ಜನರ ಸಂಕಷ್ಟಗಳಿಗೆ ಸ್ಪಂದಿಸುವ ದಕ್ಷಿಣ ಭಾರತದ ಮಠಗಳು

ನಾಗಮಂಗಲ: ಜನಪರ ಕೆಲಸಗಳಲ್ಲಿ ದಕ್ಷಿಣ ಭಾರತದ ಮಠಗಳು ತೊಡಗಿಕೊಂಡಿವೆ ಎಂದು ಧರ್ಮಸ್ಥಳದ ಧರ್ಮಾಧಿಕಾರಿ ಡಾ. ವೀರೇಂದ್ರ ಹೆಗ್ಗಡೆ ಬಣ್ಣಿಸಿದ್ದಾರೆ.

9 ದಿನಗಳ ಆದಿಚುಂಚನಗಿರಿ ಜಾತ್ರಾ ಮಹೋತ್ಸವದಲ್ಲಿ 3ನೇ ದಿನವಾದ ಬುಧವಾರ ಆಯೋಜಿಸಿದ್ದ ದ್ವಾದಶಾಬ್ದ ಮಹಾಕುಂಭಾಭಿಷೇಕದಲ್ಲಿ ಪಾಲ್ಗೊಂಡು ಮಾತನಾಡಿದರು. ದಕ್ಷಿಣ ಭಾರತದಲ್ಲಿರುವ ಮಠ, ಮಂದಿರಗಳು ಎಲ್ಲ ವರ್ಗದ ಜನರ ಸಂಕಷ್ಟಗಳಿಗೆ ಸ್ಪಂದಿಸುವ ಜತೆಗೆ ಜನಪರ ಕೆಲಸಗಳನ್ನು ಮಾಡುತ್ತಿವೆ. ಆ ಮೂಲಕ ಉತ್ತರ ಭಾರತದಲ್ಲಿರುವ ಮಠಗಳಿಗಿಂತ ಶ್ರೇಷ್ಠವಾಗಿವೆ ಎಂದರು. ಎಲ್ಲ ದೋಷಗಳನ್ನು ಸ್ವೀಕರಿಸುವ ಸ್ಥಳವನ್ನು ಶ್ರೀಕ್ಷೇತ್ರವೆಂದು ಕರೆಯಲು ಸಾಧ್ಯ. ಅಧರ್ಮ, ಸಮಾಜಘಾತುಕ ಮತ್ತು ತಪ್ಪುಗಳನ್ನು ಮಾಡುವವರಿಗೆ ಮಾತ್ರ ಭಯವಿರುತ್ತದೆಯೇ ಹೊರತು ಧರ್ಮದ ಮಾರ್ಗದಲ್ಲಿ ನಡೆಯುವವರಿಗೆ ಅಲ್ಲ ಎಂದರು.

ಚಾರುಕೀರ್ತಿ ಭಟ್ಟಾರಕ ಸ್ವಾಮೀಜಿ ಮಾತನಾಡಿ, ಡಾ. ಬಾಲಗಂಗಾಧರನಾಥ ಸ್ವಾಮೀಜಿ ಅವರದು ಮೇರು ವ್ಯಕ್ತಿತ್ವ. ಸಮಾಜ ಸೇವೆಗಾಗಿಯೇ ತಮ್ಮ ಜೀವನವನ್ನು ಮುಡುಪಾಗಿಟ್ಟಿದ್ದರು ಎಂದರು.

ಸುತ್ತೂರು ಶ್ರೀ ಶಿವರಾತ್ರಿ ದೇಶಿಕೇಂದ್ರ ಸ್ವಾಮೀಜಿ ಮಾತನಾಡಿ, ರಾಜ್ಯ ಕಂಡ ಉತ್ತಮ ಮುಖ್ಯಮಂತ್ರಿಗಳಲ್ಲಿ ಕುಮಾರಸ್ವಾಮಿಯೂ ಒಬ್ಬರು. ಅವರು ಜನರೊಂದಿಗೆ ಬೆರೆತು ಜನರ ನೋವನ್ನು ಒರೆಸುವ ಕೆಲಸ ಮಾಡಿದವರು. ಜನರ ಸಂಕಷ್ಟಗಳಿಗೆ ಸ್ಪಂದಿಸುವ ಮೂಲಕ ಜನಪರರಾದರು ಎಂದರು. ಡಾ. ನಿರ್ಮಲಾನಂದನಾಥ ಸ್ವಾಮೀಜಿ ಮಾತನಾಡಿ, ದೇಶ ಹಲವಾರು ಸಮಸ್ಯೆಗಳನ್ನು ಎದುರಿಸುತ್ತಿದೆ. ಅವುಗಳನ್ನು ಬಗೆಹರಿಸಲು ಕೇವಲ ವಿಜ್ಞಾನ ಮತ್ತು ತಂತ್ರಜ್ಞಾನದಿಂದ ಸಾಧ್ಯವಿಲ್ಲ. ಜನರು ಕೂಡ ಪ್ರಜ್ಞಾವಂತರಾಗಬೇಕು ಎಂದರು.

ಬೆಳಗಾವಿಯ ಇಂಚಲಮಠದ ಪೀಠಾಧ್ಯಕ್ಷ ಶಿವಕುಮಾರ ಸ್ವಾಮೀಜಿ, ಹರಿದ್ವಾರದ ಶ್ರೀ ಆನಂದ ಪೀಠದ ಆಚಾರ್ಯ ಮಹಾಮಂಡಲೇಶ್ವರ ಬಾಲಕನಂದಜೀ, ದೆಹಲಿಯ ಕಾಳಿಕಾ ಮಂದಿರದ ಸುರೇಂದ್ರನಾಥ ಮಹಾರಾಜ್ ಇತರರಿದ್ದರು.

ಮಹಾಕುಂಭಾಭಿಷೇಕ: ಶ್ರೀ ಕಾಲಭೈರವೇಶ್ವರ ದೇವಾಲಯ ನಿರ್ವಣಗೊಂಡು 12 ವರ್ಷವಾದ ಹಿನ್ನೆಲೆಯಲ್ಲಿ ನಿರ್ಮಲಾನಂದನಾಥ ಸ್ವಾಮೀಜಿ ನೇತೃತ್ವ ದಲ್ಲಿ ದ್ವಾದಶಾಬ್ದ ಮಹಾಕುಂಭಾಭಿಷೇಕ ನಡೆಯಿತು.