ದಾವಣಗೆರೆ: ದಾವಣಗೆರೆ ಎಂದ ಕೂಡಲೇ ಬೆಣ್ಣೆ ದೋಸೆ ಜತೆಗೆ ಮಂಡಕ್ಕಿ ಮೆಣಸಿನಕಾಯಿ ಸಹಜವಾಗಿ ನೆನಪಾಗುತ್ತದೆ. ಆದರೆ ಸದ್ಯ ಕರೊನಾ ವೈರಸ್ ಸೋಂಕಿನ ಹಿನ್ನೆಲೆಯಲ್ಲಿ ಲಾಕ್ಡೌನ್ ಘೋಷಣೆಯಾಗಿರುವ ಕಾರಣ ಇವುಗಳ ಮಾರಾಟವೂ ಬಂದ್ ಆಗಿದೆ.
ಹೀಗಿದ್ದೂ ಜಿಲ್ಲೆಯ ಹರಿಹರದ ಭರಂಪುರದಲ್ಲಿ ವ್ಯಕ್ತಿಯೊಬ್ಬ ಮೆಣಸಿನಕಾಯ ಬಜ್ಜಿ ಮಾರಾಟದ ಕಾಯಕವನ್ನು ಎಂದಿನಂತೆ ಶುಕ್ರವಾರವೂ ಮುಂದುವರಿಸಿದ್ದ. ಲಾಕ್ಡೌನ್ ಇದ್ದರೂ ಮನೆಯಲ್ಲೇ ಇದ್ದು ಬೇಸರಗೊಂಡಿದ್ದ ಜನರು ತಮ್ಮ ಜಿಹ್ವಾ ಚಪಲ ತೀರಿಸಿಕೊಳ್ಳಲು ಮೆಣಸಿನಕಾಯಿ ಬಜ್ಜಿ, ಮಂಡಕ್ಕಿ ತಿನ್ನಲು ಮುಗಿಬಿದ್ದಿದ್ದರು.
ವಿಷಯ ತಿಳಿದ ತಹಸೀಲ್ದಾರ್ ರಾಮಚಂದ್ರಪ್ಪ ನಗರಸಭೆ ಆಯುಕ್ತರ ಜತೆಗೂಡಿ ಸ್ಥಳಕ್ಕೆ ತೆರಳಿ, ಮೆಣಸಿನಕಾಯ ವ್ಯಾಪಾರದಲ್ಲಿ ತೊಡಗಿದ್ದ ವ್ಯಕ್ತಿಗೆ ವ್ಯಾಪಾರ ನಿಲ್ಲಿಸುವಂತೆ ಸೂಚಿಸಿದರು. ಅಲ್ಲದೆ, ಲಾಕ್ಡೌನ್ ಹಿನ್ನೆಲೆಯಲ್ಲಿ ಯಾರಾದರೂ ಮನೆಯಿಂದ ಹೊರಬರುವ ದುಸ್ಸಾಹ ಮತ್ತೊಮ್ಮೆ ಮಾಡಿದರೆ, ಅಂಥವರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳುವುದಾಗಿ ಎಚ್ಚರಿಸಿದರು.