ತುಮಕೂರು: ಕರ್ನಾಟಕ ನಾಟಕ ಅಕಾಡೆಮಿ ಪ್ರಕಟಿಸಿರುವ 3 ವರ್ಷಗಳ ಪ್ರಶಸ್ತಿ ಪಟ್ಟಿಯಲ್ಲಿ ತುಮಕೂರು ಜಿಲ್ಲೆ ಸಿಂಹಪಾಲು ಪಡೆದಿದೆ. ರಂಗಭೂಮಿ ಕಲಾವಿದರ ತವರೂರು ತುಮಕೂರು ಜಿಲ್ಲೆಯ ನಾಟಕಕಾರ ಎಚ್.ಎಸ್.ಶಿವಪ್ರಕಾಶ್ಗೆ 2023&24ನೇ ಸಾಲಿನ ಜೀವಮಾನದ ಸಾಧನೆ ಪ್ರಶಸ್ತಿ ಸಿಕ್ಕಿದ್ದರೆ, ನಟ ಅಚ್ಚುತಕುಮಾರ್ ಸೇರಿ 8 ಕಲಾವಿದರು ವಾರ್ಷಿಕ ಪ್ರಶಸ್ತಿಗೆ ಭಾಜನರಾಗಿದ್ದಾರೆ. ನಟರತ್ನ ಚಿಂದೋಡಿ ವೀರಪ್ಪನವರ ದತ್ತಿ ಪುರಸ್ಕಾರಕ್ಕೆ ತುಮಕೂರಿನ ಹೇಮಮಾಲಿನಿ ಆಯ್ಕೆಯಾಗಿದ್ದಾರೆ.
ಅಚ್ಚುತಕುಮಾರ್: ತಿಪಟೂರು ತಾಲೂಕಿನ ಹೊನ್ನವಳ್ಳಿಯ 58 ವರ್ಷದ ಅಚ್ಚುತಕುಮಾರ್ ತಮ್ಮ ಉತ್ತಮ ಅಭಿನಯದ ಮೂಲಕ ಸ್ಯಾಂಡಲ್ವುಡ್ನಲ್ಲಿ ಶೇಷ್ಠ ನಟರ ಸಾಲಿನಲ್ಲಿ ಗುರುತಿಸಿಕೊಂಡಿದ್ದಾರೆ. ಕಲ್ಪತರು ಪ್ರಥಮ ದರ್ಜೆ ಕಾಲೇಜಿನಲ್ಲಿ ಪದವಿ ಶಿಕ್ಷಣ ಪಡೆದ ಅಚ್ಚುತ್ ರಂಗಭೂಮಿಯ ಸೆಳೆತದಿಂದ ಶಿವಮೊಗ್ಗ ಜಿಲ್ಲೆಯ ನೀನಾಸಂನಲ್ಲಿ ನಟನೆ ತರಬೇತಿ ಪ್ರಾರಂಭಿಸಿದರು. ನೀನಾಸಂನ ತಿರುಗಾಟದಲ್ಲಿ ಪ್ರಮುಖ ನಟರಾಗಿ ಕಾಣಿಸಿಕೊಂಡ ಅಚ್ಚುತ್ ಕುಮಾರ್ ತನ್ನೊಳಗಿನ ಅಭಿನಯ ಕಲೆಯನ್ನು ಓರೆಗಚ್ಚಿದರು.
ತಿಪಟೂರಿನ ಪ್ರೊೆಷನಲ್ ಥಿಯೇಟರ್ ಯುನಿಟ್ (ಪ್ರೊಥಿಯಾ) ಸಕ್ರಿಯಾ ಸದಸ್ಯರಾಗಿದ್ದ ಅಚ್ಚುತ್ ಕುಮಾರ್ ನಿರ್ದೇಶಕ ಗಿರೀಶ್ ಕಾಸರವಳ್ಳಿ ಕಣ್ಣಿಗೆ ಬಿದ್ದರು. 2000 ದಲ್ಲಿ ದೂರದರ್ಶನ ಧಾರವಾಹಿ ಮೂಲಕ ಕಿರುತೆರೆ ಪ್ರವೇಶಿಸಿದರು. 2007 ರಲ್ಲಿ ಚಿತ್ರರಂಗಕ್ಕೆ ಕಾಲಿಟ್ಟ ಅಚ್ಚುತ್ ಹಿಂದಿರುಗಿ ನೋಡಲಿಲ್ಲ. ಮೂರು ಬಾರಿ ಫಿಲ್ಮೇರ್ ಪ್ರಶಸ್ತಿ, ಕರ್ನಾಟಕ ರಾಜ್ಯ ಚಲನಚಿತ್ರ ಪಶಸ್ತಿಗು ಭಾಜನರಾಗಿದ್ದಾರೆ.