ಎಂಜಿನ್​ನಲ್ಲಿ ತಾಂತ್ರಿಕ ದೋಷ ಕೆಟ್ಟು ನಿಂತ ರೈಲು

ತುಮಕೂರು: ಹಾಸನ-ಸೋಲಾಪುರ ಎಕ್ಸೆಪ್ರೆಸ್​ ರೈಲಿನ ಎಂಜಿನ್​ ಕುಣಿಗಲ್​ ತಾಲೂಕು ಎಡೆಯೂರು ರೈಲ್ವೆ ನಿಲ್ದಾಣ ಬಳಿ ಭಾನುವಾರ ಸಂಜೆ ಕೆಟ್ಟು ನಿಂತ ಪರಿಣಾಮ ಗಂಟೆಗಟ್ಟೆಲೆ ಪ್ರಯಾಣಿಕರು ಪರದಾಡುವಂತಾಯಿತು. ಆದರೆ, ಈ ರೈಲಿಗೆ ಬಳಸಲಾದ ಎಂಜಿನ್​ ಪ್ರಯಾಣಿಕ ರೈಲುಗಳ ಕಾರ್ಯಾಚರಣೆಗೆ ಯೋಗ್ಯವಾಗಿತ್ತು ಎಂದು ರೈಲ್ವೆ ಮಂಡಳಿ ಸ್ಪಷ್ಟಪಡಿಸಿದೆ.

ಆಗಸ್ಟ್​ 16 ರಂದು ರೈಲು ಸಂಖ್ಯೆ 11312ಗೆ ಅಳವಡಿಸಿದ್ದ ಲೋಕೋಮೋಟಿವ್​ (ಎಂಜಿನ್​) ಸಂಖ್ಯೆ 40438 ಎಡೆಯೂರು ಬಳಿ ತಾಂತ್ರಿಕ ದೋಷದಿಂದ ಕೆಟ್ಟು ನಿಂತಿತ್ತು. ಇದರ ಪರಿಣಾಮ 3-4 ಗಂಟೆ ಪ್ರಯಾಣಿಕರು ಪರದಾಡುವಂತಾಗಿತ್ತು. ಈ ವೇಳೆ ರೈಲ್ವೆ ಎಂಜಿನ್​ "ನಾಟ್​ ಫಿಟ್​ ಾರ್​ ಪ್ಯಾಸೆಂಜರ್​/ಗೂಡ್ಸ್​' ಎಂದು ಬರೆಯಲಾಗಿತ್ತು. ಇದರಿಂದ ಪ್ರಯಾಣಿಕರು ರೊಚ್ಚಿಗೆದ್ದು ಪ್ರತಿಭಟನೆ ಮುಂದಾಗಿದ್ದರು. ಅಷ್ಟರಲ್ಲಿ ಮತ್ತೊಂದು ಎಂಜಿನ್​ ತರಿಸಿ ರೈಲಿಗೆ ಅಳವಡಿಸಿ ಪ್ರಯಾಣ ಮುಂದುವರೆಸಲಾಗಿತ್ತು.

ಎಂಜಿನ್​ ಯೋಗ್ಯವಾಗಿದೆ!: ಪ್ರಯಾಣಿಕ ರೈಲುಗಳ ಕಾರ್ಯಾಚರಣೆಗೆ ಎಂಜಿನ್​ ಯೋಗ್ಯವಾಗಿದ್ದು ಈ ಲೋಕೋಮೋಟಿವ್​ ಅನ್ನು ಈ ಹಿಂದೆ ಶೆಂಟಿಂಗ್​ ಕಾರ್ಯಾಚರಣೆಗಳಿಗೆ ಬಳಸಲಾಗುತ್ತಿತ್ತು. ನಂತರ, ಕೃಷ್ಣರಾಜಪುರಂ ಲೋಕೋ ಶೆಡ್​ನಲ್ಲಿ ಈ ಲೋಕೋಮೋಟಿವ್​ ಗೆ ಬಳಸಲಾಗಿತ್ತು. ಮೇಜರ್​ ಶೆಡ್ಯೂಲ್​ ಓವರ್​ ಹಾಲಿಂಗ್​ (ವೈ 6)ನಡೆಸಿ ಪ್ರಯಾಣಿಕ/ಸರಕು ರೈಲುಗಳ ಕಾರ್ಯಾಚರಣೆಯು ಸೇರಿದಂತೆ ಮುಖ್ಯಮಾರ್ಗದ ಕಾರ್ಯಾಚರಣೆಗೆ ಅಗತ್ಯವಿರುವಂತೆ ಸಿದ್ಧಗೊಳಿಸಿ ಪರಿಶೀಲನೆ ನಡೆಸಿ ಪ್ರಯಾಣಿಕ/ಸರಕು ರೈಲುಗಳ ಕಾರ್ಯಾಚರಣೆಗೆ ಫಿಟ್​ ಎಂದು ಪ್ರಮಾಣೀಕರಿಸಿದ ಬಳಿಕ ಪ್ರಯಾಣಿಕ ರೈಲುಗಳ ನಿರ್ವಹಣೆಗೆ ಬಳಸಲಾಗಿದೆ.

ಎಂಜಿನ್​ನ ಮೇಲಿದ್ದ ಹಳೇ ಪೇಂಟ್​/ ಲೇಬಲ್​ ಅನ್ನು ಕೂಡಲೇ ತೆರವುಗೊಳಿಸುವಂತೆ ಸೂಚನೆಗಳನ್ನು ನೀಡಲಾಗಿದೆ. ಹಾಸನ&ಸೋಲಾಪುರ ಎಕ್ಸೆಪ್ರೆಸ್​ ರೈಲು ಸಂಚಾರದ ವೇಳೆ, ಈ ಎಂಜಿನ್​ನಲ್ಲಿ ಉಂಟಾದ ತಾಂತ್ರಿಕ ದೋಷದ ಕಾರಣದಿಂದ ಎಡೆಯೂರು ನಿಲ್ದಾಣದಲ್ಲಿ ವಿಳಂಬಗೊಂಡಿತೇ ಹೊರತು ಎಂಜಿನ್​ ಯೋಗ್ಯವಲ್ಲದ ಕಾರಣ ನಿಂತಿದ್ದಲ್ಲ. ನಂತರ ಪರ್ಯಾಯ ವ್ಯವಸ್ಥೆ ಮಾಡಿ ರೈಲು ಪ್ರಯಾಣ ಮುಂದುವರೆಸಲಾಯಿತು ಎಂದು ಮಂಡಳಿ ಪ್ರಕಟಣೆಯಲ್ಲಿ ತಿಳಿಸಿದೆ.