ಯಾದಗಿರಿ: ನದಿತೀರದಲ್ಲಿ ಪೂಜೆಗೆಂದು ಬಂದಿದ್ದ ಯುವಕರಿಬ್ಬರಲ್ಲಿ ಒಬ್ಬ ನೀರಲ್ಲಿ ಕೊಚ್ಚಿಕೊಂಡು ಹೋಗಿದ್ದು, ಮತ್ತೊಬ್ಬ ನದಿಮಧ್ಯೆ ಅಪಾಯದಲ್ಲಿ ಸಿಲುಕಿ ಸ್ವಲ್ಪದರಲ್ಲೇ ಪ್ರಾಣಾಪಾಯದಿಂದ ಪಾರಾದ ಘಟನೆ ಸಂಭವಿಸಿದೆ.
ಯಾದಗಿರಿ ನಗರದ ಹೊರಭಾಗದ ಭೀಮಾನದಿಯಲ್ಲಿ ಈ ಅವಘಡ ಸಂಭವಿಸಿದೆ. ಮುದ್ಯಾಳ ಗ್ರಾಮದ ಸ್ನೇಹಿತರಾರ ಸಾಬಣ್ಣ ಹಾಗೂ ಭೀಮರಾಯ ಪೂಜೆಗೆಂದು ಈ ನದಿತೀರಕ್ಕೆ ಬಂದಿದ್ದರು. ಈ ಸಂದರ್ಭದಲ್ಲಿ ಸಾಬಣ್ಣ ಕಾಲುಜಾರಿ ನದಿಗೆ ಬಿದ್ದಿದ್ದು, ಆತನನ್ನು ರಕ್ಷಿಸಲು ಭೀಮರಾಯ ಕೂಡ ನೀರಿಗೆ ಧುಮುಕಿದ್ದ.
ಆದರೆ ಸಾಬಣ್ಣ ನೀರಿನ ರಭಸದಲ್ಲಿ ಕೊಚ್ಚಿಕೊಂಡು ಹೋಗಿದ್ದು, ಆತನ ರಕ್ಷಣೆಗೆ ಧಾವಿಸಿದ್ದ ಭೀಮರಾಯ ಸಹ ನೀರಲ್ಲಿ ಕೊಚ್ಚಿಹೋದರೂ ನದಿಮಧ್ಯೆ ಸಿಕ್ಕ ಬೃಹತ್ ಬಂಡೆಯ ಆಸರೆ ಪಡೆದು ಪ್ರಾಣಾಪಾಯದಿಂದ ಪಾರಾಗಿದ್ದಾನೆ. ಸ್ಥಳೀಯರು ಬಳಿಕ ಹಗ್ಗದ ಮೂಲಕ ಭೀಮರಾಯನನ್ನು ಅಲ್ಲಿಂದ ಪಾರು ಮಾಡಿದ್ದಾರೆ. ಸ್ಥಳಕ್ಕೆ ಅಗ್ನಿಶಾಮಕ ದಳದ ಸಿಬ್ಬಂದಿ ಹಾಗೂ ಪೊಲೀಸರು ಭೇಟಿ ನೀಡಿದ್ದು, ನೀರುಪಾಲಾದ ವ್ಯಕ್ತಿಗಾಗಿ ಬೋಟ್ ಮೂಲಕ ಶೋಧ ನಡೆಸಲಾಗುತ್ತಿದೆ.