ಮೈಸೂರು: ರಕ್ತದ ಅವಶ್ಯಕತೆ ಮತ್ತು ಲಭ್ಯತೆಯ ನಡುವಿನ ಅಂತರವು ಹೆಚ್ಚುತ್ತಿರುವ ಈ ಕಾಲಘಟ್ಟದಲ್ಲಿ, ಜೀವ ಉಳಿಸುವ ಅವಕಾಶದಲ್ಲಿದ್ದ ಕಂದಕ ಮುಚ್ಚಲು ಮಣಿಪಾಲ್ ಆಸ್ಪತ್ರೆ ಮೈಸೂರು ಒಂದು ಮಹತ್ವದ ಹೆಜ್ಜೆಯನ್ನಿಟ್ಟಿದೆ. ಜೀವಧಾರ ಸಂಸ್ಥೆಯ ಸಹಯೋಗದೊಂದಿಗೆ ಶುಕ್ರವಾರ ಆಸ್ಪತ್ರೆಯ ಆವರಣದಲ್ಲಿ ಆಯೋಜಿಸಲಾಗಿದ್ದ ರಕ್ತದಾನ ಶಿಬಿರವು ಸಮಾಜದ ಅಭೂತಪೂರ್ವ ಸ್ಪಂದನೆಯೊಂದಿಗೆ ಯಶಸ್ವಿಯಾಗಿದೆ.
ವಿಶ್ವ ಟ್ರಾಮಾ ದಿನದ ಅಂಗವಾಗಿ ಹಮ್ಮಿಕೊಳ್ಳಲಾಗಿದ್ದ ಈ ಕಾರ್ಯಕ್ರಮದಲ್ಲಿ ನಾಗರಿಕರು ತೋರಿದ ಉತ್ಸಾಹ ಮತ್ತು ಕಾಳಜಿ, ಮಾನವೀಯತೆಯ ಅತ್ಯಂತ ಶಕ್ತಿಶಾಲಿ ಜೀವಾಳಗಳಾದ ಸಹಾನುಭೂತಿ ಮತ್ತು ಸಮುದಾಯ ಪ್ರಜ್ಞೆಯು ಇಂದಿಗೂ ಜೀವಂತವಾಗಿದೆ ಎಂಬುದಕ್ಕೆ ಸಾಕ್ಷಿಯಾಯಿತು.
ವೈದ್ಯಕೀಯ ಕ್ಷೇತ್ರ ಎಷ್ಟೇ ಪ್ರಗತಿ ಸಾಧಿಸಿದ್ದರೂ, ರಸ್ತೆ ಅಪಘಾತಗಳು, ತುರ್ತು ಆಘಾತ ಪ್ರಕರಣಗಳು ಮತ್ತು ಸಂಕೀರ್ಣ ಶಸ್ತ್ರಚಿಕಿತ್ಸೆಗಳಂತಹ ತುರ್ತು ಸಂದರ್ಭಗಳಲ್ಲಿ ರಕ್ತಕ್ಕೆ ನಿರಂತರ ಬೇಡಿಕೆ ಸೃಷ್ಟಿಯಾಗುತ್ತದೆ. ಈ ಬೇಡಿಕೆಯನ್ನು ಪೂರೈಸುವಲ್ಲಿ ಸ್ವಯಂಪ್ರೇರಿತ ರಕ್ತದಾನ ಪ್ರಕ್ರಿಯೆ ಇನ್ನೂ ಪೂರ್ಣ ಪ್ರಮಾಣದ ಪ್ರಗತಿಯಾಗಿಲ್ಲ.
ಮಣಿಪಾಲ್ ಆಸ್ಪತ್ರೆ ಮೈಸೂರಿನ ನಿರ್ದೇಶಕ ಪ್ರಮೋದ್ ಕುಂದರ್ ಮಾತನಾಡಿ, ರಕ್ತವನ್ನು ಯಾವುದೇ ಪ್ರಯೋಗಾಲಯದಲ್ಲಿ ಸೃಷ್ಟಿಸಲಾಗದು. ದಾನಿಗಳ ಉದಾರ ಮನಸ್ಸಿನಿಂದ ಮಾತ್ರ ಲಭಿಸುತ್ತದೆ. ತುರ್ತು ಆಘಾತಗಳ ಸಂದರ್ಭಗಳಲ್ಲಿ, ಸಮಯ ಮತ್ತು ರಕ್ತವೇ ಜೀವ ಉಳಿಸುವಲ್ಲಿ ನಿರ್ಣಾಯಕ ಪಾತ್ರ ವಹಿಸುತ್ತವೆ. ಈ ಶಿಬಿರದಂತಹ ಸಾರ್ಥಕ ಉಪಕ್ರಮಗಳ ಮೂಲಕ, ಸೂಕ್ತ ಕಾಲಕ್ಕೆ ಸರಿಯಾಗಿ ರಕ್ತ ಲಭ್ಯವಿಲ್ಲದೆ ಯಾವುದೇ ಜೀವಕ್ಕೆ ಅಪಾಯವಾಗದಂತೆ ಖಚಿತಪಡಿಸಿಕೊಳ್ಳುವುದೇ ನಮ್ಮ ಪರಮ ಧ್ಯೇಯ ಎಂದು ಹೇಳಿದರು.
ಮೈಸೂರು ನಗರದ ಎನ್.ಆರ್. ಸಂಚಾರ ಪೊಲೀಸ್ ಠಾಣೆಯ ಇನ್ಸ್ಪೆಕ್ಟರ್ ಎಂ.ಎಚ್.ರೇಖಾಬಾಯಿ ಮಾತನಾಡಿ, ಅಪಘಾತ ನಡೆದ ಸ್ಥಳಗಳಿಗೆ ಮೊದಲು ತಲುಪುವುದೇ ಪೊಲೀಸರು. ಅಲ್ಲಿ ಸಂತ್ರಸ್ತರು ತೀವ್ರ ರಕ್ತಸ್ರಾವದಿಂದ ತೊಂದರೆಗೆ ಒಳಗಾಗಿರುತ್ತಾರೆ. ಆ ಸುವರ್ಣ ನಿಮಿಷಗಳಲ್ಲಿ’ ರಕ್ತದ ಲಭ್ಯತೆ ಎಷ್ಟು ಅಮೂಲ್ಯ ಎಂಬುದನ್ನು ನಾವು ಬಲ್ಲೆವು. ಮಣಿಪಾಲ್ ಆಸ್ಪತ್ರೆಯ ಈ ಶಿಬಿರವು ಕೇವಲ ವೈದ್ಯಕೀಯ ಉಪಕ್ರಮವಾಗಿ ಉಳಿದಿಲ್ಲ, ಇದು ದುರಂತವನ್ನು ಬದುಕಾಗಿ ಪರಿವರ್ತಿಸುವ ಒಂದು ಮಾನವೀಯ ಮಹಾಕಾರ್ಯ ಎಂದು ಶ್ಲಾಘಿಸಿದರು.