ನಿರ್ವಹಣೆಯಿಲ್ಲದೆ ಡ್ಯಾಂಗಳು ನೀರವ

ವಿಜಯವಾಣಿ ಸುದ್ದಿಜಾಲ ಬೈಂದೂರು

ಗ್ರಾಮೀಣ ಭಾಗಗಳ ರೈತರಿಗೆ ಕೃಷಿ ಚಟುವಟಿಕೆಗೆಗೆ ಸಹಕಾರಿಯಾಗಬೇಕು ಮತ್ತು ಸಮುದ್ರ ಸೇರುವ ನದಿಗಳ ನೀರಿಗೆ ತಡೆಯೊಡ್ಡಿ ಅಂತರ್ಜಲವೃದ್ಧಿ ಜತೆಗೆ ನೀರಾವರಿ ಅನುಕೂಲಕ್ಕೆ ಸರ್ಕಾರ ಕಳೆದ ಹತ್ತು ವರ್ಷಗಳಲ್ಲಿ ನೂರಾರು ವೆಂಟೆಡ್ ಡ್ಯಾಂ ನಿರ್ಮಿಸಿದೆ. ಆದರೆ ಈ ಎಲ್ಲ ವೆಂಟೆಡ್ ಡ್ಯಾಂಗಳು ಉದ್ಘಾಟನೆಗಷ್ಟೆ ಸೀಮಿತವಾಗಿದೆ. ಬಹುತೇಕ ಕಿಂಡಿ ಅಣೆಕಟ್ಟುಗಳು ನಿರ್ವಹಣೆ ಕಾಣದೆ ನೀರವವಾಗಿದೆ. ಬೈಂದೂರು ಕ್ಷೇತ್ರದ ಕೊಲ್ಲೂರು, ಕಾಲ್ತೋಡು, ಉಪ್ಪುಂದ, ಬಿಜೂರು, ಯಡ್ತರೆ ಗ್ರಾಮದ ತೂದಳ್ಳಿ, ಹಡವಿನಗದ್ದೆ, ಶಿರೂರು ಗ್ರಾಮದ ಸಂಕದಗುಂಡಿ ಹಾಗೂ ಪೇಟೆ ಮುಂತಾದ ಕಡೆ ಕೋಟ್ಯಂತರ ರೂ. ಅನುದಾನದಲ್ಲಿ ವೆಂಟೆಡ್ ಡ್ಯಾಂ ನಿರ್ಮಿಸಲಾಗಿದೆ. ಈ ಭಾಗದ ರೈತರು ಹಲವು ವರ್ಷಗಳ ಹೋರಾಟದ ಬಳಿಕ ಜನಪ್ರತಿನಿಧಿಗಳ ಸಹಕಾರದಿಂದ ಡ್ಯಾಂ ನಿರ್ಮಾಣವಾಗಿದೆ.

ಮಾಹಿತಿ ಕೊರತೆ

ಇತ್ತೀಚೆಗೆ ನಿರ್ಮಾಣವಾದ ವೆಂಟೆಡ್ ಡ್ಯಾಂಗಳು ಅತ್ಯಾಧುನಿಕ ತಂತ್ರಜ್ಞಾನದ ವ್ಯವಸ್ಥೆ ಹೊಂದಿದೆ. ಆದರೆ ಸ್ಥಳೀಯರಿಗೆ ಮಾಹಿತಿ ಕೊರತೆ ಅಧಿಕಾರಿಗಳ ನಿರ್ಲಕ್ಷದ ಪರಿಣಾಮ ನಿರ್ವಹಣೆ ಕೊರತೆ ಕಂಡಿದೆ. ನಿರ್ಮಾಣವಾಗಿ ಒಂದೆರಡು ವರ್ಷದಲ್ಲಿ ನದಿ ನೀರಿನ ರಭಸ, ಮರದ ಕೊಂಬೆಗಳು ಬಡಿದು ಡ್ಯಾಂ ಬಾಗಿಲು ತೆಗೆಯಲಾರದ ಪರಿಸ್ಥಿತಿಯಿದೆ.

ಕಳಪೆ ಕಾಮಗಾರಿ

ಸುಬ್ಬರಾಡಿ ಡ್ಯಾಂಗೆ ಕೋಟ್ಯಂತರ ಅನುದಾನ ವೆಚ್ಚ ಮಾಡಲಾಗಿದೆ. ಆದರೆ ರೈತರಿಗೆ ಉಪಯೋಗವಾಗದೆ ಸಂಪೂರ್ಣ ಕಳಪೆಯಾಗಿರುವುದಾಗಿ ಸ್ಥಳೀಯರ ಅಭಿಪ್ರಾಯ. ಇದರಿಂದ ನೂರಾರು ಕೋಟಿ ರೂ. ವೆಚ್ಚದ ವೆಂಟೆಡ್ ಡ್ಯಾಂಗಳು ಅನುದಾನ ಬಳಕೆಗಷ್ಟೆ ಉಪಯೋಗವಾಗುತ್ತಿದೆ. ಇನ್ನು ಕೆಲವು ಕಡೆ ಕಾಲುವೆ ಮೂಲಕ ನೀರು ಹಾಯಿಸುವ ಯೋಜನೆಯಿದ್ದರೂ ಹೂಳು ತುಂಬಿ ಒಂದೇ ವರ್ಷದಲ್ಲಿ ಕಾಲುವೆ ತುಂಬಿಹೋಗಿದೆ. ಪ್ರತಿವರ್ಷ ಗ್ರೀಸಿಂಗ್ ಮಾಡದೆ ಮತ್ತು ನಿರ್ವಹಣೆ ಕೊರತೆಯಿಂದ ಬಹುತೇಕ ಡ್ಯಾಂನ ಕಬ್ಬಿಣದ ಹಲಗೆಗಳು ಮೇಲೆಳುತ್ತಿಲ್ಲ. ಗ್ರಾಮೀಣ ಭಾಗದಲ್ಲಿ ಕಳಪೆ ವೆಂಟೆಡ್ ಡ್ಯಾಂಗಳ ಕುರಿತು ಮಾಧ್ಯಮಗಳು ನಿರಂತರ ವರದಿ ಪ್ರಕಟಿಸಿದ ಪರಿಣಾಮ ಇಲಾಖೆ ಈ ಬಗ್ಗೆ ಗಮನಹರಿಸಿದೆ. ಮಾತ್ರವಲ್ಲದೆ ಹಡವಿನಗದ್ದೆ, ಶಿರೂರು, ತೂದಳ್ಳಿ ಮುಂತಾದ ಕಡೆ ರಿಪೇರಿ ಕಾರ್ಯ ನಡೆಯುತ್ತಿದೆ. ಇದರಿಂದಾಗಿ ಕೃಷಿಕರಿಗೆ ಒಂದಿಷ್ಟು ಅನುಕೂಲವಾಗಲಿದ್ದು, ವೆಂಟೆಡ್ ಡ್ಯಾಂ ಸಮಸ್ಯೆಯಿಂದ ನೀರು ಶೇಖರಣೆಯಾಗುತ್ತಿದೆ. ಕೃಷಿ ಕಾರ್ಯ ಕೈಬಿಟ್ಟ ಕೃಷಿಕರ ಬದುಕಿಗೆ ಅಧಿಕಾರಿಗಳ ಸ್ಪಂದನೆ ಒಂದಿಷ್ಟು ಸಮಾಧಾನ ತಂದಿದೆ.