ಬಾಳೆಹೊನ್ನೂರು: ಜಾತಿ, ಮತ, ಭೇದ ತೊರೆದು ಎಲ್ಲರೊಡನೆ ಒಗ್ಗೂಡಿ ದೀಪಾವಳಿ ಆಚರಿಸುತ್ತಿರುವ ಜೇಸಿ ಸಂಸ್ಥೆ ಕಾರ್ಯ ಇತರ ಸಂಘ ಸಂಸ್ಥೆಗಳಿಗೆ ಮಾದರಿ ಎಂದು ಪಿಎಸ್ಐ ನೀತು ಆರ್. ಗುಡೆ ಹೇಳಿದರು.
ಜೇಸಿಐ ಬಾಳೆಹೊನ್ನೂರು ಕ್ಲಾಸಿಕ್ ಸಂಸ್ಥೆ ದೀಪಾವಳಿ ಅಂಗವಾಗಿ ಶನಿವಾರ ರಾತ್ರಿ ಜೇಸಿ ವೃತ್ತದಲ್ಲಿ ಆಯೋಜಿಸಿದ್ದ ಬೆಳಕು-ದೀಪಾವಳಿ ದೀಪೋತ್ಸವ ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು, ದೀಪಾವಳಿ ಎಲ್ಲರ ಬದುಕಿಗೂ ಹೊಸ ಆಯಾಮ ನೀಡಲಿದೆ ಎಂದರು.
ದೀಪೋತ್ಸವ ಆಚರಣೆಯೆಂದರೆ ಕತ್ತಲೆಯಿಂದ ಬೆಳಕಿನೆಡೆಗೆ, ಅಜ್ಞಾನದಿಂದ ಜ್ಞಾನದೆಡೆಗೆ ತೆರಳುವುದಾಗಿದೆ. ಜೇಸಿ ಸಂಸ್ಥೆ ಎಲ್ಲ ಸದಸ್ಯರೊಂದಿಗೆ ಒಗ್ಗೂಡಿ ಆಚರಿಸುವ ಮೂಲಕ ಸಾಮರಸ್ಯ ಸಾಧಿಸಿದೆ. ಈ ದೀಪಾವಳಿ ಎಲ್ಲರ ಬದುಕಿನಲ್ಲೂ ಹೊಸ ಚೈತನ್ಯ, ಸಂಭ್ರಮ ತರಲಿ ಎಂದು ಹಾರೈಸಿದರು.
ಜೇಸಿ ವಲಯ ತರಬೇತುದಾರ ಚೈತನ್ಯ ವೆಂಕಿ ಮಾತನಾಡಿ, ಪ್ರತಿಯೊಬ್ಬರಿಗೂ ಜ್ಞಾನವೆಂಬ ಬೆಳಕಿನ ಅಗತ್ಯವಿದೆ. ಸುಖ ದುಃಖಗಳೆರಡೂ ಬೆಳಕು-ಕತ್ತಲೆ ಇದ್ದಂತೆ. ಎರಡೂ ಶಾಶ್ವತವಲ್ಲ ಎಂಬುದನ್ನು ಅರಿಯಬೇಕಿದೆ. ಬೆಳಗುವ ದೀಪ ನಮ್ಮ ಬದುಕಿಗೆ ದಾರಿ ತೋರುವ ಮಾರ್ಗದರ್ಶಕವಾಗಿದೆ. ಈ ಮೂಲಕ ಅಜ್ಞಾನದ ಕತ್ತಲೆಯನ್ನು ಪ್ರತಿಯೊಬ್ಬರೂ ದೂರ ಮಾಡಿಕೊಳ್ಳಬೇಕಿದೆ ಎಂದು ಹೇಳಿದರು.