ಜಿಲ್ಲೆಯಲ್ಲಿ ಐದು ದಿನ ಮಳೆ ನಿರೀಕ್ಷೆ: ನಗರ ಸೇರಿದಂತೆ ಹಲವೆಡೆ ವರುಣನ ದರ್ಶನ

ಮಂಡ್ಯ: ಜಿಲ್ಲೆಯಲ್ಲಿ ಏ.30ರಿಂದ ಮೇ 4ರವರೆಗೆ ತುಂತುರು ಮಳೆಯಾಗುವ ನಿರೀಕ್ಷೆ ಇದೆ. ಅಂತೆಯೇ ಮಂಗಳವಾರ ಸಂಜೆ ನಗರ ಸೇರಿದಂತೆ ಜಿಲ್ಲೆಯ ಹಲವೆಡೆ ಜೋರು ಮಳೆಯಾಯಿತು.

ಭಾರತೀಯ ಹವಾಮಾನ ಇಲಾಖೆ ಹಾಗೂ ಬೆಂಗಳೂರು ಕೃಷಿ ವಿಶ್ವವಿದ್ಯಾನಿಲಯ ನೀಡಿರುವ ಮಾಹಿತಿಯಂತೆ ಏ.30ರಂದು 5 ಮಿ.ಮೀ, ಮೇ 1ರಂದು 5 ಮಿ.ಮೀ, 2ರಂದು 5 ಮಿ.ಮೀ, 3ರಂದು 7 ಮಿ.ಮೀ ಹಾಗೂ 4ರಂದು 8 ಮಿ.ಮೀ ಮಳೆಯಾಗುವ ಸಾಧ್ಯತೆ ಇದೆ. ಈ ಅವಧಿಯಲ್ಲಿ ಗರಿಷ್ಟ 32 ರಿಂದ 33 ಡಿಗ್ರಿ, ಕನಿಷ್ಟ 23 ಡಿಗ್ರಿ ಸೆಲ್ಸಿಯಸ್ ಉಷ್ಣಾಂಶವಿರಲಿದೆ.

ಮಂಗಳವಾರ ಮಂಡ್ಯ ನಗರ, ಕೆ.ಎಂ.ದೊಡ್ಡಿ, ಮದ್ದೂರು ಸೇರಿದಂತೆ ಹಲವೆಡೆ ಮಳೆಯಾಯಿತು. ಬೆಳಗ್ಗೆಯಿಂದ ಬಿಸಿಲ ತಾಪ ಹೆಚ್ಚಾಗಿತ್ತು. ಸಂಜೆ ವೇಳೆ ಬಿರುಗಾಳಿ ಸಹಿತ ಮಳೆ ಸುರಿಯಿತು.