ (ನಿರ್ವಾಣಿ ಲೇಔಟ್​) ಮತ್ತು ಅಂಬೇಡ್ಕರ್​ ನಗರಕ್ಕೆ ಹೊಂದಿಕೊಂಡಿರುವ ಸರ್ವೇ ನಂ. 299/1 ರ ಹರಿಜನ ಸ್ಮಶಾನದ ಭೂಮಿಯನ್ನು ಅಕ್ರಮ ಪರಭಾರೆ ಮಾಡಲಾಗಿದ್ದು ಈ ಜಾಗದಲ್ಲಿದ್ದ ಪೂರ್ವಜರ ಸಮಾಧಿಗಳನ್ನು ನೆಲಸಮಗೊಳಿಸಿ ಚಿದಾನಂದ್​ ಹಾಗೋ ಕೋಮಾರಯ್ಯ ಮಕ್ಕಳು ಲೇಔಟ್​ ನಿರ್ಮಿಸಿರುವುದನ್ನು ಖಂಡಿಸಿದ್ದಲ್ಲದೆ, ಅವರನ್ನು ಬಂಧಿಸುವಂತೆ ಆಗ್ರಹಿಸಿದರು.
ಎನ್​ಆರ್​ ಕಾಲನಿ, ನಿರ್ವಾಣಿ ಲೇಔಟ್​, ಅಂಬೇಡ್ಕರ್​ ನಗರದಲ್ಲಿ ಮಾದಿಗ ಜನಾಂಗಕ್ಕೆ ಸೇರಿದ 2 ಸಾವಿರಕ್ಕು ಹೆಚ್ಚು ಕುಟುಂಬಗಳು ವಾಸಿಸುತ್ತಿವೆ. ಅಲ್ಲದೆ, ಬಟವಾಡಿ, ದೇವರಾಯಪಟ್ಟಣ ಹಾಗೂ ಕುರಿಪಾಳ್ಯದ ಸೋದರ ಸಂಬಂಧಿಗಳು ಯಾರಾದರು ಸತ್ತರೆ ಹೂಳಲು ಇದ್ದ ಹರಿಜನ ಸ್ಮಶಾನವನ್ನೇ ಕಬಳಿಸಲಾಗಿದೆ. ಸುಳ್ಳು ದಾಖಲೆಗಳನ್ನು ಸೃಷ್ಟಿಸಿ ಲೇಔಟ್​ ನಿರ್ಮಿಸಿದ್ದು ಇದನ್ನು ವಜಾಗೊಳಿಸಿ ನ್ಯಾಯ ದೊರಕಿಸಿಕೊಡುವಂತೆ ಪ್ರತಿಭಟನಾನಿರತರು ಜಿಲ್ಲಾಧಿಕಾರಿ ಶುಭಕಲ್ಯಾಣ್​ಗೆ ಮನವಿಪತ್ರ ನೀಡಿದರು.
ಚಿಂತಕ ಕೆ. ದೊರೈರಾಜ್​, ಕೊಳಗೇರಿ ಹಿತರಕ್ಷಣಾ ಸಮಿತಿಯ ಎ. ನರಸಿಂಹಮೂರ್ತಿ, ನಗರಸಭೆ ಮಾಜಿ ಉಪಾಧ್ಯಕ್ಷ ವಾಲೆ ಚಂದ್ರಯ್ಯ, ಮಾಜಿ ಉಪ ಮೇಯರ್​ ರೂಪಶ್ರೀ, ಮಾಜಿ ಕಾಪೋರ್ರೇಟರ್​ಗಳಾದ ಹನುಮಂತರಾಯಪ್ಪ, ನರಸೀಯಪ್ಪ, ಶ್ರೀನಿವಾಸ್​, ಜಿಪಂ ಮಾಜಿ ಸದಸ್ಯ ನಾರಾಯಣಮೂರ್ತಿ, ಮುಖಂಡರಾದ ಜಯಮೂರ್ತಿ, ಕಿರಣ್​, ಡಿಎಸ್​ಎಸ್​ ನರಸಿಂಹಯ್ಯ, ನರಸಿಂಹರಾಜು, ಜಿ. ವೆಂಕಟೇಶ್​, ಬಿ.ಪಿ.ಅಂಜನಮೂರ್ತಿ, ಶೆಟ್ಟಳ್ಳಯ್ಯ, ಕೇಬಲ್​ ರಘು, ಚಂದ್ರಯ್ಯ, ಕಿಶೋರ್​, ಮೋಹನ್​ಕುಮಾರ್​, ಗಂಗಾಧರ್​, ಎನ್​. ರಾಜಣ್ಣ, ಅನ್ನಪೂರ್ಣಮ್ಮ, ನಾಗಮ್ಮ, ಇಂದಿರಮ್ಮ ಮತ್ತಿತರರು ಪ್ರತಿಭಟನೆ ನೇತೃತ್ವವಹಿಸಿದ್ದರು.
ವಿವಾದಿತ ಸ್ಥಳಕ್ಕೆ ಎಸಿ ಭೇಟಿ
ಎನ್​ ಆರ್​ ಕಾಲನಿಯ ಸ್ಮಶಾನ ಭೂಮಿಯನ್ನು ಸುಳ್ಳು ದಾಖಲೆ ಸೃಷ್ಟಿಸಿ ಪರಭಾರೆ ಮಾಡಿರುವ ಹಿನ್ನೆಲೆ ಪ್ರತಿಭಟನೆಗೆ ಸ್ಥಳಿಯರು ಮುಂದಾಗುತ್ತಿದ್ದಂತೆ ವಿವಾದಿತ ಸ್ಥಳಕ್ಕೆ ಭೇಟಿ ನೀಡಿದ ತುಮಕೂರು ಉಪವಿಭಾಗಾಧಿಕಾರಿ ನಾಹಿದಾ ಜಮ್​ ಜಮ್​ ಸ್ಥಳಿಯ ನಿವಾಸಿಗಳ ಅಹವಾಲು ಕೇಳಿದರು. ಮೂಲ ದಾಖಲೆಗಳನ್ನು ಸಹ ಪರಿಶೀಲಿಸಿದರು. ಈ ಸಂದರ್ಭದಲ್ಲಿ ಅಸ್ಥಿಪಂಜರಗಳನ್ನು ಅಕ್ರಮವಾಗಿ ಹೊರಗೆ ಸಾಗಿಸಿರುವುದು, ಬೃಹತ್​ ಮರಗಳನ್ನು ಕಡಿಯಲಾಗಿರುವ ಬಗ್ಗೆ ಪೊಲೀಸ್​ ಠಾಣೆಗೆ ದೂರು ಕೊಟ್ಟಿರುವುದಾಗಿ ಸ್ಥಳಿಯರು ಗಮನಸೆಳೆದರು. ನಂತರ ಅಲ್ಲಿಂದ ಪಾದಯಾತ್ರೆ ಮೂಲಕ ಜಿಲ್ಲಾಧಿಕಾರಿ ಕಚೇರಿವರೆಗೆ ತೆರಳಿ ಸ್ಮಶಾನ ಭೂಮಿ ಉಳಿಸುವಂತೆ ಮನವಿ ಮಾಡಿದರು.