ಅಕ್ಕಿಆಲೂರ: ಸಮೀಪದ ನಾಲ್ಕರ ಕ್ರಾಸ್ ಬಳಿ ಬಸ್ಗಾಗಿ ಕಾಯುವ ಪ್ರಯಾಣಿಕರಿಗೆ ನಿಲ್ದಾಣದ ವ್ಯವಸ್ಥೆ ಇಲ್ಲದೆ ನಿತ್ಯ ಪರದಾಡುತ್ತಿದ್ದು, ಹೊಸ ನಿಲ್ದಾಣಕ್ಕೆ ಒತ್ತಾಯ ಹೇಳಿ ಬರುತ್ತಿದೆ.
ಶಿವಮೊಗ್ಗದಿಂದ ಉತ್ತರ ಕನ್ನಡ, ಹಾವೇರಿಯಿಂದ ಧಾರವಾಡ ಹಾಗೂ ಉತ್ತರ ಕನ್ನಡದಿಂದ ಉತ್ತರ ಕರ್ನಾಟಕ ಭಾಗಕ್ಕೆ ತೆರಳಲು ಪ್ರಮುಖ ಕ್ರಾಸ್ ಆಗಿರುವ ನಾಲ್ಕರ ಕ್ರಾಸ್ನಲ್ಲಿ ದಿನ ಬೆಳಗಾದರೆ ನೂರಾರು ಪ್ರಯಾಣಿಕರು ಆಗಮಿಸುತ್ತಾರೆ. ನೇರ ಬಸ್ ವ್ಯವಸ್ಥೆ ಇಲ್ಲದೆ ಇರುವಾಗ ನಾಲ್ಕರ ಕ್ರಾಸ್ಗೆ ಆಗಮಿಸಿ ಇಲ್ಲಿಂದ ಬಸ್ ಬರುವವರೆಗೂ ಕಾಯ್ದು ತೆರಳುವವರ ಸಂಖ್ಯೆಯೆ ಹೆಚ್ಚು. ಅಂತರ ಜಿಲ್ಲಾ ಸಾರಿಗೆ ಸೌಲಭ್ಯ ಹೊಂದಲು ಮುಖ್ಯ ಕೇಂದ್ರವಾಗಿರುವ ನಾಲ್ಕರ ಕ್ರಾಸ್ನಲ್ಲಿ ಇದುವರೆಗೂ ಬಸ್ ನಿಲ್ದಾಣದ ವ್ಯವಸ್ಥೆಯೇ ಇಲ್ಲದಿರುವುದು ಪ್ರಯಾಣಿಕರ ಅಸಮಾಧಾನಕ್ಕೆ ಕಾರಣವಾಗಿದೆ. ನಾಲ್ಕು ಕಡೆಗಳಿಂದ ಬರುವ ಬಸ್ನಿಂದ ಇಳಿಯುವವರು, ಹತ್ತುವವರು ಮತ್ತೆ ಮಾರ್ಗ ಬದಲಾವಣೆ ಮಾಡಿ, ಬೇರೆ ಬಸ್ ಹತ್ತುವ ಪ್ರಯಾಣಿಕರ ಸಂಖ್ಯೆ ದಿನೇದಿನೆ ಹೆಚ್ಚಾಗುತ್ತಿದೆ. ನಾಲ್ಕು ಕಡೆಗಳಲ್ಲಿ ಬಸ್ಗಾಗಿ ಕಾಯುವ ಪ್ರಯಾಣಿಕರಿಗೆ ಅಕ್ಕಪಕ್ಕದ ಟೀ ಮತ್ತು ಪಾನ್ ಶಾಪ್ಗಳೇ ಆಶ್ರಯ ನೀಡುತ್ತಿವೆ. ಮಲೆನಾಡ ಭಾಗಕ್ಕೆ ತಾಗಿಕೊಂಡಿರುವ ಈ ಪ್ರದೇಶದಲ್ಲಿ ಬಿಟ್ಟುಬಿಡದೆ ಸುರಿಯುವ ಮಳೆಯ ಮಧ್ಯೆಯೂ ಜನ ಛತ್ರಿ ಹಿಡಿದುಕೊಂಡೆ ಬಸ್ಗಾಗಿ ಕಾಯುವ ದೃಶ್ಯ ಸಾಮಾನ್ಯವಾಗಿರುತ್ತದೆ.
ಎಚ್ಚರಿಕೆ ತಪ್ಪಿದರೆ ಅಪಾಯ: ಒಂದು ಕಡೆಯಿಂದ ಬಸ್ ಇಳಿದು ರಸ್ತೆ ದಾಟಿ, ಮತ್ತೊಂಡು ಕಡೆ ಓಡಿ ಹೋಗಿ ಬಸ್ ಹತ್ತುವ ಪ್ರಯಾಣಿಕರು ಸ್ವಲ್ಪ ಎಚ್ಚರ ತಪ್ಪಿದರೂ ಅಪಾಯ ಸಂಭವಿಸುತ್ತದೆ.
ನಾಲ್ಕರ ಕ್ರಾಸ್ಗೆ ಇಳಿದು ಅಕ್ಕಿಆಲೂರಿಗೆ ಬರುವ ಹಾಗೂ ಬೇರೆ ಬಸ್ ಹತ್ತುವ ಪ್ರಯಾಣಿಕರಿಗೆ ನಿಲ್ಲಲು ಬಸ್ ನಿಲ್ದಾಣ ಇಲ್ಲದಿರುವುದರಿಂದ ಸಾಕಷ್ಟು ತೊಂದರೆಯಾಗಿದೆ. ವಿದ್ಯಾರ್ಥಿಗಳು ಮಳೆಯಲ್ಲಿ ತೊಯ್ಯಿಸಿಕೊಂಡು ಶಾಲೆ-ಕಾಲೇಜಿಗೆ ಬರುತ್ತಿದ್ದಾರೆ. ನಾಲ್ಕು ಜಿಲ್ಲೆಗಳನ್ನು ಸಂರ್ಪಸುವ ನಾಲ್ಕರ ಕ್ರಾಸ್ಗೆ ನಾಲ್ಕು ಬಸ್ ನಿಲ್ದಾಣ, ಸಾರ್ವಜನಿಕ ಶೌಚಗೃಹದ ಅಗತ್ಯವಿದೆ. ಅಧಿಕಾರಿಗಳು ಇತ್ತ ಗಮನ ಹರಿಸಿ ವ್ಯವಸ್ಥೆ ಕಲ್ಪಿಸಬೇಕು. | ಸಿದ್ದಲಿಂಗೇಶ ತುಪ್ಪದ ಬಿಜೆಪಿ ಮುಖಂಡ ಅಕ್ಕಿಆಲೂರ