ಅನಂತನಗರದಲ್ಲಿ ಬೀದಿ ನಾಯಿಗಳ ಕಾಟ...

ಮಣಿಪಾಲದಲ್ಲಿ ತೀವ್ರ ಸಮಸ್ಯೆ

ಸಾರ್ವಜನಿಕರ ಅಸಮಾಧಾನ

ವಿಜಯವಾಣಿ ಸುದ್ದಿಜಾಲ ಉಡುಪಿ

ಮಣಿಪಾಲದ ಅನಂತನಗರದಲ್ಲಿ ಬೀದಿ ನಾಯಿಗಳ ಕಾಟ ವಿಪರೀತವಾಗಿದ್ದು, ಮಕ್ಕಳು, ವಯಸ್ಕರು ಸೇರಿದಂತೆ ಇಲ್ಲಿ ನೆಲೆಸಿರುವ ಜನರಿಗೆ ದಿನವೂ ಭಯದ ವಾತಾವರಣ ನಿರ್ಮಿಸಿದೆ.

ಅಲ್ಲಿನ ಒಂದನೇ ಹಂತದ ಮೊದಲನೇ ಕ್ರಾಸ್​ನಲ್ಲಿ 4-5 ಅಪಾರ್ಟ್​ಮೆಂಟ್​ಗಳು ಹಾಗೂ ಪುಟಾಣಿ ಮಕ್ಕಳು ನೂರಾರು ಸಂಖ್ಯೆಯಲ್ಲಿರುವ ಲಿಟಲ್​ ಮಿಲೇನಿಯಂ ಶಾಲೆಯೂ ಇದ್ದು, ಆಗಾಗ ಬೀದಿ ನಾಯಿಗಳು ಜನರನ್ನು ಅಟ್ಟಿಸಿಕೊಂಡು ಬರುತ್ತವೆ.

ಈ ಪ್ರದೇಶದಲ್ಲಿ ಹಲವು ಜನ ವಸತಿ ಪ್ರದೇಶವಿದ್ದು, ಜನ ಸಂಚಾರವೂ ಹೆಚ್ಚಿದೆ. ಈ ಮಾರ್ಗದ ರಸ್ತೆಯಲ್ಲೇ ಬೀಡುಬಿಟ್ಟಿರುವ ಅನೇಕ ನಾಯಿಗಳು, ಜನರ ಮೇಲೆ ಹಾಗೂ ಮಕ್ಕಳನ್ನು ಶಾಲೆಗೆ ಬಿಡಲು ಬೈಕ್​ ಮೇಲೆ ಬರುವ ಪಾಲಕರ ಮೇಲೆ ಆಕ್ರಮಣ ಮಾಡುತ್ತಿವೆ. ಜಿಲ್ಲಾಡಳಿತ ಬೀದಿ ನಾಯಿಗಳ ಉಪಟಳ ನಿಯಂತ್ರಿಸಬೇಕು ಎಂದು ಇಲ್ಲಿನ ನಿವಾಸಿಗರು ವಿಜಯವಾಣಿ ಮೂಲಕ ಒತ್ತಾಯಿಸಿದ್ದಾರೆ.