ಚಿಕ್ಕಮಗಳೂರು: ಜಿಲ್ಲೆಯ ಬಹುನಿರೀಕ್ಷಿತ ಕರೊನಾ ಟೆಸ್ಟ್ ಲ್ಯಾಬ್ ಶನಿವಾರ ಕಾರ್ಯಾರಂಭ ಮಾಡಿತು. ನಗರದ ಮಹಿಳಾ ಮತ್ತು ಮಕ್ಕಳ ಆಸ್ಪತ್ರೆ ಆವರಣದಲ್ಲಿ ಆರ್ಟಿಪಿಸಿಆರ್ ವೈರಾಲಜಿ ಪ್ರಯೋಗಾಲಯವನ್ನು ಜಿಲ್ಲಾ ಉಸ್ತುವಾರಿ ಸಚಿವ ಸಿ.ಟಿ.ರವಿ ಉದ್ಘಾಟಿಸಿದರು.
ಪ್ರಯೋಗಾಲಯವು 1,48,62,000 ರೂ. ವೆಚ್ಚದಲ್ಲಿ ಸ್ಥಾಪನೆಯಾಗಿದೆ. ಇನ್ನು ಮುಂದೆ ಜಿಲ್ಲೆಯಲ್ಲಿ ಕರೊನಾ ಫಲಿತಾಂಶ ಬೇಗ ದೊರೆಯಲಿದೆ. ಈ ಹಿಂದೆ ಜಿಲ್ಲೆಯಲ್ಲಿ 15 ದಿನಗಳಷ್ಟು ವಿಳಂಬವಾಗಿಯೂ ಫಲಿತಾಂಶ ಬಂದ ನಿದರ್ಶನಗಳಿದ್ದವು. ಲ್ಯಾಬ್ನಲ್ಲಿ ಗಂಟಲ ದ್ರವ ಸಂಗ್ರಹಿಸಿದ 4 ಗಂಟೆಯಲ್ಲೇ ವರದಿ ಹೊರಬೀಳುತ್ತದೆ. ಹೆಚ್ಚೆಂದರೆ 12 ತಾಸಿನೊಳಗೆ ಫಲಿತಾಂಶ ಲಭ್ಯವಾಗಲಿದೆ. ಇನ್ನು ಹಾಸನ, ಶಿವಮೊಗ್ಗ, ಬೆಂಗಳೂರು ಲ್ಯಾಬ್ಗೆ ಸ್ಯಾಂಪಲ್ ಕಳಿಸುವ ಅಗತ್ಯ ಇರುವುದಿಲ್ಲ.
ಐದು ವರ್ಷಗಳ ಕಾಲ ಗ್ಯಾರೆಂಟಿ ಇರುವ ಅತ್ಯುತ್ತಮವಾದ ಉಪಕರಣವನ್ನು ವಿದೇಶದಿಂದ ಆಮದು ಮಾಡಿಕೊಂಡು ಅಳವಡಿಸಲಾಗಿದೆ. ಪ್ರಯೋಗಾಲಯಕ್ಕೆ ಅಗತ್ಯವಿರುವ ಸಿಬ್ಬಂದಿ ನೇಮಕ ಮಾಡಲಾಗಿದ್ದು ಎರಡು ಶಿಫ್ಟ್ಗಳಲ್ಲಿ ಕಾರ್ಯನಿರ್ವಹಿಸಲಿದ್ದಾರೆ. ಹೆಚ್ಚುವರಿ ಸಿಬ್ಬಂದಿ ನೇಮಕ ಮಾಡಿ ಅವರಿಗೆ ತರಬೇತಿ ನೀಡಿದಲ್ಲಿ ಮೂರು ಶಿಫ್ಟ್ಗಳಲ್ಲೂ ಪ್ರಯೋಗಾಲಯವನ್ನು ಬಳಕೆ ಮಾಡಿಕೊಳ್ಳಬಹುದು. ನಿತ್ಯ ಒಂದು ಸಾವಿರದಿಂದ 1,200 ಫಲಿತಾಂಶ ಪಡೆಯಬಹುದಾಗಿದೆ.