ಮಂಗಳೂರು: ಬಿಜೆಪಿ ಮುಖಂಡ ಪ್ರವೀಣ್ ನೆಟ್ಟಾರು ಕೊಲೆ ಪ್ರಕರಣ ಕ್ಷಣಕ್ಷಣಕ್ಕೂ ತಿರುವು ಪಡೆದುಕೊಳ್ಳುತ್ತಿದ್ದು, ಇವರ ಹತ್ಯೆಯ ಹಿಂದಿನ ಕಾರಣವನ್ನು ಪೊಲೀಸರು ಹುಡುಕುತ್ತಿದ್ದಾರೆ.
ಇದೀಗ ಈ ಕೊಲೆಗೆ ಹಲಾಲ್ ನಂಟು ಇದೆಯಾ ಎಂಬ ಸಂದೇಹವೊಂದು ನುಸುಳಿ ಬಂದಿದೆ. ಇದಕ್ಕೆ ಕಾರಣ, ಹತ್ಯೆಗೂ ಕೆಲ ದಿನಗಳ ಮುನ್ನ ನಡೆದಿರುವ ಘಟನೆಗಳು ಬೆಳಕಿಗೆ ಬಂದಿರುವುದು. ಅದೇನೆಂದರೆ, ಬೆಳ್ಳಾರೆಯಲ್ಲಿ ಪ್ರವೀಣ್ ನೆಟ್ಟಾರ್ ಚಿಕನ್ ಸೆಂಟರ್ ನಡೆಸುತ್ತಿದ್ದರು. ಇವರ ಚಿಕನ್ ಸೆಂಟರ್ನಲ್ಲಿ ಪ್ರಕರಣದ ಪ್ರಮುಖ ಆರೋಪಿ ಷಫೀಕ್ ತಂದೆ ಇಬ್ರಾಹಿಂ ಕೆಲಸಕ್ಕೆ ಇದ್ದರು.
ಮೂರು ತಿಂಗಳು ಕೆಲಸ ಮಾಡಿ ಆ ನಂತರ ಇಬ್ರಾಹಿಂ ಕೆಲಸ ಬಿಟ್ಟಿದ್ದರು. ಅವರು ಕೆಲಸ ಬಿಡಲು ಕಾರಣ, ಹಲಾಲ್ ಮತ್ತು ಜಟ್ಕಾ ಕಟ್ ವಿವಾದ ಎಂದು ತಿಳಿದುಬಂದಿದೆ. ಇವರಿಬ್ಬರ ನಡುವೆ ಆಗಿರುವ ಹಲಾಲ್ ಮತ್ತು ಜಟ್ಕಾ ವಿವಾದ ಬೆಳೆದು ನಿಂತು ಇಬ್ರಾಹಿಂ ಕೆಲಸ ಬಿಟ್ಟಿರುವುದಾಗಿ ಹೇಳಲಾಗುತ್ತಿದೆ.
ಈ ಘಟನೆ ನಡೆದ ಬಳಿಕ ಪ್ರವೀಣ್ ಕೊಲೆಯಾಗಿದ್ದು ಮಾತ್ರವಲ್ಲದೇ, ಈ ಕೊಲೆಯ ಪ್ರಮುಖ ಆರೋಪಿ ಸ್ಥಾನದಲ್ಲಿ ಇಬ್ರಾಹಿಂ ಅವರ ಮಗನೇ ಇರುವುದರಿಂದ ಇವರ ಹತ್ಯೆಗೂ ಹಲಾಲ್ಗೂ ಸಂಬಂಧ ಇದೆಯೇ ಎಂಬ ಗುಮಾನಿ ಶುರುವಾಗಿದೆ.
ಈ ನಡುವೆ, ಹತ್ಯೆಯಲ್ಲಿ ಬಂಧಿತನಾದ ಆರೋಪಿ ಷಫೀಕ್ ಕೆಲಸ ಮಾಡುತ್ತಿದ್ದ ಅಂಗಡಿಗೆ ಸಾರ್ವಜನಿಕರು ಮುತ್ತಿಗೆ ಹಾಕಿದ್ದಾರೆ. ಸುಳ್ಯ ತಾಲೂಕಿನ ಗುತ್ತಿಗಾರಿನಲ್ಲಿರುವ ಅಡಿಕೆ ಅಂಗಡಿಗೆ ಸಾರ್ವಜನಿಕರು ಮುತ್ತಿಗೆ ಹಾಕಿದ್ದು, ಗಲಾಟೆ ನಡೆಸಿದ್ದಾರೆ.
ಪೋಲೀಸರು ಮಧ್ಯ ಪ್ರವೇಶ ಮಾಡಿ ಗಲಾಟೆ ನಿಯಂತ್ರಿಸಿದ್ದಾರೆ. ಈ ನಡುವೆ ಅಂಗಡಿಗೆ ಬೀಗ ಹಾಕಿ ಅಂಗಡಿ ಮಾಲೀಕರು ತೆರಳಿದ್ದಾರೆ. (ದಿಗ್ವಿಜಯ ನ್ಯೂಸ್)