ಶಕ್ತಿ ಶಾರದೆ ಸನ್ನಿಧಿಯಲ್ಲಿ ಆಷಾಢ ವೈಭವ

 ಮೈಸೂರಿನ ಶಕ್ತಿ ಪೀಠದಲ್ಲಿ ವಿಶೇಷ ಪೂಜಾ ಮಹೋತ್ಸವ  ಶುಕ್ರವಾರ ಸಾವಿರಾರು ಭಕ್ತರ ಸಂಗಮ *  ಅಭಿನವ ಶಂಕರಾಲಯದಲ್ಲಿ ಹೋಮ- ಹವನ ಎ.ಆರ್. ರಘುರಾಮ ಮೈಸೂರು ಸಾಂಸ್ಕೃತಿಕ ರಾಜಧಾನಿ ಮೈಸೂರಿನ ಅರಮನೆ ಸಮೀಪದ ಅಗ್ರಹಾರದಲ್ಲಿರುವ ಶಕ್ತಿ ಶಾರದೆ ಪೀಠ ಶತಮಾನ ಕಂಡ ಸನ್ನಿಧಿ. ದಕ್ಷಿಣಾಮ್ನಾಯ ಶೃಂಗೇರಿ ಶ್ರೀ ಶಂಕರಮಠದ ನಿರ್ವಹಣೆಯಲ್ಲಿರುವ ಶ್ರೀ ಶಾರದಾ ಮಂದಿರವಿದು. ನಿತ್ಯವೂ ದೇವಿಯ ಆರಾಧನೆಯೊಂದಿಗೆ ಶಾಸ್ತ್ರ- ಸಂಪ್ರದಾಯಗಳ ಪಾಲನೆ, ವೇದಾಧ್ಯಯನ, ಹೋಮ-ಹವನ, ಗೋ ಸಂರಕ್ಷಣೆ, ಅಕ್ಷರಾಭ್ಯಾಸ ಸೇರಿದಂತೆ ಹತ್ತು ಹಲವು ವಿಧದಲ್ಲಿ ನಾಡಿನ ಆಸ್ತಿಕರಿಗೆ ಅಗಣಿತ ಸೇವೆ ನೀಡುತ್ತಿದೆ ಈ ಆಲಯ. ಅಭಿನವ ಶಂಕರಾಲಯವೆಂದೇ ಹೆಸರಾದ ದೇವಾಲಯ ಸಮುಚ್ಛಯದಲ್ಲಿ ‘ಆಷಾಢ ವೈಭವ’ ಪ್ರತಿ ಶುಕ್ರವಾರದ ವಿಶೇಷ ಮಹೋತ್ಸವ ವಿಜೃಂಭಿಸಲಿದೆ. ಮೈಸೂರಿನಲ್ಲಿ ಆಷಾಢ ಮಾಸ ಎಂದರೆ ಅದಕ್ಕೆ ತನ್ನದೇ ಆದ ವಿಶೇಷತೆ ಇದೆ. ಈ ಮಾಸದ ಪ್ರತಿ ಶುಕ್ರವಾರಗಳಂದು ಅಮ್ಮನವರ ವೈಭವ ನೋಡಿ ಸೇವೆ ಸಮರ್ಪಿಸಲು ಸಾವಿರಾರು ಭಕ್ತರು ಶಂಕರ ಮಠದಲ್ಲಿ ಸಂಗಮಗೊಳ್ಳಲಿದ್ದಾರೆ. ಶಕ್ತಿ ಮಾತೆಗೆ ಆಷಾಢದ ಶುಕ್ರವಾರಗಳಂದು ಅಭಿಷೇಕ, ಚಿತ್ತಾಕರ್ಷಕ ಆಭರಣಗಳ , ಪರಿಮಳ ಪುಷ್ಪಗಳ ಸಮರ್ಪಣೆ, ವೈವಿಧ್ಯಮಯ ಅಲಂಕಾರ ನೆರವೇರಲಿದೆ.

1.  ಅಮ್ಮನವರಿಗೆ ವಿಶೇಷ ಅಲಂಕಾರಗಳು ಶಕ್ತಿ ಶಾರದೆಗೆ ಆಷಾಢದ ಶುಕ್ರವಾರಗಳಂದು ವಿಶೇಷವಾಗಿ ಗಜಲಕ್ಷ್ಮೀ ಅಲಂಕಾರ, ಸರಸ್ವತೀ ( ವೀಣಾ ಶಾರದೆ), ಬಳೆ ಅಲಂಕಾರ ಮತ್ತು ಶ್ರೀ ರಾಜರಾಜೇಶ್ವರಿ ರೂಪದಲ್ಲಿ ಸಿಂಗರಿಸಿ ಆರಾಧಿಸುವುದು ವಾಡಿಕೆಯೇ ಆಗಿದೆ. ಬೆಳಗಿನ ಸಂದರ್ಭದಲ್ಲಿ ನೂರಾರು ವೇದ ಪಂಡಿತರು ಮತ್ತು ಋತ್ವಿಜರಿಂದ ಸರಸ್ವತೀ ಹೋಮ, ಧನ್ವಂತರೀ, ದುರ್ಗಾ ಮತ್ತು ನವ ಚಂಡಿಕಾ ಹೋಮಗಳನ್ನು ನಡೆಸಲಾಗುತ್ತದೆ. ಮಧ್ಯಾಹ್ನ 12ಕ್ಕೆ ಪೂರ್ಣಾಹುತಿ ಸಮರ್ಪಣೆ ಮಾಡಲಾಗುತ್ತದೆ. ಸಂಜೆ 5ಕ್ಕೆ 108 ಮಾತೆಯರಿಂದ ಏಕ ಕಂಠದಲ್ಲಿ ಲಲಿತಾ ಸಹಸ್ರನಾಮ ಮತ್ತು ಕುಂಕುಮಾರ್ಚನೆ ನೆರವೇರುವುದು ವೈವಿಧ್ಯತೆಯಲ್ಲಿ ವಿಶೇಷತೆ ಪ್ರತೀಕವಾಗಿದೆ. ರಾತ್ರಿ 9.30ಕ್ಕೆ ಪ್ರಾಕಾರೋತ್ಸವ, ಮಹಾ ಮಂಗಳಾರತಿ ಮತ್ತು ಅಷ್ಟಾವಧಾನ ಸೇವೆಗಳು ವಿಧಿವತ್ತಾಗಿ ನೆರವೇರಲಿದೆ.
2. ವಿದ್ವನ್ಮಣಿಗಳಿಂದ ಸಾಂಸ್ಕೃತಿಕ ವೈವಿಧ್ಯ ಸಂಗೀತ ಪ್ರಿಯೆ, ಅಕ್ಷರಕ್ಕೆ ಅಭಿಮಾನಿದೇವತೆಯಾದ ಶಾರದಾ ಸನ್ನಿಧಾನದಲ್ಲಿ ಆಷಾಢದ ಶುಕ್ರವಾರಗಳ ಸಂಜೆ ಗಾನ- ನಾದ- ವಾದ್ಯ ಸೇವೆಯೂ ವಿಜೃಂಭಿಸುತ್ತದೆ. ಆಸ್ತಿಕರಿಗೆ ಭಕ್ತಿಯೊಂದಿಗೆ ರಂಜನೆಯನ್ನೂ ಧಾರೆ ಎರೆಯುವ ನಿಟ್ಟಿನಲ್ಲಿ ನಾಡಿನ ಖ್ಯಾತ ಕಲಾವಿದರು ತಮ್ಮ ಪಾಂಡಿತ್ಯವನ್ನು ಸಂಗೀತದ ರೂಪದಲ್ಲಿ ಸಮರ್ಪಿಸುವುದು ಉತ್ಸವದ ಮೆರುಗನ್ನು ಹೆಚ್ಚಿಸುತ್ತದೆ. ಈ ಸರಣಿಯಲ್ಲಿ ಜು. 4 ರ ಸಂಜೆ ಪಿ.ಬಿ. ಕೀರ್ತನಾ ಮತ್ತು ಅದಿತಿ ನಡುತೋಟ ವೃಂದದಿಂದ ಗಾಯನ, 11ರಂದು ವಿದ್ವಾನ್ ಸಂಪಗೋಡು ವಿಘ್ನರಾಜ ಮತ್ತು ತಂಡದಿಂದ ಕರ್ನಾಟಕ ಶಾಸ್ತ್ರೀಯ ಸಂಗೀತ, 18 ರಂದು ವಿದ್ವಾಂಸರಾದ ರಕ್ಷಿತ್ ಪ್ರಸಾದ ಮತ್ತು ರತ್ನ ತೇಜರಿಂದ ಮ್ಯಾಂಡಲಿನ್- ಪಿಟೀಲು ಜುಗಲ್‌ಬಂದಿ ಅನುರಣಿಸಲಿದೆ. *ದಾಖಲೆ ನಿರ್ಮಿಸಿದ ಶತಮಾನೋತ್ಸವ : ಶಂಕರ ಮಠದ ಪರಂಪರೆಯ 34ನೇ ಶ್ರೀ ಚಂದ್ರಶೇಖರ ಭಾರತೀ ಸ್ವಾಮೀಜಿ 1924ರಲ್ಲಿ ಶಾರದೆಯನ್ನು ಇಲ್ಲಿ ಪ್ರತಿಷ್ಠಾಪಿಸಿದರು. ನಾಲ್ವಡಿ ಕೃಷ್ಣರಾಜ ಒಡೆಯರ್ ಆಲಯ ನಿರ್ಮಿಸಿಕೊಟ್ಟರು. ಅರಮನೆ- ಗುರುಮನೆ ಸಂಬಂಧ ಅಂದಿನಿಂದ ಇಂದಿನವರೆಗೆ ಹಸಿರಾಗಿದೆ. 2024ನೇ ಮಾರ್ಚಿಯಲ್ಲಿ ಶೃಂಗೇರಿಯ ಉಭಯ ಶ್ರೀಗಳ ಸಾನ್ನಿಧ್ಯದಲ್ಲಿ ಈ ದೇಗುಲದ ಶತಮಾನೋತ್ಸವ 8 ದಿನಗಳ ಕಾಲ ವೈಭವೋಪೇತವಾಗಿ ನೆರವೇರಿದ್ದು ಇತಿಹಾಸದ ಪುಟದಲ್ಲಿ ದಾಖಲಾಗಿದೆ. * ಅಕ್ಷರಾಭ್ಯಾಸದ ಕ್ಷೇತ್ರ : ಮೈಸೂರು ಪ್ರಾಂತ್ಯದಲ್ಲಿ ಶತಮಾನದಿಂದಲೂ ಮಕ್ಕಳ ಅಕ್ಷರಾಭ್ಯಾಸದ ಕ್ಷೇತ್ರವಾಗಿದೆ ಈ ಶಂಕರ ಮಠ.ಶಾರದಾಂಬೆ ಅಕ್ಷರಕ್ಕೆ ಅಭಿಮಾನಿ. ಇದೇ ತಾಣದಲ್ಲಿ ಪಾಲಕರು ಮಕ್ಕಳ ಹೆಸರಿನಲ್ಲಿ ಪೂಜೆ ಮಾಡಿಸಿ, ಸ್ಲೇಟು, ಬಳಪ, ಪೆನ್ನು, ನೋಟ್‌ಬುಕ್ ಇತ್ಯಾದಿ ಲೇಖನ ಸಾಮಗ್ರಿಗಳನ್ನು ಪೂಜೆ ಮಾಡಿಸಿ, ದಾನ ನೀಡಿ ಚಿಣ್ಣರಿಗೆ ಅಕ್ಷರಾಭ್ಯಾಸ ಮಾಡಿಸುವ ಪದ್ಧತಿ ಇದೆ. ಜ್ಞಾನ ಪ್ರಾಪ್ತಿಗಾಗಿ ಸರಸ್ವತಿ ಮೂಲಮಂತ್ರ ಜಪವೂ ನಡೆಯುತ್ತದೆ. ವಿಜಯದಶಮಿ ದಿನ ಅಕ್ಷರ ಆರಂಭಕ್ಕೆ ಸಾವಿರಾರು ಮಕ್ಕಳು ಇಲ್ಲಿಗೆ ಆಗಮಿಸುತ್ತಾರೆ. ಪರೀಕ್ಷಾ ಸಮಯದಲ್ಲೂ ಹಾಲ್‌ಟಿಕೆಟ್, ಲೇಖನಿಗಳನ್ನು ಶಾರದೆ ಬಳಿ ಇರಿಸಿ ಪೂಜಿಸಿ ನೀಡಲಾಗುತ್ತದೆ.

*

* ಆಚರಣೆ ಏನೇನು ? : ಅಗ್ರಹಾರದಲ್ಲಿರುವ ಶಂಕರ ಮಠದಲ್ಲಿ ಶ್ರೀ ಮಹಾಗಣಪತಿ, ಶ್ರೀ ಸತ್ಯನಾರಾಯಣ, ನವಗ್ರಹ, ನಾಗ, ಶ್ರೀ ಆದಿಶಂಕರಾಚಾರ್ಯ, ಜಗದ್ಗುರು ನೃಸಿಂಹ ಭಾರತಿ ಶ್ರೀಗಳ ಸನ್ನಿಧಾನಗಳಿವೆ. ನಿತ್ಯವೂ ದೇವಿಗೆ ಅಷ್ಟೋತ್ತರ, ಸಹಸ್ರನಾಮ, ಕುಂಕುಮಾರ್ಚನೆ, ಶ್ರೀಚಕ್ರ ನವಾವರಣ ಪೂಜೆಯು ಕಲ್ಪೋಕ್ತ ವಿಧಾನದಲ್ಲಿ ನೆರವೇರುತ್ತದೆ. ಮೈಸೂರು ಮಹಾರಾಜರು ಮತ್ತು ಸಮಸ್ತ ಕರುನಾಡಿಗೆ ಮಂಗಳವಾಗಲೆಂದು ದಿನವೂ ಸಂಕಲ್ಪೋಕ್ತ ಪೂಜೆ ನಡೆಯುತ್ತದೆ. ಸಂಜೆ ಆರತಿ, ವಿವಿಧ ಅರ್ಚನೆ, ಪ್ರಸಾದ ವಿನಿಯೋಗವಿರುತ್ತದೆ. ಹುಣ್ಣಿಮೆ ಶ್ರೀ ಸತ್ಯನಾರಾಯಣ ಪೂಜೆ, ಚಂಡಿಕಾಯಾಗ, ಅಮಾವಾಸ್ಯೆ ಮೃತ್ಯುಂಜಯ ಹೋಮ, ರುದ್ರ ಹೋಮ, ಸಂಕಷ್ಟಿ, ಪ್ರದೋಶ ಪೂಜೆ, ಜ್ಯೇಷ್ಠ ಮಾಸದಲ್ಲಿ ವಾರ್ಷಿಕೋತ್ಸವ, ಶಂಕರ ಜಯಂತಿಗೆ 5 ದಿನ ಶಂಕರೋತ್ಸವ ಆಯೋಜನೆಗೊಂಡಿರುತ್ತದೆ. * ಶರನ್ನವರಾತ್ರಿ ಹಬ್ಬ : ಶಾರದೆ ಸನ್ನಿಧಿಯಲ್ಲಿ ನವರಾತ್ರಿಗೆ ಒಂದು ವಿಶೇಷ ಕಳೆ ಇರುತ್ತದೆ. ಮಹಾಲಯ ಅಮಾವಾಸ್ಯೆ ದಿನ ವಾರ್ಷಿಕ ಮಹಾಭಿಷೇಕ, ನವರಾತ್ರಿ ಪಾಡ್ಯದಿಂದ ವಿಜಯದಶಮಿ ತನಕ ನಿತ್ಯವೂ ವಿಭಿನ್ನ ಅಲಂಕಾರ, ಕಾರ್ತಿಕದಲ್ಲಿ ದಿನವೂ ದೀಪೋತ್ಸವ, ಶ್ರಾವಣ ಶುಕ್ರವಾರ ವರಮಹಾಲಕ್ಷ್ಮೀ ವ್ರತ ನೆರವೇರುತ್ತದೆ.