ಬಾಗಲಕೋಟೆ: ಎಸ್ಎಸ್ಎಲ್ಸಿ ಪರೀಕ್ಷೆ ಬರೆಯುತ್ತಿದ್ದಾಗಲೇ ಉಸಿರಾಟದ ಸಮಸ್ಯೆಗೆ ಒಳಗಾಗಿ ಆಸ್ಪತ್ರೆಗೆ ದಾಖಲಾಗಿದ್ದ ವಿದ್ಯಾರ್ಥಿನಿ ಈಗ ರಾಜ್ಯಕ್ಕೇ ಟಾಪರ್ ಎನಿಸಿಕೊಂಡಿದ್ದಾಳೆ. ಬಾಗಲಕೋಟೆ ಜಿಲ್ಲೆ ಮುಚಖಂಡಿ ತಾಂಡಾದ ಗಂಗಮ್ಮ ಬಸವರಾಜ್ ಹುಡೇದ ಎಂಬಾಕೆಯೇ ಈ ವಿದ್ಯಾರ್ಥಿನಿ.
ಎಸ್ಎಸ್ಎಲ್ಸಿ ಪರೀಕ್ಷೆಯಲ್ಲಿ 625ಕ್ಕೆ 625 ಅಂಕ ಗಳಿಸಿರುವ ಈಕೆ ಮುಚಖಂಡಿ ಗ್ರಾಮದ ದುರ್ಗಾದೇವಿ ಪ್ರೌಢಶಾಲೆಯ ವಿದ್ಯಾರ್ಥಿನಿ. ಈಕೆ ಎಸ್ಎಸ್ಎಲ್ಸಿ ಪರೀಕ್ಷೆ ಬರೆಯುವಾಗಲೇ ಉಸಿರಾಟ ತೊಂದರೆಗೆ ಒಳಗಾಗಿದ್ದು, ಪರೀಕ್ಷೆ ಮುಗಿಯುತ್ತಲೇ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಸದ್ಯ 20 ದಿನಗಳಿಂದ ಮನೆಯಲ್ಲಿಯೇ ಆಕ್ಸಿಜನ್ ಮೇಲಿರುವ ಈ ವಿದ್ಯಾರ್ಥಿನಿ, ಟಾಪರ್ ಆದ ಖುಷಿಯಲ್ಲಿ ತನ್ನ ಸಂಕಷ್ಟವನ್ನು ಸ್ವಲ್ಪಮಟ್ಟಿಗೆ ಮರೆಯುವಂತಾಗಿದೆ.
ಕರೊನಾ ಮಧ್ಯದಲ್ಲೂ ಬಿಟ್ಟೂಬಿಡದೆ ಆನ್ಲೈನ್ ಕ್ಲಾಸ್, ನಿರಂತರ ಓದು ತನ್ನ ಯಶಸ್ಸಿನ ಗುಟ್ಟು ಎಂದ ಗಂಗಮ್ಮ ಹೇಳಿಕೊಂಡಿದ್ದಾಳೆ. ಮಗಳ ಸಾಧನೆಗೆ ತಂದೆ ಬಸವರಾಜ್, ತಾಯಿ ಗೀತಾ ಅಪಾರ ಮೆಚ್ಚುಗೆ ವ್ಯಕ್ತಪಡಿಸಿದ್ದು, ಮನೆಯಲ್ಲಿ ಸಂಭ್ರಮದ ವಾತಾವರಣ ಮೂಡಿದೆ.