ವಿಜಯವಾಣಿ ಸುದ್ದಿಜಾಲ ಧಾರವಾಡ
ಪಲ್ಮನೇರಿ ಅಲ್ವಿಯೋಲಾರ್ ಪ್ರೋಟಿನೋಸಿಸ್ (ಪಿಎಪಿ) ಎಂಬ ಶ್ವಾಸಕೋಶದ ಅಪರೂಪದ ಕಾಯಿಲೆಯಿಂದ ಬಳಲುತ್ತಿದ್ದ ವ್ಯಕ್ತಿಗೆ ನಗರದ ಎಸ್ಡಿಎಂ ಆಸ್ಪತ್ರೆ ವೈದ್ಯರು ಯಶಸ್ವಿ ಚಿಕಿತ್ಸೆ ನೀಡುವ ಮೂಲಕ ಮಹತ್ತರ ಸಾಧನೆ ಮಾಡಿದ್ದಾರೆ.
45 ವರ್ಷದ ಹಾವೇರಿ ಮೂಲದ ರೋಗಿಯು ಫೆಬ್ರವರಿಯಲ್ಲಿ ತೀವ್ರ ಉಸಿರಾಟದ ತೊಂದರೆಯಿಂದ ಎಸ್ಡಿಎಂ ಆಸ್ಪತ್ರೆ ತೀವ್ರ ನಿಗಾ ಘಟಕದಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದರು. ಆದರೆ ಆರೋಗ್ಯದಲ್ಲಿ ಸುಧಾರಣೆ ಕಾಣದ್ದಕ್ಕೆ ಹೆಚ್ಚಿನ ತಪಾಸಣೆ ನಡೆಸಿದಾಗ ಪಿಎಪಿ ಎಂಬ ಅಪರೂಪದ ಕಾಯಿಲೆ ಪತ್ತೆಯಾಗಿದೆ.
ಕಾಯಿಲೆಗೆ ಹೊಲ್ ಲಂಗ್ ಲಾವಾಜೆ ವಿಧಾನ ಮೂಲಕ ಚಿಕಿತ್ಸೆ ನೀಡಲಾಗಿದೆ. ಬಳಿಕ ರೋಗಿಯನ್ನು ವೆಂಟಿಲೇಟರ್ನಿಂದ ಹೊರತೆಗೆದು ಸಂಪೂರ್ಣ ಚೇತರಿಸಿಕೊಳ್ಳುವಂತೆ ಮಾಡಲಾಗಿದೆ. ಇಂತಹ ಅಪರೂಪದ ಕಾಯಿಲೆಗೆ ಉತ್ತರ ಕರ್ನಾಟಕದಲ್ಲಿ ಪ್ರಥಮ ಬಾರಿಗೆ ಯಶಸ್ವಿ ಚಿಕಿತ್ಸೆ ನೀಡಿರುವುದು ವಿಶೇಷ.
ಪಿಎಪಿ ಎಂಬುದು ಶ್ವಾಸಕೋಶದ ಅಪರೂಪದ ಕಾಯಿಲೆಗಳಲ್ಲಿ ಒಂದು. ಪ್ರತಿ 10 ಲಕ್ಷ ಜನರಲ್ಲಿ 1-2 ಜನರಲ್ಲಿ ಕಾಣಿಸಿಕೊಳ್ಳುತ್ತದೆ. ಹೆಚ್ಚಾಗಿ ಮಧ್ಯಮ ವಯಸ್ಸಿನ, ಅದರಲ್ಲೂ ಗಂಡಸರಲ್ಲಿ ಕಂಡುಬರುತ್ತದೆ. ಕಾಯಿಲೆಯಿಂದ ಬಳಲುವವರಿಗೆ ಉಸಿರಾಟ ಸಮಸ್ಯೆ, ಒಣ ಕೆಮ್ಮು, ಆಯಾಸ ಹಾಗೂ ಸಲ್ಪ ಮಟ್ಟಿಗೆ ಜ್ವರ ಕಾಣಿಸಿಕೊಳ್ಳಬಹುದು. ಕಾಯಿಲೆಯಲ್ಲಿ ಶ್ವಾಸಕೋಶದ ಅಲ್ವಿಯೋಲ್ಯೆಗಳಲ್ಲಿ ಅತಿಯಾದ ಸರಫ್ಯೆಕ್ಟೆಂಟ್ ಎಂಬ ಅಂಶ ತುಂಬಿಕೊಳ್ಳುತ್ತದೆ. ಕಾಯಿಲೆಯನ್ನು ಬ್ರಾಂಕೋಸ್ಕೊಪಿ ಮೂಲಕ ಪತ್ತೆಹಚ್ಚಿ ಹೊಲ್ ಲಂಗ್ ಲಾವಾಜೆ ವಿಧಾನದ ಮೂಲಕ ಚಿಕಿತ್ಸೆ ನೀಡಬಹುದು.
ಇಂತಹ ಅಪರೂಪದ ಸಾಧನೆ ಮಾಡಿದ ವೈದ್ಯರಾದ ಡಾ. ಸಂಜಯ ಎಸ್. (ಶ್ವಾಸಕೋಶ ತಜ್ಞ), ಡಾ. ಗುಣವತಿ, ಡಾ. ನಾಗೇಶ ಜಕರೆಡ್ಡಿ (ತೀವ್ರ ನಿಗಾ ಘಟಕ ತಜ್ಞ) ಕಾರ್ಯಕ್ಕೆ ಎಸ್ಡಿಎಂ ವಿವಿ ಉಪಕುಲಪತಿ ಡಾ. ನಿರಂಜನ್ಕುಮಾರ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.