ಗ್ರೀನ್ ಕ್ಯಾಂಪಸ್​ಗೆ ಮರು ಟೆಂಡರ್

ಸಂತೋಷ ವೈದ್ಯ ಹುಬ್ಬಳ್ಳಿ

ಹು-ಧಾ ಸ್ಮಾರ್ಟ್ ಸಿಟಿ ಯೋಜನೆಯಡಿ ಗ್ರೀನ್ ಕ್ಯಾಂಪಸ್ ನಿರ್ವಣಕ್ಕೆ ಮತ್ತೊಮ್ಮೆ ಟೆಂಡರ್ ಕರೆಯಲಾಗಿದೆ. 5 ಕೋಟಿ ರೂ. ವೆಚ್ಚದ ಈ ಕಾಮಗಾರಿಗೆ ಇದೀಗ 3ನೇ ಬಾರಿ ಟೆಂಡರ್ ಕರೆಯುತ್ತಿರುವುದು. ಸ್ಮಾರ್ಟ್ ಸಿಟಿ ಯೋಜನೆಯ ಕಾಮಗಾರಿಗಳು ಮರು ಟೆಂಡರ್​ಗೆ ಹೋಗುತ್ತಿರುವುದು ಇದೇ ಮೊದಲಲ್ಲ. ಇಲ್ಲಿ ಹೀಗೆ ಆಗುವುದು ಸಾಮಾನ್ಯ ಪ್ರಕ್ರಿಯೆ ಎಂಬಂತಾಗಿದೆ.

ಗ್ರೀನ್ ಕ್ಯಾಂಪಸ್​ಗೆ ಮೊದಲ ಬಾರಿ ಟೆಂಡರ್ ಕರೆದಾಗ ಯಾರೂ ಭಾಗವಹಿಸಿರಲಿಲ್ಲ. 2ನೇ ಬಾರಿ ಟೆಂಡರ್ ಕರೆದಾಗ ಮೂವರು ಭಾಗವಹಿಸಿದ್ದರೂ ಯಾರಿಗೂ ಅರ್ಹತೆ ಇರಲಿಲ್ಲ. ಹಾಗಾಗಿ ಇದೀಗ 3ನೇ ಬಾರಿ ಟೆಂಡರ್ ಕರೆಯಲಾಗಿದೆ.

ರೂಫ್ ಟಾಪ್ ಸೋಲಾರ್, ಎಲ್​ಇಡಿ ಬೀದಿ ದೀಪ, ಬೈಕ್ ಶೇರಿಂಗ್, ಇತ್ಯಾದಿ ಕಾಮಗಾರಿಗಳು ಹಲವು ಬಾರಿ ಟೆಂಡರ್ ಪ್ರಕ್ರಿಯೆಗೆ ಒಳಪಟ್ಟಿವೆ. ಈಗಲೂ ಕೆಲವು ಕಾಮಗಾರಿಗಳು ಕಾರ್ಯಾನುಷ್ಠಾನಕ್ಕೆ ಬಂದಿಲ್ಲ. ಇದರಿಂದ ಹು-ಧಾ ಸ್ಮಾರ್ಟ್ ಸಿಟಿ ಯೋಜನೆಯು ಸಾಧ್ಯತಾ ವರದಿ, ಡಿಪಿಆರ್, ಟೆಂಡರ್ ಪ್ರಕ್ರಿಯೆಯಲ್ಲಿಯೇ ಕಾಲಹರಣವಾಗುತ್ತಿದೆಯೆಂಬ ಆಕ್ಷೇಪವನ್ನು ಹೊತ್ತುಕೊಂಡಿದೆ. ಒಂದಕ್ಕೊಂದು ಹೊಂದಿಕೊಂಡಿರುವ ಹು-ಧಾ ಮಹಾನಗರ ಪಾಲಿಕೆಯ ಕೇಂದ್ರ ಕಚೇರಿ, ಚಿಟಗುಪ್ಪಿ ಆಸ್ಪತ್ರೆ ಹಾಗೂ ಲ್ಯಾಮಿಂಗ್ಟನ್ ಶಾಲೆ ಗ್ರೀನ್ ಕ್ಯಾಂಪಸ್ ಯೋಜನೆ ವ್ಯಾಪ್ತಿಗೆ ಬರಲಿದೆ. ಇಲ್ಲಿಯ ಕಟ್ಟಡಗಳ ಮೇಲೆ ಸೌರ ಫಲಕ ಅಳವಡಿಸಿ ಸೌರ ವಿದ್ಯುತ್ ಉತ್ಪಾದನೆ ಮಾಡಲಾಗುವುದು. ಇಲ್ಲಿಯ ದೈನಂದಿನ ಕೆಲಸ ಕಾರ್ಯಗಳಿಗೆ ಬೇಕಾಗುವ ವಿದ್ಯುತ್​ಗೆ ಗರಿಷ್ಠ ಮಟ್ಟದಲ್ಲಿ ಸೌರಶಕ್ತಿಯನ್ನೇ ಅವಲಂಬಿಸುವುದು. ಮಳೆ ನೀರು ಸಂಗ್ರಹ, ಹಸಿರೀಕರಣ, ಲ್ಯಾಂಡ್ ಸ್ಕೇಪಿಂಗ್, ಘನತ್ಯಾಜ್ಯ ನಿರ್ವಹಣೆಯನ್ನು ಸಮರ್ಪಕವಾಗಿ ನಿರ್ವಹಿಸುವುದು ಈ ಯೋಜನೆಯ ಭಾಗವಾಗಿದೆ. ಇದು ಪರಿಸರ ಸ್ನೇಹಿ ಕ್ರಮವಾಗಿದೆ. 18 ತಿಂಗಳು ಕಾಮಗಾರಿ ಅನುಷ್ಠಾನ, ಬಳಿಕ 5 ವರ್ಷ ಕಾರ್ಯಾಚರಣೆ ಹಾಗೂ ನಿರ್ವಹಣೆ ಅವಧಿಯಾಗಿದೆ.

ನಾಲ್ಕು ಭಿನ್ನವಾದ ಕೆಲಸಗಳನ್ನು ಒಬ್ಬರೇ ನಿರ್ವಹಿಸಬೇಕಾಗಿರುವುದು ಈ ಯೋಜನೆಯ ಜಟಿಲ ಸಂಗತಿಯಾಗಿದೆ. ಜತೆಗೆ ಕಾಮಗಾರಿ ನಿರ್ವಹಿಸುವ ಗುತ್ತಿಗೆದಾರರು ನ್ಯಾಷನಲ್ ಗ್ರೀನ್ ಬಿಲ್ಡಿಂಗ್ ಸರ್ಟಿಫಿಕೇಶನ್ (ಎನ್​ಜಿಬಿಸಿ) ಹೊಂದಿರಬೇಕು. ಈ ಮಾನ್ಯತೆ ಹೊಂದಿರುವವರು ಬಹಳ ವಿರಳ. ಪುಣೆ, ಹೈದರಾಬಾದ್, ದೆಹಲಿ, ಇನ್ನಿತರ ಮಹಾನಗರಗಳಲ್ಲಿ ಇರುತ್ತಾರೆ. ಹು-ಧಾ ಸ್ಮಾರ್ಟ್ ಸಿಟಿ ಲಿಮಿಟೆಡ್​ನ ಎಲ್ಲ ಟೆಂಡರ್​ಗಳು ಇ-ಪೋರ್ಟಲ್​ನಲ್ಲಿ ಪ್ರಕಟಿಸುವುದರಿಂದ ಜಾಗತಿಕವಾಗಿ ಗಮನಕ್ಕೆ ಬರುತ್ತದೆ. ಆದರೆ, ಗ್ರೀನ್ ಕ್ಯಾಂಪಸ್​ಗೆ ಆಸಕ್ತಿ ತೋರಿಸಿರುವವರು ಕಡಿಮೆ. ಆದರೂ ಹು-ಧಾ ಸ್ಮಾರ್ಟ್ ಸಿಟಿ ಲಿಮಿಟೆಡ್ ಛಲ ಬಿಡದೇ 3ನೇ ಬಾರಿ ಟೆಂಡರ್ ಕರೆದಿದೆ.

ಸ್ಮಾರ್ಟ್ ಸಿಟಿ ಯೋಜನೆಯಡಿ ಆಯ್ಕೆಯಾಗಿರುವ ರಾಜ್ಯದ 7 ನಗರಗಳಲ್ಲಿ ಯಾವ ನಗರವು ಗ್ರೀನ್ ಕ್ಯಾಂಪಸ್ ಉಪಕ್ರಮಕ್ಕೆ ಮುಂದಾಗಿಲ್ಲ. ದೇಶದ ವಿವಿಧೆಡೆ ಕೆಲ ವಿಶ್ವವಿದ್ಯಾಲಯಗಳು, ಕಂಪನಿಗಳು ಇದನ್ನು ಅಳವಡಿಸಿಕೊಂಡಿದೆ. ಇವುಗಳಿಗೆ ನ್ಯಾಷನಲ್ ಗ್ರೀನ್ ಬಿಲ್ಡಿಂಗ್ ಕೌನ್ಸಿಲ್ ರೇಟಿಂಗ್ ನೀಡಿವೆ.