ಹಸಿರು ಬಣ್ಣಕ್ಕೆ ತಿರುಗಿದ ತುಂಗಭದ್ರಾ ನೀರು

ಮುಂಡರಗಿ: ತಾಲೂಕಿನ ಗಂಗಾಪುರ, ಕೊರ್ಲಹಳ್ಳಿ, ಶೀರನಹಳ್ಳಿ ಭಾಗದ ತುಂಗಭದ್ರಾ ನದಿ ನೀರು ಹಸಿರು ಬಣ್ಣಕ್ಕೆ ತಿರುಗುತ್ತಿದ್ದು, ಇದರಿಂದ ನದಿ ನೀರು ಬಳಸುವ ಜನರಲ್ಲಿ ಆತಂಕ ಮೂಡಿಸಿದೆ.

ಈ ಭಾಗದಲ್ಲಿ ಕೃಷಿಗೆ ನದಿ ನೀರು ಬಳಸಲಾಗುತ್ತದೆ. ಕೆಲವೆಡೆ ನದಿ ಮಧ್ಯಭಾಗದಲ್ಲಿರುವ ನೀರು ಅಷ್ಟೊಂದು ಹಸಿರು ಕಾಣದಿದ್ದರೂ ದಡದಲ್ಲಿ ನೀರು ಪಾಚಿಗೊಂಡು ಹಚ್ಚ ಹಸಿರಿನಿಂದ ಕಾಣುತ್ತಿದೆ. ಸಿಂಗಟಾಲೂರು ಬ್ಯಾರೇಜ್​ನಿಂದ ನದಿಗೆ ನೀರು ಹರಿಸುವುದನ್ನು ಸಂಪೂರ್ಣ ನಿಲ್ಲಿಸಲಾಗಿದೆ. ನದಿಯಲ್ಲಿ ನೀರು ಹರಿಯುವಾಗ ಹಸಿರು ಬಣ್ಣದ ನೀರು ಕಾಣುವುದಿಲ್ಲ. ಹರಿವು ನಿಂತಾಗ ನೀರು ಹಸಿರು ಬಣ್ಣಕ್ಕೆ ತಿರುಗುತ್ತಿದೆ.

ನದಿಯಿಂದ ಪಂಪ್​ಸೆಟ್​ಗಳ ಮೂಲಕ ಜಮೀನಿಗೆ ಹರಿದು ಬರುವ ನೀರು ಹಸಿರಾಗಿದೆ. ಇದರಿಂದ ಭತ್ತದ ಸಸಿಗಳು ನಾಶವಾಗುವ ಹಾಗೂ ಇತರ ಬೆಳೆ ಹಾನಿಯಾಗುವ ಆತಂಕವನ್ನು ರೈತರು ವ್ಯಕ್ತಪಡಿಸುತ್ತಿದ್ದಾರೆ. ಪಶುಗಳಿಗೆ ನದಿ ನೀರು ಕುಡಿಸುವುದರಿಂದ ಅನಾರೋಗ್ಯ ಕಾಡುವ ಭಯ ಮನೆ ಮಾಡಿದೆ. ಇನ್ನೂ ಜಲಚರಗಳಿಗೆ ತೊಂದರೆಯಾಗುವ ಸಂಭವ ಹೆಚ್ಚಿದೆ. ಬೇಸಿಗೆ ಆರಂಭಕ್ಕೂ ಪೂರ್ವದಲ್ಲಿಯೇ ನೀರು ಹಸಿರು ಪಾಚಿಯಂತೆ ಕೂಡಿದ್ದು ಚಿಂತೆಗೀಡು ಮಾಡಿದೆ.

ಸಿಂಗಟಾಲೂರು ಬ್ಯಾರೇಜ್ ಕೆಳಗಡೆಯ ಈ ಭಾಗದಲ್ಲಿ ನೀರು ಹಸಿರಾಗಿ ಕಾಣುತ್ತಿದೆ. ಬ್ಯಾರೇಜ್​ನ ಹಿನ್ನೀರು ಭಾಗದಲ್ಲಿ ಮಾತ್ರ ಹಸಿರು ಆಗಿಲ್ಲ. ಆದ್ದರಿಂದ ಈ ಭಾಗದ ನೀರನ್ನು ಪರೀಕ್ಷಿಸಬೇಕು ಎಂದು ಕೊರ್ಲಹಳ್ಳಿ ಗ್ರಾಮದ ತಿಪ್ಪೇಶ ಮಡಿವಾಳರ ಒತ್ತಾಯಿಸಿದ್ದಾರೆ.

ಪರೀಕ್ಷಿಸಿ ಬಳಸುವುದು ಒಳಿತು: ಹಸಿರು ಬಣ್ಣಕ್ಕೆ ತಿರುಗಿದ ನೀರನ್ನು ನೇರವಾಗಿ ಕುಡಿಯಬಾರದು. ನೇರವಾಗಿ ಕುಡಿಯುವುದರಿಂದ ವಾಂತಿ, ಭೇದಿ, ನೆಗಡಿ, ಕೆಮ್ಮು ರೋಗಕ್ಕೆ ತುತ್ತಾಗಬೇಕಾಗುತ್ತದೆ. ಇಂತಹ ನೀರನ್ನು ಸರಿಯಾಗಿ ಶುದ್ಧೀಕರಿಸಿ ಅದು ಕುಡಿಯುವುದಕ್ಕೆ ಯೋಗ್ಯವಿದೆ ಎಂದಾಗ ಮಾತ್ರ ಕುಡಿಯಬೇಕು ಎಂದು ತಾಲೂಕು ಆರೋಗ್ಯಾಧಿಕಾರಿ ಡಾ.ಲಕ್ಷ್ಮಣ ಪೂಜಾರ ತಿಳಿಸಿದರು.