ರಾಷ್ಟ್ರಪತಿ ದ್ರೌಪದಿ ಮುರ್ಮು
- ಶಿವಕುಮಾರ ಶ್ರೀಗಳ ಗುರುವಂದನಾ ಮಹೋತ್ಸವ
- ಮಠದ ಮಕ್ಕಳತ್ತ ಕೈಬೀಸಿದ ರಾಷ್ಟ್ರದ ಪ್ರಥಮಪ್ರಜೆ
- ಶ್ರೀಗಳ ಮೂರ್ತಿ ಮುಂದೆ ಧ್ಯಾನಸ್ತ ರಾಷ್ಟ್ರಪತಿ
ತುಮಕೂರು: ರಾಷ್ಟ್ರದ ಪ್ರಥಮಪ್ರಜೆ ರಾಷ್ಟ್ರಪತಿ ದ್ರೌಪದಿ ಮುರ್ಮು ಆಗಮನವು ಶ್ರೀಗಳ ಗುರುವಂದನ ಮಹೋತ್ಸವವನ್ನು ಕಳೆಗಟ್ಟಿಸಿತು. ಶಿವಕುಮಾರ ಶ್ರೀಗಳ ಗದ್ದುಗೆಯಲ್ಲಿ ವಿಶೇಷ ಪೂಜೆ ಸಲ್ಲಿಸಿ ಬಳಿಕ ಪ್ರಾರ್ಥನಾ ಸಭಾಂಗಣದಲ್ಲಿ ಶ್ರೀಗಳ ಮೂರ್ತಿಯ ಮುಂದೆ ಕುಳಿತು ಧ್ಯಾನಸ್ತರಾದ ರಾಷ್ಟ್ರಪತಿಗಳು ಆ ಬಳಿಕ ಮಠದ ಆವರಣದಲ್ಲಿ ಪೂಜ್ಯರ, ಮುರ್ಮು ಭಾವಚಿತ್ರಗಳನ್ನು ಹಿಡಿದು ಕಾಯುತ್ತಿದ್ದ ಸಹಸ್ರಾರು ಮಕ್ಕಳನ್ನು ಕಂಡು ಬೆರಗಾದರು. ಅವರತ್ತ ಕೈಬೀಸಿ ಮುಮುರ್ ವಿಶೇಷ ಪ್ರೀತಿ ತೋರಿದರು.
ಈ ವೇಳೆ ಮಠಾಧ್ಯಕ್ಷ ಸಿದ್ದಲಿಂಗ ಶ್ರೀಗಳು, ಉತ್ತರಾಧಿಕಾರಿ ಶಿವಸಿದ್ದೇಶ್ವರ ಸ್ವಾಮೀಜಿ, ಥಾವರ್ ಚಂದ್ ಗೆಹಲೋತ್, ಕೇಂದ್ರ ಸಚಿವರಾ ಪ್ರಲ್ಹಾದಜೋಶಿ, ವಿ.ಸೋಮಣ್ಣ, ರಾಜ್ಯದ ಗೃಹಸಚಿವ ಡಾ.ಜಿ.ಪರಮೇಶ್ವರ, ಕೈಗಾರಿಕಾ ಸಚಿವ ಎಂ.ಬಿ.ಪಾಟೀಲ್, ಶಾಸಕರಾದ ಬಿ.ಸುರೇಶಗೌಡ, ಜಿ.ಬಿ.ಜ್ಯೋತಿಗಣೇಶ್ ಉಪಸ್ಥಿತರಿದ್ದರು.
ನಂತರ ಸಿದ್ದಗಂಗಾ ಮಠದ ಗೋಸಲ ಸಿದ್ದೇಶ್ವರ ವೇದಿಕೆಯಲ್ಲಿ ನಡೆದ ಡಾ.ಶಿವಕುಮಾರ ಮಹಾಶಿವಯೋಗಿಗಳ 119ನೇ ಜಯಂತಿ ಹಾಗೂ ಗುರುವಂದನಾ ಮಹೋತ್ಸವ ಸಮಾರಂಭ ರಾಷ್ಟ್ರಪತಿ ಮುರ್ಮು ಉದ್ಘಾಟಿಸಿದರು.
ಅನ್ನಗಂಗೆ, ಕರುಣಾಶ್ರಯಗಂಗೆ ಹಾಗೂ ಶಿಕ್ಷಣಗಂಗೆ ಈ ಮೂರು ಪವಿತ್ರ ಧಾರೆಗಳು ಸಿದ್ದಗಂಗೆಯಲ್ಲಿ ನಿರಂತರವಾಗಿ ಹರಿಯುತ್ತಲೇ ಇವೆ. ಶಿವಕುಮಾರ ಸ್ವಾಮೀಜಿ ಆಧ್ಯಾತ್ಮಿಕ ಸೇವೆ, ಮಾನವೀಯ ಕಾರ್ಯಗಳಿಂದ ಸಮಾಜವನ್ನು ಶ್ರೀಮಂತಗೊಳಿಸಿದ ಸಂತರು. ಬಡವರ, ವಂಚಿತರ ಸೇವೆಯಲ್ಲಿ ಅವರ ಇಡೀ ಜೀವನ ಮುಡಿಪಿಟ್ಟಿದ್ದರು.