ಸಕಲೇಶಪುರ: ತಾಲೂಕಿನಲ್ಲಿ ಬಿರುಗಾಳಿ ಸಹಿತ ಭಾರಿ ಮಳೆಗೆ ಜನರು ಮನೆಬಿಟ್ಟು ಹೊರಬಾರದ ಸ್ಥಿತಿ ನಿರ್ಮಾಣವಾಗಿದೆ.
ಶುಕ್ರವಾರ ತಾಲೂಕಿನಲ್ಲಿ ಅಪಾರ ಪ್ರಮಾಣದ ಮಳೆ ಸುರಿದಿದ್ದು ಹೇಮಾವತಿ ನದಿ ಪಟ್ಟಣದಲ್ಲಿ ಅಪಾಯಮಟ್ಟ ಮೀರಿ ಹರಿಯುತ್ತಿದೆ. ಪಟ್ಟಣದ ಆಜಾದ್ ರಸ್ತೆ ಜಲಾವೃತ್ತಗೊಂಡಿದೆ. ತಾಲೂಕು ಆಡಳಿತ ಸ್ಥಳೀಯರನ್ನು ಅಂಬೇಡ್ಕರ್ ಭವನದಲ್ಲಿ ತೆರೆದಿರುವ ಸಾಂತ್ವನ ಕೇಂದ್ರಕ್ಕೆ ತೆರಳುವಂತೆ ಸೂಚಿಸಿದೆ.
ಹೇಮಾವತಿ ನದಿ ನೀರು ಹೊಳೆಮಲ್ಲೇಶ್ವರಸ್ವಾಮಿ ದೇವಸ್ಥಾನದ ಗರ್ಭಗುಡಿ ಪ್ರವೇಶಿಸಿದೆ. ಹೆಬ್ಬಸಾಲೆ ಗ್ರಾಮ ಸಮೀಪ ಹೇಮಾವತಿ ನದಿ ಉಕ್ಕಿಹರಿದ ಪರಿಣಾಮ ಹೆನ್ನಲಿ ಹಾಗೂ ಹೆಬ್ಬಸಾಲೆ ಗ್ರಾಮಗಳ ಸಂಚಾರ ಗುರುವಾರದಿಂದಲೇ ಬಂದ್ ಆಗಿದೆ. ಪಟ್ಟಣದಲ್ಲಿ 13 ಅಡಿಯಷ್ಟು ನದಿ ನೀರು ಹರಿಯುತ್ತಿದೆ. ಜಾನೇಕೆರೆಹಳ್ಳ ಸಹ ಸಮೀಪದ ಭತ್ತದ ಗದ್ದೆಗಳಿಗೆ ಅವರಿಸಿದ್ದರೆ, ಕುಂಟಹಳ್ಳಿ ಹೊಳೆ ಅಪಾಯ ಮಟ್ಟ ಮೀರಿ ಹರಿಯುತ್ತಿದ್ದು ಕುಂಟಹಳ್ಳಿ-ಹೊಡಚಹಳ್ಳಿ ರಸ್ತೆ ಮುಳುಗಡೆಯಾಗಿದೆ. ಪಾಲಹಳ್ಳಿ ಹೊಳೆ ನೀರು ನೂರಾರು ಎಕರೆ ಭತ್ತದ ಗದ್ದೆಗಳನ್ನು ಜಲಾವೃತಗೊಳಿಸಿದೆ. ಐಗೂರು ಹೊಳೆ ಉಕ್ಕಿ ಹರಿಯುತ್ತಿದೆ. ಭತ್ತದ ಗದ್ದೆಗಳು ಕೆರೆಗಳಂತಾಗಿವೆ.
ರಸ್ತೆ ಸಂಪರ್ಕ ಬಂದ್
ಪಟ್ಟಣದಿಂದ ನಡಹಳ್ಳಿ ಸಂಪರ್ಕ ಕಲ್ಪಿಸುವ ರಸ್ತೆಯ ಮಣ್ಣು ಮಳೆ ನೀರಿಗೆ ಕೊಚ್ಚಿ ಹೋಗಿದ್ದು ರಸ್ತೆ ಅಪಾಯದ ಸ್ಥಿತಿ ತಲುಪಿದೆ. ಹಾಗಾಗಿ ವಾಹನ ಸಂಚಾರ ನಿಷೇಧಿಸಲಾಗಿದೆ. ಪರಿಣಾಮ ನಡಹಳ್ಳಿ, ಮಲ್ಲೆಗದ್ದೆ, ದೇಖ್ಲಾ ಗ್ರಾಮಸ್ಥರ ಸಂಚಾರಕ್ಕೆ ತೊಂದರೆಯಾಗಿದೆ. ಮಣ್ಣು ಕುಸಿದು ರಸ್ತೆ ಹಾಳಾಗಲು ಎತ್ತಿನಹೊಳೆ ಯೋಜನೆಯ ಅಧಿಕಾರಿಗಳೇ ಕಾರಣ ಎಂದು ಆರೋಪಿಸಿ ಗ್ರಾಮಸ್ಥರು ಶುಕ್ರವಾರ ಉಪವಿಭಾಗಾಧಿಕಾರಿ ಕಚೇರಿ ಎದುರು ಪ್ರತಿಭಟಿಸಿ ಉಪವಿಭಾಗಾಧಿಕಾರಿ ಶ್ರುತಿ ಅವರಿಗೆ ಮನವಿ ಸಲ್ಲಿಸಿದರು.
ಶುಂಠಿ ಬೆಳೆನಾಶ:
ತಾಲೂಕಿನ ಹಲವೆಡೆ 210 ಹೇಕ್ಟರ್ ಪ್ರದೇಶದಲ್ಲಿ ಶುಂಠಿ ಬೆಳೆದಿದ್ದು ಮಳೆಗೆ ಕೊಳೆರೋಗ ಆವರಿಸಿದೆ. ಈಗಾಗಲೇ ತಾಲೂಕಿನ ಬಹುತೇಕ ಕಾಫಿತೋಟಗಳಲ್ಲಿ ಕೊಳೆ ರೋಗ ಕಾಡುತ್ತಿದ್ದು ಪ್ರತಿ ಕಾಫಿ ಗಿಡದ ಬುಡದಲ್ಲಿ ಹತ್ತಾರು ಕೆಜಿ ಕಾಫಿ ನೆಲ ಸೇರಿದೆ. ಮಳೆ ಹೀಗೆ ಮುಂದುವರಿದರೆ ಅಡಕೆ, ಮೆಣಸಿಗೂ ಕೊಳೆ ರೋಗ ಹರಡುವುದು ನಿಶ್ಚಿತ. ತಾಲೂಕಿನ ಹೆತ್ತೂರು, ಹಾನುಬಾಳ್ ಹೋಬಳಿಯಲ್ಲಿ 150 ಇಂಚು (3,500 ಮಿ.ಮೀಟರ್) ಮಳೆಯಾಗಿದ್ದು ಈ ಭಾಗದಲ್ಲಿ ಕಾಫಿ ಗಿಡದ ಎಲೆಗಳು ಉದುರುತ್ತಿದ್ದು ಬೆಳೆಗಾರರು ಮಳೆ ನಿಂತರೆ ಸಾಕು ಎನ್ನುವಂತಾಗಿದೆ.