ಶಾಲೆ ಕಾಂಪೌಂಡ್​ಗಾಗಿ ಆರು ತಿಂಗಳಿಂದ ಬಾಲಕಿ ಪ್ರತಿಭಟನೆ

ಜಿಲ್ಲಾ ಉಸ್ತುವಾರಿ ಸಚಿವ ಡಾ.ಜಿ.ಪರಮೇಶ್ವರ ಪ್ರತಿನಿಧಿಸುವ ಕೊರಟಗೆರೆ ವಿಧಾನಸಭಾ ಕ್ಷೇತ್ರ ವ್ಯಾಪ್ತಿಯ ಕೋರಾ ತಾಲೂಕು ಬೆಳಧರ ಸರ್ಕಾರಿ ಪ್ರಾಥಮಿಕ ಶಾಲೆಯ ಬಾಲಕಿ ಸೀಮ್ರಾಸನೋಬರ್​ ಶಾಲೆಗೆ ಕಾಂಪೌಂಡ್​ ನಿರ್ಮಿಸುವಂತೆ ಹೋರಾಟ ನಡೆಸುತ್ತಿದ್ದು, ಅಧಿಕಾರಿಗಳ ತಾತ್ಸಾರಕ್ಕೆ ಬೇಸತ್ತು ಶಾಲೆಯಿಂದ ಹೊರಗುಳಿದು ಸರ್ಕಾರದ ಗಮನ ಸೆಳೆದಿದ್ದರು.

ಕಳೆದ ಆರು ತಿಂಗಳಿನಿಂದ ಬಾಲಕಿ ಶಾಲೆಗೆ ತೆರಳದೇ ಪ್ರತಿಭಟನೆ ನಡೆಸುತ್ತಿದ್ದರೂ ಕಿವಿಗೊಡದ ಅಧಿಕಾರಿಗಳನ್ನು ಜತೆಯಲ್ಲಿ ಕರೆದುಕೊಂಡ ಬಂದ ಜಿಲ್ಲಾ ಕಾನೂನು ಸೇವಾ ಪ್ರಾಧಿಕಾರದ ಸದಸ್ಯ ಕಾರ್ಯದರ್ಶಿ ನ್ಯಾ.ನೂರುನ್ನೀಸಾ ಹಾಗೂ ತುಮಕೂರು ವಿಭಾಗಾಧಿಕಾರಿ ಸಹಿದಾ ಜಮ್​ಜಮ್​ ಸೋಮವಾರ ಬಾಲಕಿಯ ಮನವೊಲಿಸಿ ಶಾಲೆಗೆ ಕರೆತಂದರು.

ನ್ಯಾ.ನೂರುನ್ನೀಸಾ ಮಾತನಾಡಿ, ಶಾಲೆಗೆ ಮತ್ತು ಮಕ್ಕಳಿಗೆ ತೊಂದರೆ ಆಗಬಾರದು ಎನ್ನುವ ಹಿತದೃಷ್ಟಿಯಿಂದ ಶಾಲೆಯಲ್ಲಿ ಸಮಸ್ಯೆ ಹಾಗೂ ಬಾಲಕಿ ನೀಡಿದ ಮನವಿಗೆ ಸ್ಪಂದಿಸಿ ಕರ್ನಾಟಕ ಕಾನೂನು ಸೇವಾ ಪ್ರಾಧಿಕಾರದ ಗಮನಕ್ಕೆ ತಂದಿದ್ದೇವೆ. ಅದರ ನಿಮಿತ್ತ ಜಿಪಂಗೆ ಸ್ಪಷ್ಟ ಆದೇಶ ಬಂದಿರುತ್ತದೆ. ಶೀಘ್ರದಲ್ಲಿಯೇ ಈ ಶಾಲೆಗೆ ಕಾಂಪೌಂಡ್​ ನಿರ್ಮಾಣವಾಗಲಿದೆ ಎಂದರು.

ಉಪವಿಭಾಗಾಧಿಕಾರಿ ನಾಹೀದಾ ಜಮ್​ಜಮ್​ ಮಾತನಾಡಿ, ಮಕ್ಕಳು ಓದುವುದರ ಕಡೆ ಆಸಕ್ತಿ ತೋರಿಸಬೇಕು, ಸಮಾಜದಲ್ಲಿ ಉನ್ನತ ಸ್ಥಾನಕ್ಕೇರಲು ವಿದ್ಯಾಭ್ಯಾಸ ಬಹಳ ಮುಖ್ಯವಾಗಿರುತ್ತದೆ. ಪಾಲಕರು ಯಾವುದೇ ಸಮಸ್ಯೆ ಇದ್ದರೂ ನಮ್ಮ ಗಮನಕ್ಕೆ ತಂದರೆ ಬಗೆಹರಿಸುವ ಕೆಲಸ ಮಾಡುತ್ತೇವೆ ಎಂದು ಭರವಸೆ ನೀಡಿದರು.

ತಹಸೀಲ್ದಾರ್​ ರಾಜೇಶ್ವರಿ, ಎಸ್​ಡಿಎಂಸಿ ಅಧ್ಯಕ್ಷ ರಫೀಕ್​, ರಾಜಸ್ವ ನಿರೀಕ್ಷಕ ಅರುಣ್​ ಕುಮಾರ್​, ಗ್ರಾಮ ಲೆಕ್ಕಾಧಿಕಾರಿ ಅನಿಲ್​, ಕಾಳಜಿ ಪೌಂಡೇಷನ್​ನ ಶಿವಕುಮಾರ್​, ಎಂ.ಎಸ್​.ಗಣೇಶ್​, ಪದ್ಮನಾಭ್​, ರಫಿಪಾಷಾ, ಭೀಮ್​ ಆರ್ಮಿ ಜಿಲಾಧ್ಯಕ್ಷ ಶ್ರೀನಿವಾಸ್​, ಮಹಾಲಿಂಗಯ್ಯ, ಡಮರುಗ ಸಂಪನ್ಮೂಲ ಕೇಂದ್ರ ನಿರ್ದೇಶಕ ಡಮರುಗ ಉಮೇಶ್​ ಮತ್ತಿತರರು ಇದ್ದರು.