ಬ್ಯಾಡಗಿ: ವೀರಶೈವ ಸಂಪ್ರದಾಯದಂತೆ ಜಂಗಮವಟುಗಳಿಗೆ ನೀಡುವ ಶಿವದೀಕ್ಷೆ (ಅಯ್ಯಾಚಾರ) ಪದ್ಧತಿಯನ್ನು ಜಂಗಮ ಕುಲಬಾಂಧವರು ಉಳಿಸಿಕೊಂಡು ಹೋಗಬೇಕು. ಪೂರ್ವಜರ ಆಚಾರ, ವಿಚಾರಗಳನ್ನು ಕಟ್ಟುನಿಟ್ಟಾಗಿ ಪಾಲಿಸುವ ಮೂಲಕ ಧರ್ಮರಕ್ಷಣೆಗೆ ಮುಂದಾಗುವಂತೆ ದಿಂಡದಹಳ್ಳಿ ಪಂಚಮಠಾಧೀಶ ಷ.ಬ್ರ. ಪಶುಪತಿ ಶಿವಾಚಾರ್ಯರು ಸಲಹೆ ನೀಡಿದರು.
ಪಟ್ಟಣದ ಜಗದ್ಗುರು ಪಂಚಾಚಾರ್ಯ ಯುವವೇದಿಕೆ ಆಶ್ರಯದಲ್ಲಿ ರೇಣುಕಮಂದಿರ ಹಾಗೂ ಸಂಗಮೇಶ್ವರ ದೇವಸ್ಥಾನಗಳ ಸಭಾಭವನದಲ್ಲಿ ಮಂಗಳವಾರ ಏರ್ಪಡಿಸಿದ್ದ 26 ಜಂಗಮ ವಟುಗಳ ಶಿವದೀಕ್ಷಾ ಕಾರ್ಯಕ್ರಮ ಉದ್ಘಾಟಿಸಿ ಅವರು ಮಾತನಾಡಿದರು.
ಪ್ರಾಚೀನ ಕಾಲದಿಂದಲೂ ವೀರಶೈವ ಪರಂಪರೆಯ ಜಂಗಮರು ಪುರೋಹಿತ, ಧಾರ್ವಿುಕ ವಿಧಿ-ವಿಧಾನಗಳಲ್ಲಿ ತೊಡಗಿಕೊಂಡಿದ್ದಾರೆ. 8 ವರ್ಷ ವಯೋಮಾನದ ಎಲ್ಲ ಜಂಗಮರು ಸಂಪ್ರದಾಯದಂತೆ ಅಯ್ಯಾಚಾರ ದೀಕ್ಷೆ ಪಡೆದು, ಕೋರುಣ್ಯ ಭಿಕ್ಷಾಟನೆ ಕಾಯಕ ಮಾಡಬೇಕಿದೆ. ವಟುಗಳಿಗೆ ಜಂಗಮ ಶಿವಾಚಾರ್ಯರು ಮಂತ್ರೋಚ್ಛಾರದ ಮೂಲಕ ಲಿಂಗಧಾರಣೆ, ಬೆತ್ತ, ಜೋಳಿಗೆ, ಕಾಲಿಗೆ ಜಂಗು ಧರಿಸುವ ಮೂಲಕ ಶಿಷ್ಟಾಚಾರಗಳನ್ನು ಪಾಲಿಸಬೇಕು. ಗುರುವಂಶಸ್ಥರಾದ ಜಂಗಮರನ್ನು ಭಕ್ತಿ ಭಾವನೆಗಳಿಂದ ಕಾಣುತ್ತಾರೆ. ನಮ್ಮ ಆಚಾರಗಳನ್ನು ಕಟ್ಟುನಿಟ್ಟಾಗಿ ಪಾಲಿಸಲು ವಟುಗಳಿಗೆ ಪಾಲಕರು, ಹಿರಿಯರು ತಿಳಿಹೇಳುವ ಮೂಲಕ ಧರ್ಮಪಾಲನೆ ಅನುಸರಿಸಬೇಕು ಎಂದರು.
ವಿವಿಧೆಡೆಯಿಂದ ಆಗಮಿಸಿದ 26 ಜಂಗಮ ವಟುಗಳಿಗೆ ಶಿವದೀಕ್ಷೆ ನೀಡಿ, ಪ್ರಮಾಣ ಪತ್ರ ನೀಡಲಾಯಿತು. ಜಿಲ್ಲೆಯ ಎಲ್ಲ ತಾಲೂಕಿನಲ್ಲಿ ಇಂತಹ ಶಿವದೀಕ್ಷಾ ಕಾರ್ಯಕ್ರಮಗಳು ಜರುಗಬೇಕು ಎಂದರು.
ಬೆಳಗ್ಗೆ 5 ಗಂಟೆಯ ಬ್ರಾಹ್ಮೀಮಹೂರ್ತದಲ್ಲಿ ವೇ.ರಾಚಯ್ಯನವರ ಓದಿಸೋಮಠ, ವೀರಯ್ಯ ಹಿರೇಮಠ, ಚನ್ನಬಸಯ್ಯ ಹಿರೇಮಠ ನೇತೃತ್ವದಲ್ಲಿ ಶಾಸ್ತ್ರೋಕ್ತವಾಗಿ ಶಿವದೀಕ್ಷೆ ಕಾರ್ಯಕ್ರಮ ನೆರವೇರಿಸಲಾಯಿತು. ಬಳಿಕ ಜಂಗಮ ವಟುಗಳು ಐದೈದು ಮನೆಗಳ ಕೋರಾಣ್ಯ ಭಿಕ್ಷಾಟನೆ ನೆರವೇರಿಸಿದರು.
ಮುಪ್ಪಿನಸ್ವಾಮಿ ಮಠದ ಮಲ್ಲಿಕಾರ್ಜುನ ಶ್ರೀಗಳು, ಧರ್ಮಾಧಿಕಾರಿ ಮಂಜಯ್ಯಸ್ವಾಮಿ ಹಿರೇಮಠ, ವರ್ತಕ ಮೃತ್ಯುಂಜಯ್ಯ ಹಿರೇಮಠ, ರಾಜಶೇಖರ ಹಾಲೇವಾಡಿಮಠ, ಬಸಯ್ಯ ಹಿರೇಮಠ, ಪತ್ರಕರ್ತ ಕರಬಸಯ್ಯ ಬರ್ದೂರಹಿರೇಮಠ, ವಿಜಯ ಕುದರಿಹಾಳಮಠ, ಶೇಖರಗೌಡ್ರ ಕರೇಗೌಡ್ರ, ಲಿಂಗರಾಜ ರಂಗಾರಿ, ಕುಮಾರ ಹಿರೇಮಠ ಇದ್ದರು.
ಸಮಾಜದ ಯುವಮುಖಂಡ ಗಿರೀಶ ಇಂಡಿಮಠ ಮಾತನಾಡಿ, ಪುರಸಭೆ ವ್ಯಾಪ್ತಿಯಲ್ಲಿ ಜಂಗಮ ಸಮಾಜಕ್ಕೆ ನಿವೇಶನ ನೀಡಬೇಕು. ರಾಜ್ಯದಲ್ಲಿ ಜಂಗಮ ಸಮಾಜ ಶೈಕ್ಷಣಿಕ ಹಾಗೂ ಆರ್ಥಿಕವಾಗಿ ಹಿಂದುಳಿದಿದೆ. ಉನ್ನತ ಶಿಕ್ಷಣ ಸೇರಿದಂತೆ ಆರಂಭಿಕ ಶಿಕ್ಷಣಕ್ಕೂ ಶುಲ್ಕ ಭರಿಸಲಾಗುತ್ತಿಲ್ಲ. ಪೌರೋಹಿತ್ಯ, ಪೂಜೆ, ಪುನಸ್ಕಾರಗಳ ಅಲ್ಪ ಆದಾಯದಿಂದ ಕುಟುಂಬವನ್ನು ಮುನ್ನಡೆಸಲು ಸಾಧ್ಯವಾಗುತ್ತಿಲ್ಲ. ಗ್ರಾಮೀಣ ಪ್ರದೇಶದಲ್ಲಿ ಉದ್ಯೋಗ, ಜಮೀನು, ಶಿಕ್ಷಣಗಳಿಂದ ವಂಚಿತಗೊಂಡ ಸಮಾಜದ ಬಂಧುಗಳು ಸಾಮಾಜಿಕವಾಗಿ ಮೇಲ್ವರ್ಗದಲ್ಲಿ ಕಾಣಿಸಿದರೂ, ಅವರ ಬದುಕು ಇಂದಿಗೂ ದುಸ್ಥಿತಿಯಲ್ಲಿದೆ. ಸಣ್ಣಸಣ್ಣ ಸಮಾಜಗಳಿಗೆ ಆದ್ಯತೆ ನೀಡಿದ ಸರ್ಕಾರಗಳು ಜಂಗಮರನ್ನು ಕಡೆಗಣಿಸುತ್ತಿರುವುದು ಸರಿಯಲ್ಲ. ಬಜೆಟ್ನಲ್ಲಿ ಕಡುಬಡತನ ಅನುಭವಿಸುತ್ತಿರುವ ಜಂಗಮ ಸಮಾಜಕ್ಕೆ ಅಭಿವೃದ್ಧಿ ನಿಗಮ ರಚಿಸಬೇಕು. ರಾಜ್ಯಾದ್ಯಂತ ಬೇಡ ಜಂಗಮ ಜಾತಿ ಪ್ರಮಾಣ ಪತ್ರದಲ್ಲಿ ಆಗುತ್ತಿರುವ ಸಮಸ್ಯೆಯನ್ನು ಕೂಡಲೆ ಸರಿಪಡಿಸಬೇಕು ಎಂದು ಆಗ್ರಹಿಸಿದರು.