ಮಿತಿಮೀರಿದ ಟೋಲ್​ ಪ್ಲಾಜಾ ಸಿಬ್ಬಂದಿ ದುರ್ವರ್ತನೆ ಪ್ರತಿನಿತ್ಯ ವಾಹನ ಸವಾರರು, ಮಾಲೀಕರಿರೊಂದಿಗೆ ಕಿರಿಕಿರಿ ಹೆದ್ದಾರಿ ಪ್ರಾಧಿಕಾರದ ಅಧಿಕಾರಿಗಳ ಮೌನ

ಚೇತನ್​ ಚಕ್ಕೆರೆ ಬಿಡದಿ

ಬೆಂಗಳೂರು ಮತ್ತು ಮೈಸೂರು ಹೆದ್ದಾರಿಯ ಟೋಲ್​ ಪ್ಲಾಜಾಗಳಲ್ಲಿ ಪ್ರತಿನಿತ್ಯ ಒಂದಲ್ಲಾ ಒಂದು ಕಿರಿಕ್​ ನಡೆಯುತ್ತಲೇ ಇದೆ. ಅದರಲ್ಲೂ ಟೋಲ್​ ಪ್ಲಾಜಾ ಸಿಬ್ಬಂದಿ ದುರ್ನಡತೆಯಿಂದಾಗಿ ವಾಹನ ಚಾಲಕರು, ಮಾಲೀಕರು ಕಿರಿಕಿರಿ ಅನುಭವಿಸುವಂತಾಗಿದೆ.

ಬೆಂಗಳೂರಿನಿಂದ ಮೈಸೂರಿಗೆ ತೆರಳುವ ವಾಹನಗಳು ಕಣಮಿಣಕಿ ಟೋಲ್​ನಲ್ಲಿ ಹಣ ಕಟ್ಟಬೇಕಿದೆ. ಮೈಸೂರಿನಿಂದ ಬೆಂಗಳೂರಿಗೆ ಬರುವ ವಾಹನಗಳು ಶೇಷಗಿರಿಹಳ್ಳಿ ಟೋಲ್​ ಬಳಿ ಹಣ ಪಾವತಿ ಮಾಡಬೇಕಿದೆ. ಪ್ರತಿ ಟೋಲ್​ನಲ್ಲಿ 11 ಲೇನ್​ಗಳಿದ್ದು ಅಷ್ಟೂ ಕಡೆ ವಾಹನಗಳು ಸಂಚರಿಸಬಹುದಾಗಿದೆ. ಕೆಲವು ವಾಹನಗಳಲ್ಲಿ ಫಾಸ್ಟ್​ಟ್ಯಾಗ್​ ಇದ್ದರೂ ಟೋಲ್​ನ ತಾಂತ್ರಿಕ ಸಮಸ್ಯೆಯಿಂದಾಗಿ ಸ್ಕ್ಯಾನ್ ಆಗುತ್ತಿಲ್ಲ. ಸಮಸ್ಯೆ ಟೋಲ್​ನವರದ್ದಾಗಿದ್ದರೂ ಸಿಬ್ಬಂದಿ ವಾಹನ ಸವಾರರ ಜತೆ ಹಣಕ್ಕಾಗಿ ಗಲಾಟೆ ಮಾಡುತ್ತಾರೆ. ಫಾಸ್ಟ್​ಟ್ಯಾಗ್​ ಸ್ಕ್ಯಾನ್ ​ ಆಗುತ್ತಿಲ್ಲ  ಹಾಗಾಗಿ ನಿಗದಿತ ಶುಲ್ಕದ ದುಪ್ಪಟ್ಟು ಹಣ ನೀಡಿ ಹೋಗಿ ಎಂದು ಆವಾಜ್​ ಹಾಕಿ ಗೂಂಡಾ ವರ್ತನೆ ತೋರಿರುವ ಸಾಕಷ್ಟು ಉದಾಹರಣೆಗಳಿವೆ.

ಅಧಿಕಾರಿಗಳ ಮೌನ?

ಟೋಲ್​ ಗೇಟ್​ಗಳ ಬಳಿ ಸಣ್ಣ ಪುಟ್ಟ ಸಮಸ್ಯೆಗಳಿಗೆ ಗಲಾಟೆ ನಡೆಯುತ್ತಿದೆ ಎಂದು ಗೊತ್ತಿದ್ದರೂ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರದ ಅಧಿಕಾರಿಗಳಾಗಲಿ ಟೋಲ್​ ಸಂಗ್ರಹದ ಗುತ್ತಿಗೆ ಕಂಪನಿ ಅಧಿಕಾರಿಗಳಾಗಲಿ ಸಮಸ್ಯೆ ಬಗೆಹರಿಸುವ ಗೋಜಿಗೆ ಹೋಗುತ್ತಿಲ್ಲ. ಹಲವು ಪ್ರಕರಣಗಳಲ್ಲಿ ಟೋಲ್​ ಸಿಬ್ಬಂದಿಯದ್ದೇ ತಪ್ಪಿದ್ದರೂ ಅವರಿಗೆ ಬುದ್ದಿವಾದ ಹೇಳಿ ವಾಹನ ಸವಾರರ ಜತೆಗೆ ಸೌಜನ್ಯದಿಂದ ನಡೆದುಕೊಳ್ಳುವಂತೆ ತಿಳಿಹೇಳುವ ಕೆಲಸಕ್ಕೂ ಮುಂದಾಗುತ್ತಿಲ್ಲ.

ಅಹಿತಕರ ಘಟನೆಗಳು

ಹೆದ್ದಾರಿಯಲ್ಲಿ ಟೋಲ್​ ಪ್ರಾರಂಭವಾಗಿ ವರ್ಷ ಕಳೆದಿಲ್ಲ, ಅದಾಗಲೇ ಹಲವು ಅಹಿತಕರ ಘಟನೆಗಳು ಟೋಲ್​ ಪ್ಲಾಜಾಗಳ ಬಳಿ ನಡೆದು ಹೋಗಿವೆ. ಹಣ ಪಡೆಯುವ ವಿಚಾರದಲ್ಲಿ ಹಾಗೂ ಸಿಬ್ಬಂದಿ ಮಾತಿನಲ್ಲಿ ಹಿಡಿತವಿಲ್ಲದ ಕಾರಣದಿಂದಾಗಿ ಗಲಾಟೆಗಳು ನಡೆದಿವೆ. ಫಾಸ್ಟ್​ಟ್ಯಾಗ್​ ಸ್ಕ್ಯಾನ್​ ಆಗದ ವಿಚಾರದಲ್ಲಿ ಸಿಬ್ಬಂದಿ ಹಾಗೂ ವಾಹನ ಸವಾರರ ನಡುವೆ ಗಲಾಟೆ ನಡೆದು ವಿಕೋಪಕ್ಕೆ ತಿರುಗಿ ಟೋಲ್​ ಸಿಬ್ಬಂದಿಯನ್ನೇ ಕೊಲೆ ಮಾಡಿರುವ ಘಟನೆ ಕೂಡ ನಡೆದಿದೆ. ಮತ್ತೊಂದು ಘಟನೆಯಲ್ಲಿ ಮಳವಳ್ಳಿ ಶಾಸಕ ನರೇಂದ್ರ ಸ್ವಾಮಿ ಅವರ ಕಾರು ತಡೆದ ಟೋಲ್​ ಸಿಬ್ಬಂದಿ, ಜನಪ್ರತಿನಿಧಿ ಎಂಬುದನ್ನೂ ಲೆಕ್ಕಿಸದೆ ಏಕವಚನದಲ್ಲೇ ಮಾತನಾಡಿರುವುದು ನಡೆದಿದೆ. ಇನ್ನು ಸಾಮಾನ್ಯ ವಾಹನ ಸವಾರರ ಜತೆ ಹೇಗೆ ನಡೆದುಕೊಳ್ಳುತ್ತಾರೆ ಎಂಬುದು ಸಾರ್ವಜನಿಕ ವಲಯದಲ್ಲಿ ಚರ್ಚೆಗೆ ಗ್ರಾಸವಾಗಿದೆ.

ಕನ್ನಡ ಬಾರದ ಸಿಬ್ಬಂದಿ

ಟೋಲ್​ ಪ್ಲಾಜಾದಲ್ಲಿರುವ ಹಲವು ಸಿಬ್ಬಂದಿಗೆ ಕನ್ನಡವೇ ಬರುವುದಿಲ್ಲ. ಅದರಲ್ಲೂ ಟೋಲ್​ ಗುತ್ತಿಗೆ ಪಡೆದಿರುವುದು ಹೊರ ರಾಜ್ಯದ ಕಂಪನಿಯಾಗಿದೆ. ಈ ಟೋಲ್​ಗಳಲ್ಲಿ ನಿಯೋಜನೆಗೊಂಡಿರುವ ಮ್ಯಾನೇಜರ್​ಗಳಿಗೂ ಕನ್ನಡ ಗೊತ್ತಿಲ್ಲ. ಎರಡು ದಿನಗಳ ಹಿಂದೆ ಡಾ.ಸೈಯದ್​ ವಾಸಿಂ ಎಂಬುವರ ಕಾರಿನಲ್ಲಿ ಫಾಸ್ಟ್​ಟ್ಯಾಗ್​ ಇರಲಿಲ್ಲ. ಆದರೆ ನಂಬರ್​ ಇತ್ತು. ಈ ನಂಬರ್​ ದಾಖಲು ಮಾಡಿ ಹಣ ಖಡಿತ ಮಾಡಿಕೊಳ್ಳಿ ಎಂದು ಸಿಬ್ಬಂದಿಗೆ ಹೇಳಿದರು. ಆದರೆ ಅವರು ಕೇಳುವ ಸ್ಥಿತಿಯಲ್ಲಿ ಇರಲಿಲ್ಲ. ಈ ವೇಳೆ ಮಧ್ಯ ಪ್ರವೇಶ ಮಾಡಿದ ಟೋಲ್​ ಮ್ಯಾನೇಜರ್​ ಹಿಂದಿಯಲ್ಲಿ ಮಾತನಾಡಿದರು. ಇದರಿಂದ ಕೆರಳಿದ ಸೈಯದ್​ ಅವರು ನೀನು ಇರುವುದು ಕರ್ನಾಟಕದಲ್ಲಿ, ಇಲ್ಲಿ ಹೆಚ್ಚಾಗಿ ಸಂಚಾರ ಮಾಡುವವರು ಕನ್ನಡದವರು ಮೊದಲು ಕನ್ನಡ ಮಾತನಾಡುವುದನ್ನು ಕಲಿ ಎಂದು ತರಾಟೆ ತೆಗೆದುಕೊಂಡರು.