ಜಲಧಾರೆ ಯೋಜನೆ ಕಾಮಗಾರಿ ಪೂರ್ಣಗೊಳಿಸಿ

ಲಿಂಗಸುಗೂರು/ಮುದಗಲ್: ಕೇಂದ್ರ ಸರ್ಕಾರದ ಜಲಧಾರೆ ಯೋಜನೆ ಕಾಮಗಾರಿಯನ್ನು ತ್ವರಿತವಾಗಿ ಪೂರ್ಣಗೊಳಿಸಿ ಜನರಿಗೆ ಕುಡಿವ ನೀರು ಪೂರೈಕೆ ಮಾಡಬೇಕೆಂದು ಸಂಸದ ಜಿ.ಕುಮಾರ ನಾಯಕ ಅವರು, ನೀರು ಮತ್ತು ನೈರ್ಮಲ್ಯ ಇಲಾಖೆ ಅಧಿಕಾರಿಗಳು ಹಾಗೂ ಗುತ್ತಿಗೆದಾರರಿಗೆ ಸೂಚಿಸಿದರು.

ನಾರಾಯಣಪುರ ಜಲಾಶಯದ ಹಿನ್ನೀರಿನಲ್ಲಿ ನಿರ್ಮಾಣವಾಗುತ್ತಿರುವ ಜಲಧಾರೆ ಯೋಜನೆಯ ಇಂಟೆಕ್ ಕಂ ಜಾಕ್‌ವೆಲ್ ಕಾಮಗಾರಿ ಹಾಗೂ ನೀರು ಶುದ್ಧೀಕರಣ ಜಾಕ್‌ವೆಲ್‌ಗಳನ್ನು ಶುಕ್ರವಾರ ವೀಕ್ಷಿಸಿ ಮಾತನಾಡಿದರು. ಇದಕ್ಕೆ ಇಲಾಖೆಯ ಇಇ ಪ್ರಕಾಶ ಪ್ರತಿಕ್ರಿಯಿಸಿ, ಕಾಮಗಾರಿ ಪೂರ್ಣಗೊಳಿಸಲು ಜೂನ್‌ವರೆಗೆ ಕಾಲಾವಕಾಶವಿದೆ. ಮೂರು ಎಂಬಿಆರ್ ಕಾಮಗಾರಿಗಳಲ್ಲಿ ಒಂದನೇ ಎಂಬಿಆರ್ ಪೂರ್ಣಗೊಳಿಸಿ ಲಿಂಗಸುಗೂರು, ಮಸ್ಕಿ, ಸಿಂಧನೂರಿಗೆ ಪ್ರಾಯೋಗಿಕವಾಗಿ ನೀರೊದಗಿಸಲಾಗುವುದು ಎಂದು ಮಾಹಿತಿ ನೀಡಿದರು.

ಕಾಮಗಾರಿ ವಿಳಂಬದ ಕಾರಣ, ಪ್ರಗತಿ ಸ್ಥಿತಿ ಹಾಗೂ ತಾಂತ್ರಿಕ ಅಡೆತಡೆಗಳ ಕುರಿತು ಅಧಿಕಾರಿಗಳಿಂದ ಮಾಹಿತಿ ಪಡೆದ ಸಂಸದರು, ಈ ವಿಷಯವನ್ನು ಕೇಂದ್ರ ಸರ್ಕಾರದ ಗಮನಕ್ಕೆ ತಂದು ವರದಿ ಸಲ್ಲಿಸಲಾಗುವುದು ಎಂದು ತಿಳಿಸಿದರು.

ನಂತರ ಸಂಸದ ಕುಮಾರ ನಾಯಕ ಅಧಿಕಾರಿಗಳೊಂದಿಗೆ ರಾಂಪುರ ಜಲಜೀವನ ಮಿಷನ್ ಕಾಮಗಾರಿ ಪರಿಶೀಲಿಸಿದರು. ಎಪಿಎಂಸಿ ಅಧ್ಯಕ್ಷ ಅಮರೇಶ ಹಿರೇಹೆಸರೂರು, ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷ ಗೋವಿಂದ ನಾಯಕ, ಪ್ರಮುಖರಾದ ಡಾ.ಶಿವಬಸಪ್ಪ ಹೆಸರೂರು, ಮುದಕಪ್ಪ ವಕೀಲ, ಎಸ್.ಆರ್.ರಸೂಲ್, ಆದನಗೌಡ ಬುಂಕಲದೊಡ್ಡಿ, ನಾಗರೆಡ್ಡೆಪ್ಪ, ವಿಶ್ವಕ್ರಾಂತಿ, ಮಹ್ಮದ್ ರಫಿ ಇತರರಿದ್ದರು.