ಕಾರವಾರ: ನಗರದ ನಿವೃತ್ತ ಎಎಸ್ಐ ಸುರೇಶ ತಾಮಸೆ ಸಾವಿನ ಪ್ರಕರಣ ತಿರುವು ಪಡೆದುಕೊಂಡಿದೆ. ಅಪಘಾತ ಪ್ರಕರಣವೀಗ ಕೊಲೆಯ ಪ್ರಕರಣವಾಗಿ ಮಾರ್ಪಟ್ಟಿದೆ. ಎಫ್ಐಆರ್ ಸಂಚಾರಿ ಠಾಣೆಯಿಂದ ಶಹರ ಠಾಣೆಗೆ ವರ್ಗಾವಣೆಗೊಂಡಿದೆ.
ಸದಾಶಿವಗಡ ನಿವಾಸಿ ನಿವೃತ್ತ ಎಎಸ್ಐ ಸುರೇಶ ಹರಿ ತಾಮಸೆ ಅವರು ಜ.18 ರಂದು ಭದ್ರಾ ಹೋಟೆಲ್ ಎದುರು ಬೈಕ್ನಿಂದ ಬಿದ್ದು ಗಾಯಗೊಂಡಿರುವ ಬಗ್ಗೆ ಸಂಚಾರ ಠಾಣೆಯಲ್ಲಿ ದೂರು ದಾಖಲಾಗಿತ್ತು. ಮೊದಲು ಮಂಗಳೂರು ನಂತರ ಕಾರವಾರ ಕ್ರಿಮ್ಸ್ನಲ್ಲಿ ಅವರನ್ನು ದಾಖಲಿಸಲಾಗಿತ್ತು. ಆದರೆ, ಅವರು ಚಿಕಿತ್ಸೆಗೆ ಸ್ಪಂದಿಸದೇ ಫೆ. 11 ರ ರಾತ್ರಿ ಮೃತಪಟ್ಟಿದ್ದರು. ಆಸ್ಪತ್ರೆಯಿಂದ ಬಂದ ಮಾಹಿತಿ ಆಧರಿಸಿ ಸಂಚಾರ ಠಾಣೆಯಲ್ಲಿ ಐಪಿಸಿ ಸೆಕ್ಷನ್ 279 ಅಡಿ ನಿರ್ಲಕ್ಷ್ಯದ ಚಾಲನೆ ಹಾಗೂ 304(ಎ) ಅಡಿ ಅಪಘಾತದಿಂದ ಸಾವಾಗಿರುವ ಬಗ್ಗೆ ದೂರು ದಾಖಲಾಗಿತ್ತು.
ಭಾನುವಾರ ಮೃತರ ಮಗಳು ಪ್ರತಿಮಾ ಶಹರ ಠಾಣೆಗೆ ದೂರೊಂದನ್ನು ನೀಡಿದ್ದು, ಸುರೇಶ ಅವರನ್ನು ಅಪರಿಚಿತರು ತಳ್ಳಿ ಗಾಯಗೊಳಿಸಿದ್ದರು ಎಂದು ದೂರಿದ್ದಾರೆ. ಪೊಲೀಸರು ಖಾಸಗಿ ಹೋಟೆಲ್ ಸಿಸಿ ಕ್ಯಾಮರಾದ ದೃಶ್ಯಾವಳಿಗಳನ್ನು ತೆಗೆದು ಪರಿಶೀಲಿಸಿದಾಗ ಜ.18 ರಂದು ರಾತ್ರಿ ತಾಮಸೆ ಅವರ ಮೇಲೆ ಕೆಲವರು ಹಲ್ಲೆ ನಡೆಸಿದ್ದು ಕಂಡುಬಂದಿದೆ. ಹಾಗಾಗಿ ಪ್ರಕರಣವನ್ನು ಶಹರ ಠಾಣೆಗೆ ಹಸ್ತಾಂತರಿಸಿಕೊಂಡು ಐಪಿಸಿ ಸೆಕ್ಷನ್ 302 ಅಡಿ ಕೊಲೆ ಪ್ರಕರಣ ದಾಖಲಿಸಿಕೊಳ್ಳಲಾಗಿದೆ.
ಈ ಕುರಿತು ನ್ಯಾಯಾಲಯಕ್ಕೆ ಸಲ್ಲಿಕೆಯಾಗಿರುವ ಎಫ್ಐಆರ್ನಲ್ಲಿ ಹೆಚ್ಚಿನ ಮಾಹಿತಿ ಸೇರಿಸಲು ಅನುಮತಿ ಕೋರಲಾಗಿದೆ. ಆರೋಪಿಗಳ ಬಂಧನಕ್ಕೆ ಬಲೆ ಬೀಸಲಾಗಿದೆ. ಬಾರ್ನಲ್ಲಿ ರಾತ್ರಿ ಮದ್ಯ ಸೇವನೆಗೆ ಬಂದಿದ್ದ ಸಂದರ್ಭದಲ್ಲಿ ಸುರೇಶ ತಾಮಸೆ ಹಾಗೂ ಅವರ ಪರಿಚಯಸ್ಥರ ನಡುವೆಯೇ ಗಲಾಟೆ ನಡೆದಿತ್ತು ಎನ್ನಲಾಗಿದೆ. ಆಗ ಅವರ ಮೇಲೆ ಹಲ್ಲೆ ನಡೆದಿತ್ತು ಎನ್ನಲಾಗಿದೆ.