| ಗಿರೀಶ್ ಗರಗ ಬೆಂಗಳೂರು
ಕರ್ನಾಟಕ ಮತ್ತು ತಮಿಳುನಾಡು ನಡುವಿನ ಮಾರ್ಗ ಕ್ರಮಿಸುವ ಅವಧಿ ಕಡಿತಗೊಳಿಸಲು ರೂಪಿಸಲಾಗಿರುವ ಬೆಂಗಳೂರು- ಚೆನ್ನೈ ಎಕ್ಸ್ಪ್ರೆಸ್ ವೇ ನಿರ್ವಣಕ್ಕೆ ಗುತ್ತಿಗೆದಾರರ ನೇಮಕಕ್ಕೆ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ (ಎನ್ಎಚ್ಎಐ) ಮುಂದಾಗಿದೆ.
ದೇಶಾದ್ಯಂತ 3.3 ಲಕ್ಷ ಕೋಟಿ ರೂ. ವೆಚ್ಚದ 22 ಎಕ್ಸ್ಪ್ರೆಸ್ ವೇ ಹೆದ್ದಾರಿ ನಿರ್ವಣಕ್ಕೆ ಎನ್ಎಚ್ಎಐ ನಿರ್ಧರಿಸಿದೆ. ಅದರಲ್ಲಿ 271 ಕಿ.ಮೀ. ಬೆಂಗಳೂರು-ಚೆನ್ನೈ ಎಕ್ಸ್ಪ್ರೆಸ್ ವೇ ಯೋಜನೆಯೂ ಸೇರಿದೆ. ಬೆಂಗಳೂರು-ಚೆನ್ನೈ ನಡುವೆ ಸಂಚರಿಸುವ ವಾಹನಗಳಿಗಿಂತ, ಚೆನ್ನೈ ಬಂದರಿನಿಂದ ಬೆಂಗಳೂರಿಗೆ ಬರುವ ವಾಹನಗಳಿಗೆ ಎಕ್ಸ್ಪ್ರೆಸ್ ವೇ ಅನುಕೂಲವಾಗಲಿದೆ. ಈ ಯೋಜನೆ ಅನುಷ್ಠಾನಕ್ಕೆ ಸಂಬಂಧಿಸಿದಂತೆ ಇದೀಗ ಟೆಂಡರ್ ಪ್ರಕ್ರಿಯೆಗೆ ಚಾಲನೆ ನೀಡಲಾಗಿದೆ.
ಎನ್ಎಚ್ಎಐ ರೂಪಿಸಿರುವ ಯೋಜನೆಯಂತೆ ಎಕ್ಸ್ಪ್ರೆಸ್ ವೇ ಕಾಮಗಾರಿಯನ್ನು ಪ್ಯಾಕೇಜ್ ಲೆಕ್ಕದಲ್ಲಿ ನೀಡಲಾಗುತ್ತಿದೆ. ಮೊದಲಿಗೆ ಬೆಂಗಳೂರಿನಿಂದ ಮಾಲೂರುವರೆಗೆ ರಸ್ತೆ ನಿರ್ವಣಕ್ಕೆ ಟೆಂಡರ್ ಕರೆಯಲಾಗಿದೆ. ಮಾಲೂರು ಬಳಿ ರಾಷ್ಟ್ರೀಯ ಹೆದ್ದಾರಿ 4 ಮತ್ತು 207ರ ನಡುವೆ ಇಂಟರ್ಚೇಂಜ್ ಮಾರ್ಗ ನಿರ್ವಿುಸಬೇಕಿದೆ. ಒಟ್ಟು 27.10 ಕಿ.ಮೀ. ಉದ್ದದ ಮಾರ್ಗಕ್ಕೆ 942.86 ಕೋಟಿ ರೂ. ವ್ಯಯಿಸಲಾಗುತ್ತಿದೆ.
ಅದೇ ರೀತಿ ಎಕ್ಸ್ಪ್ರೆಸ್ ವೇ ಸಾಗುವ ಆಂಧ್ರಪ್ರದೇಶದಲ್ಲಿನ ಗುಡಿಪಾಲದಿಂದ ವಲಜಪೇಟ್ವರೆಗೆ ಮಾರ್ಗ ನಿರ್ವಣಕ್ಕೆ ಪ್ರತ್ಯೇಕ ಟೆಂಡರ್ ಕರೆಯಲಾಗಿದೆ. ಒಟ್ಟು 24 ಕಿ.ಮೀ. ಮಾರ್ಗಕ್ಕೆ 931.85 ಕೋಟಿ ರೂ. ಖರ್ಚು ಮಾಡಲಾಗುತ್ತದೆ.
ಬಿಒಟಿ ಮಾದರಿ: ನೂತನ ಎಕ್ಸ್ಪ್ರೆಸ್ ವೇ ನಿರ್ವಹಣೆಯನ್ನು ಸುಲಭವಾಗಿಸಲು ಪ್ಯಾಕೇಜ್ ಲೆಕ್ಕದಲ್ಲಿ ಗುತ್ತಿಗೆ ನೀಡಲಾಗುತ್ತಿದೆ. ಅದರಂತೆ ಗುತ್ತಿಗೆ ಸಂಸ್ಥೆ ತನಗೆ ನೀಡುವ ಉದ್ದದಷ್ಟು ರಸ್ತೆಯನ್ನು ನಿರ್ವಿುಸಿ, ಅವುಗಳ ನಿರ್ವಹಣೆ ಮಾಡಬೇಕಿದೆ. ಅಲ್ಲದೆ, ಎಕ್ಸ್ಪ್ರೆಸ್ ವೇ ಅಕ್ಕಪಕ್ಕದಲ್ಲಿ ಹೋಟೆಲ್, ಪೆಟ್ರೋಲ್ ಬಂಕ್ ಸೇರಿ ಇನ್ನಿತರ ಅಗತ್ಯ ಸೌಲಭ್ಯ ಅನುಷ್ಠಾನಗೊಳಿಸಬೇಕಿದೆ.
ಕೈಗಾರಿಕಾ ಅಭಿವೃದ್ಧಿಗೆ ಯೋಜನೆ ಅನುಕೂಲ
ಯೋಜನೆ ಜಾರಿಯಿಂದಾಗಿ ಬೆಂಗಳೂರು-ಚೆನ್ನೈ ಮಾರ್ಗದಲ್ಲಿನ ಕೈಗಾರಿಕೆಗಳಿಗೆ ಸಾಕಷ್ಟು ಅನುಕೂಲವಾಗಲಿದೆ. ಚೆನ್ನೈ ಬಂದರಿನಿಂದ ಕೈಗಾರಿಕೆಗಳಿಗೆ ಅಗತ್ಯವಿರುವ ಕಚ್ಛಾ ವಸ್ತುಗಳು, ಹಾಗೂ ಚೆನ್ನೈ ಬಂದರಿಗೆ ಕೈಗಾರಿಕಾ ಉತ್ಪನ್ನಗಳು ಸುಲಭವಾಗಿ ಸಾಗಿಸಲು ಎಕ್ಸ್ಪ್ರೆಸ್ ವೇ ಸಹಕಾರಿಯಾಗಲಿದೆ.
2,600 ಹೆಕ್ಟೇರ್ ಭೂಮಿ ಸ್ವಾಧೀನ ಅಗತ್ಯ
ಎಕ್ಸ್ಪ್ರೆಸ್ ವೇ ನಿರ್ವಣಕ್ಕೆ ಒಟ್ಟು 2,600 ಹೆಕ್ಟೇರ್ ಭೂಮಿ ಅವಶ್ಯಕತೆಯಿದೆ. ಕರ್ನಾಟಕದಲ್ಲಿ 800 ಹೆಕ್ಟೇರ್, ಆಂಧ್ರಪ್ರದೇಶ ಮತ್ತು ತಮಿಳುನಾಡಿನಲ್ಲಿ ತಲಾ 900 ಹೆಕ್ಟೇರ್ ಭೂಮಿ ಸ್ವಾಧೀನ ಪಡಿಸಿಕೊಳ್ಳಬೇಕಿದ್ದು, ಈ ಹಿಂದೆಯೇ ಚಾಲನೆ ನೀಡಲಾಗಿದೆ.
4 ಗಂಟೆಯಲ್ಲಿ ಚೆನ್ನೈಗೆ
ಯೋಜನೆಯಂತೆ ಬೆಂಗಳೂರು ಹೊರವಲಯದಿಂದ ಆರಂಭವಾಗುವ ಹೆದ್ದಾರಿ ಚೆನ್ನೈ ಹೊರವರ್ತಲ ರಸ್ತೆ ಸಂರ್ಪಸುವ ಶ್ರೀಪೆರಂಬದೂರಿನಲ್ಲಿ ಅಂತ್ಯವಾಗಲಿದೆ. ಆಂಧ್ರಪದೇಶದ ವೆಂಕಟಗಿರಿಕೋಟ, ಪಲ್ಮನೇರ್ನಲ್ಲೂ ಹಾದುಹೋಗಲಿದೆ. ಯೋಜನೆ ಜಾರಿಯಿಂದಾಗಿ ಬೆಂಗಳೂರು-ಚೆನ್ನೈ ನಡುವಿನ ಮಾರ್ಗವನ್ನು 4 ಗಂಟೆಯಲ್ಲಿ ಕ್ರಮಿಸಬಹುದು ಎಂದು ಅಂದಾಜಿಸಲಾಗಿದೆ. ಎನ್ಎಚ್ಎಐ ಯೋಜನೆಯನ್ನು 2025ಕ್ಕೆ ಪೂರ್ಣಗೊಳಿಸುವ ಗುರಿ ಹೊಂದಿದೆ.
2011ರ ಯೋಜನೆ
ಕರ್ನಾಟಕ, ಆಂಧ್ರಪ್ರದೇಶ, ತಮಿಳುನಾಡು ರಾಜ್ಯಗಳನ್ನು ಹಾದು ಹೋಗುವ 271 ಕಿ.ಮೀ. ಉದ್ದದ ಹೆದ್ದಾರಿ ನಿರ್ಮಾಣ ಯೋಜನೆಯನ್ನು 2011ರಲ್ಲಿಯೇ ರೂಪಿಸಲಾಗಿತ್ತು. ಆದರೆ, ಕಾರಣಾಂತರಗಳಿಂದ ಅದಕ್ಕೆ ಚಾಲನೆ ನೀಡಲು ಸಾಧ್ಯವಾಗಿರಲಿಲ್ಲ. ಒಟ್ಟು 8 ಪಥದ ನೆಲಮಟ್ಟದ ರಸ್ತೆ ನಿರ್ವಣ, ಅಗತ್ಯವಿರುವೆಡೆ 6 ಪಥದ ಮೇಲ್ಸೇತುವೆ ನಿರ್ಮಾಣ ಮಾಡಲಾಗುತ್ತದೆ. ಯೋಜನೆಗೆ 18 ಸಾವಿರ ಕೋಟಿ ರೂ.ಗೂ ಹೆಚ್ಚಿನ ವೆಚ್ಚ ಮಾಡಲಾಗುತ್ತಿದೆ.