ತೂಬಗೆರೆ&ಮಂಚೇನಹಳ್ಳಿ ರಸ್ತೆ ಗುಂಡಿಮಯ

ತೂಬಗೆರೆ : ತೂಬಗೆರೆ&ಮಂಚೇನಹಳ್ಳಿ ಮಾರ್ಗದ ರಸ್ತೆ ಉದ್ದಕ್ಕೂ ದೊಡ್ಡ ದೊಡ್ಡ ಗುಂಡಿಗಳು ಬಿದ್ದಿದ್ದು, ವಾಹನ ಸವಾರರು ಜೀವ ಕೈಯಲ್ಲಿಡಿದು ಸಾಗುವ ಪರಿಸ್ಥಿತಿ ಎದುರಾಗಿದೆ.

ದೊಡ್ಡಬಳ್ಳಾಪುರ ತಾಲೂಕು ತೂಬಗೆರೆ ಮುಖ್ಯರಸ್ತೆಯಿಂದ ದೊಡ್ಡಮುದ್ದನಹಳ್ಳಿ, ತುರುವನಹಳ್ಳಿ, ಚಿಕ್ಕ ಮುದ್ದೇನಹಳ್ಳಿ, ದೊಡ್ಡ ಮುದ್ದೇನಹಳ್ಳಿ, ಕಲ್ಲುಕೊಟೆ, ಮುಕ್ಕಡಿ ಟ್ಟ ಸೇರಿ ಇನ್ನು ಹಲವು ಗ್ರಾಮಗಳಿಗೆ ಸಂಪರ್ಕ ಕಲ್ಪಿಸುವ ಪ್ರಮುಖ ರಸ್ತೆ ಇದಾಗಿದ್ದು, ಸುಮಾರು 8 ಕಿ.ಮೀ ಉದ್ದಕ್ಕೂ ರಸ್ತೆ ಕಿತ್ತು ಹೋಗಿದೆ.

ವಾಹನ ಸವಾರರು ಒಂದು ಗುಂಡಿ ತಪ್ಪಿಸಲು ಹೋಗಿ ಮತ್ತೊಂದು ಗುಂಡಿಗೆ ಬಿದ್ದು ಅಪಘಾತಕ್ಕೀಡಾಗುವುದು ಸಾಮಾನ್ಯವಾಗಿದೆ. ಆಟೋಗಳಲ್ಲಿ ಸಂಚರಿಸುವ ಪ್ರಯಾಣಿಕರು ಯಾವಾಗ ಆಟೋ ಪಲ್ಟಿಯಾಗುವುದೋ ಎಂಬ ಆತಂಕದಲ್ಲಿಯೇ ಪ್ರಯಾಣಿಸುವಂತಾಗಿದೆ. ಪ್ರತಿದಿನ ಶಾಲಾ&ಕಾಲೇಜಿಗೆ ಹೋಗಿ ಬರುವ ವಿದ್ಯಾರ್ಥಿಗಳು ಪಾಡು ಹೇಳುತೀರದಂತಾಗಿದೆ.

ಚುನಾವಣೆ ಸಂದರ್ಭದಲ್ಲಿ ಮನೆಮನೆ ಬಾಗಿಲಿಗೆ ಬಂದು ಮತ ಭಿಕ್ಷೇ ಕೇಳುವವರು ಚುನಾವಣೆ ಗೆಲುವಿನ ಬಳಿಕ ಈ ಕಡೆ ಸುಳಿಯುವುದೇ ಇಲ್ಲ. ಚುನಾವಣೆ ಪ್ರಚಾರದ ವೇಳೆ ರಸ್ತೆಗಳಿಗೆ ಡಾಂಬರೀಕರಣ ಮಾಡುವ ಭರವಸೆಯೂ ಮಹಾಪೂರಕವನ್ನೇ ಹರಿಸುತ್ತಾರೆ, ನಂತರದಲ್ಲಿ ಸಂಪರ್ಕಕ್ಕೆ ಸಿಗುವುದೇ ಇಲ್ಲ. ಈ ಗ್ರಾಮಗಳಿಗೆ ಬಸ್​ ಬೇಕಾದರೂ ಗಲಾಟೆ ಮಾಡಬೇಕು, ಈ ರಸ್ತೆಯಲ್ಲಿ ಶಾಲಾ&ಕಾಲೇಜು ವಿದ್ಯಾರ್ಥಿಗಳು ಮತ್ತು ಆಸ್ಪತ್ರೆಗೆ ಗರ್ಭಿಣಿಯರು ತೆರಳಲು ಎರಡು ಗಂಟೆಗಳ ಕಾಲ ಸಮಯ ಬೇಕಾಗುತ್ತದೆ. ಜಿಲ್ಲಾ ಪಂಚಾಯಿತಿ, ತಾಲೂಕು ಪಂಚಾಯಿತಿ ಚುನಾವಣೆಗಳು ಬರುತ್ತಿವೆ, ರಾಜಕೀಯ ವ್ಯಕ್ತಿಗಳು ಗ್ರಾಮಗಳಿಗೆ ತೆರಳಿ ಇಲ್ಲಸಲ್ಲದ ಭರವಸೆ ನೀಡಿ ಹೋಗುತ್ತಾರೆ, ಏನಾದರೂ ಸರಿ ನಮಗೆ ರಸ್ತೆ ಆಗಲೇಬೇಕು ಎನ್ನುತ್ತಾರೆ ಕಲ್ಲುಕೊಟೆಯ ಜಗದೀಶ್​ (ಮೇಷ್ಟ್ರು).