ಪ್ರಮುಖ ಮುಖ್ಯಾಂಶಗಳು
ಕೂಳೂರು ಮೇಲ್ಸೇತುವೆಯ ತಳಭಾಗದಲ್ಲಿ ಅಂದರೆ ಕೂಳೂರು ಜಂಕ್ಷನ್ನಲ್ಲಿ ಆಟೋರಿಕ್ಷಾ ನಿಲ್ದಾಣವಿದೆ. ಇದರ ಪಕ್ಕದಲ್ಲೂ ಸಣ್ಣ ತೋಡು ಇದೆ. ಇಲ್ಲಿ ಪ್ಲಾಸ್ಟಿಕ್, ಕಸ-ಕಡ್ಡಿ, ಮಣ್ಣು ತುಂಬಿ ತೋಡೇ ಇಲ್ಲದಂತಾಗಿತ್ತು. ಮೊನ್ನೆಯಷ್ಟೇ ತೋಡಿನ ಹೂಳನ್ನು ನಗರ ಪಾಲಿಕೆಯವರು ತೆಗೆದಿದ್ದಾರೆ. ಆದರೆ ಅದೂ ಕೂಡ ಸಮರ್ಪಕವಾಗಿ ನಡೆಸಿಲ್ಲ. ತೋಡಿನ ಹೂಳನ್ನು ಆಳಕ್ಕೆ ತೆಗೆದಿಲ್ಲ. ಒಂದೂವರೆ ಫೀಟ್ನಷ್ಟು ಮಾತ್ರ ಆಳವಿದೆ. ಸಣ್ಣಗೆ ಮಳೆ ಬಂದರೂ, ಈ ತೋಡಿನಲ್ಲಿ ನೀರು ತುಂಬಿ ಉಕ್ಕಿ ಬರುತ್ತದೆ. ಜೋರು ಮಳೆ ಬಂದರೆ ರಿಕ್ಷಾ ನಿಲ್ದಾಣ, ರಸ್ತೆಗಳೆಲ್ಲ ನೀರು ತುಂಬಿ ಕೆರೆಯಂತಾಗಬಹುದು. ವಾಹನ, ಜನರ ಓಡಾಟಕ್ಕೆ ತೊಂದರೆಯಾಗುವುದು ಮಾತ್ರವಲ್ಲದೆ ಜೀವಹಾನಿಯೂ ಆಗಬಹುದು. ಹೆದ್ದಾರಿ ಪ್ರಾಧಿಕಾರ, ಜಿಲ್ಲಾಡಳಿತ ಇತ್ತ ಗಮನಹರಿಸಬೇಕಿದೆ.
ಸರ್ವಿಸ್ ರಸ್ತೆಯ ಚಾವಡಿ ಹೋಟೆಲ್ನ ಮುಂಭಾಗದಿಂದ ಪ್ರಾರಂಭವಾಗಿ ರಾಯಲ್ ಏಕ್ ಕಟ್ಟಡದವರೆಗೆ ಪೂರ್ವ ಭಾಗದಲ್ಲಿ ಹೆದ್ದಾರಿ ಮತ್ತು ಸರ್ವಿಸ್ ರಸ್ತೆ ಮಧ್ಯೆ ತೋಡು ಇದೆ. ಆದರೆ ಅಷ್ಟೂ ದೂರ ಹುಲ್ಲು ಬೆಳೆದು ತೋಡು ಕಾಣುವುದೇ ಇಲ್ಲ. ಮಳೆಗಾಲದಲ್ಲಿ ಮಾತ್ರ ಇಲ್ಲಿ ಬಹಳ ಸಮಸ್ಯೆಯಾಗುತ್ತದೆ. ಯಾಕೆಂದರೆ ಈ ತೋಡು ನೀರಿನಿಂದ ತುಂಬುತ್ತದೆ. ರಸ್ತೆ ಯಾವುದು, ತೋಡು ಯಾವುದು ಎನ್ನುವುದೇ ತಿಳಿಯುವುದಿಲ್ಲ. ವಾಹನ ಸವಾರರು ರಸ್ತೆ ಎಂದೇ ಭಾವಿಸಿ ಹೆದ್ದಾರಿಯಿಂದ ಚರಂಡಿಗೆ ಬೀಳುತ್ತಾರೆ. ಸಾವು-ನೋವಾಗುತ್ತದೆ.
ಕೂಳೂರಿನಲ್ಲಿ ಒಂದು ಬದಿಯಲ್ಲಿ ತೋಡಿದ್ದರೂ, ಇಲ್ಲದಂತಾಗಿದೆ. ಇನ್ನೊಂದು ಬದಿಯಲ್ಲಿ ತೋಡೇ ಇಲ್ಲದಾಗಿದೆ. ಕೂಳೂರು ಸೇತುವೆಯಿಂದ ಹಿಡಿದು ಕೊಟ್ಟಾರದ ಗೋಲ್ಡ್ ಫಿಂಚ್ ಸಿಟಿ ಮುಂಭಾಗದವರೆಗೆ ಹೆದ್ದಾರಿಯ ಪಶ್ಚಿಮ ಭಾಗದಲ್ಲಿ ತೋಡೇ ಇಲ್ಲ. ಕಳೆದ ಮಳೆಗಾಲದಲ್ಲಿ ಭಾರಿ ಸಮಸ್ಯೆಯಾಗಿತ್ತು ಎನ್ನುವುದನ್ನು ಇಲ್ಲಿನವರು ಹೇಳುತ್ತಾರೆ. ಹೆದ್ದಾರಿ ಬಡಿಯಲ್ಲೇ ಅದೂ ಕೂಡ ಜಂಕ್ಷನ್ನಲ್ಲೇ ತೋಡಿಲ್ಲವೆಂದಾದರೆ ನೀರು ಹರಿದು ಹೋಗುವುದಾದರೂ ಎಲ್ಲಿಗೆ? ನೀರೆಲ್ಲ ರಸ್ತೆ, ರಸ್ತೆ ಬಡಿಯಲ್ಲೇ ನಿಂತು ಕೃತಕ ಕೆರೆ ನಿರ್ಮಾಣವಾಗಬಹುದು. ಇಲ್ಲಿ ಖಾಸಗಿ ನರ್ಸಿಂಗ್ ಕಾಲೇಜು, ಮಳಿಗೆ, ಶೋರೂಂ, ಅಂಗಡಿ, ಮನೆಗಳಿವೆ. ಇವುಗಳೊಳಗೂ ನೀರು ತುಂಬಬಹುದು. ವಿದ್ಯಾರ್ಥಿ-ವಿದ್ಯಾರ್ಥಿನಿಯರು ಬಟ್ಟೆ ಒದ್ದೆ ಮಾಡಿಕೊಂಡು ಶಿಕ್ಷಣ ಪಡೆಯಬೇಕಾಗಬಹುದು. ಜಿಲ್ಲಾಧಿಕಾರಿಗಳು ತುರ್ತಾಗಿ ಈ ಭಾಗದತ್ತ ಗಮನ ಕೊಡಬೇಕಾಗಿದೆ. ಹೆದ್ದಾರಿ ಪ್ರಾಧಿಕಾರಕ್ಕೆ ಸೂಚನೆ ಕೊಡಬೇಕಾಗಿದೆ.
ಚೇತನ್ ಪಡುಬಿದ್ರಿ