ಭಗತ್ ಸಿಂಗ್‌ರ ಹುತಾತ್ಮ ದಿನ: ಸಾರ್ವಜನಿಕ ಶಿಕ್ಷಣ ಉಳಿಸಿ ಪ್ರತಿಜ್ಞಾ ದಿನ

ಕಾರ್ಯಕ್ರಮದಲ್ಲಿ ಎಐಡಿಎಸ್‌ಒ ಜಿಲ್ಲಾ ಕಾರ್ಯದರ್ಶಿ ನಿತಿನ್ ಮಾತನಾಡಿ, ಕಳೆದ ನಾಲ್ಕು ತಿಂಗಳಿಂದ ಸರ್ಕಾರಿ ಶಾಲೆಗಳನ್ನು ಉಳಿಸುವ ಪ್ರತಿಭಟನೆಯ ಧ್ವನಿ ಕರ್ನಾಟಕದ ಬೀದಿ ಬೀದಿಗಳಲ್ಲಿ ಪ್ರತಿಧ್ವನಿಸುತ್ತಿದ್ದು, ಪ್ರತಿರೋಧದ ಕಿಚ್ಚು ಇನ್ನೂ ಜೀವಂತವಾಗಿದೆ ಎಂಬುದನ್ನು ಇದು ಸಾಬೀತುಪಡಿಸಿದೆ. ಆದರೆ, ಹೋರಾಟ ಇನ್ನೂ ಮುಗಿದಿಲ್ಲ.

 ಮ್ಯಾಗ್ನೆಟ್ ಎಂಬ ನೆಪದಲ್ಲಿ ಸರ್ಕಾರವು ಸರ್ಕಾರಿ ಶಾಲೆಗಳನ್ನು ವಿಲೀನಗೊಳಿಸಲು ಮತ್ತು ಹಂತ ಹಂತವಾಗಿ ಮುಚ್ಚಲು ಪ್ರಯತ್ನಿಸುತ್ತಿರುವಾಗ ನಾವು ನಮ್ಮ ಸೈದ್ಧಾಂತಿಕ ಬೇರುಗಳನ್ನು ಆಳಗೊಳಿಸಬೇಕು ಎಂದರು

ಹೋರಾಟಕ್ಕೆ ಸ್ಫೂರ್ತಿ ತುಂಬಲು ನಾವು ಭಗತ್ ಸಿಂಗ್ ಅವರ ಅದ್ವಿತೀಯ ಸಂಘರ್ಷದ ಕಡೆ ನೋಡಬೇಕಿದೆ. ಮಾ.23ರಂದು ಅವರ ಪರಮೋಚ್ಚ ಬಲಿದಾನದ ಸ್ಮರಣಾರ್ಥವಾಗಿ, ನಾವು ಪ್ರತಿಯೊಂದು ಹಳ್ಳಿಯನ್ನು ಪ್ರತಿರೋಧದ ಕೋಟೆಯನ್ನಾಗಿ ಪರಿವರ್ತಿಸಬೇಕು. 

ಇದು ಕೇವಲ ಸಾಂಕೇತಿಕ ಗೌರವ ಸಲ್ಲಿಸುವ ಸಮಯವಲ್ಲ, ಬದಲಾಗಿ ‘ಪೂರ್ಣ ಪ್ರತಿರೋಧದ ಪ್ರತಿಜ್ಞೆ’ ಮಾಡುವ ಸಮಯ ಎಂದು ನಿತಿನ್ ಹೇಳಿದರು. 

 ಕ್ರಾಂತಿಯ ಖಡ್ಗವು ವೈಚಾರಿಕತೆಯ ಸಾಣೆಕಲ್ಲಿನ ಮೇಲೆ ಹರಿತಗೊಳ್ಳುತ್ತದೆ ಎಂದು ಭಗತ್ ಸಿಂಗ್ ನಮಗೆ ನೆನಪಿಸಿದ್ದರು. ಮಹಾನ್ ಕ್ರಾಂತಿಕಾರಿಯ ವಿಚಾರ ಬಳಸಿಕೊಂಡು ನಮ್ಮ ಸಂಕಲ್ಪ ಹರಿತಗೊಳಿಸಬೇಕು. ಬಡ ಮಗುವಿನ ಶಿಕ್ಷಣದ ಹಕ್ಕನ್ನು ಯಾವ ನೀತಿಯೂ ಕಿತ್ತುಕೊಳ್ಳದಂತೆ ನೋಡಿಕೊಳ್ಳಬೇಕು.

ಭಗತ್ ಸಿಂಗ್ ಅವರು ಯಾವ ಉದ್ದೇಶಕ್ಕಾಗಿ ಪ್ರಾಣತ್ಯಾಗ ಮಾಡಿದರೋ ಅದರ ವಿರುದ್ಧದ ನೀತಿಯೇ ಕೆ.ಪಿ.ಎಸ್.ಮ್ಯಾಗ್ನೆಟ್ ಆಗಿದೆ. ಶಿಕ್ಷಣವನ್ನು ಮೂಲಭೂತ ಹಕ್ಕು ಎಂದು ಪರಿಗಣಿಸುವ ಬದಲು ಅನುಕೂಲಕ್ಕೆ ತಕ್ಕಂತೆ ಬಳಸುವ ಸಂಪನ್ಮೂಲ ಎಂದು ನೋಡುತ್ತಿದ್ದು, ಈ ಮೂಲಕ, ರಾಜ್ಯ ಸರ್ಕಾರವು ಒಂದು ವಿಭಜನೆಯನ್ನು ಸೃಷ್ಟಿಸಲು ಪ್ರಯತ್ನಿಸುತ್ತಿದೆ. 

ಇಲ್ಲಿ ಕೇವಲ ಕೆಲವು ಕೇಂದ್ರಗಳು ಮಾತ್ರ ಉಳಿಯುತ್ತವೆ.  ನಮ್ಮ ಹಳ್ಳಿಯ ಶಾಲೆಗಳು ನಶಿಸಿಹೋಗುತ್ತವೆ. ಅವರ ಎಚ್ಚರಿಕೆಯನ್ನು ನಾವು ನೆನಪಿಸಿಕೊಳ್ಳಲೇಬೇಕು ಎಂದರು. 

ಜನರು ಸಾಮಾನ್ಯವಾಗಿ ಸ್ಥಾಪಿತ ವ್ಯವಸ್ಥೆಗೆ ಒಗ್ಗಿಕೊಳ್ಳುತ್ತಾರೆ. ಜತೆಗೆ, ಬದಲಾವಣೆಯ ಕಲ್ಪನೆಯನ್ನು ಕೇಳಿಯೇ ನಡುಗುತ್ತಾರೆ. ಈ ಜಡ ಮನೋಭಾವದ ಜಾಗದಲ್ಲಿ ಕ್ರಾಂತಿಕಾರಿ ಚೈತನ್ಯ ಬರಬೇಕಿದೆ. 

ನಮ್ಮ ಶಾಲೆಗಳ ಮುಚ್ಚುವಿಕೆಗೆ ಒಗ್ಗಿಕೊಳ್ಳಲು ನಾವು ನಿರಾಕರಿಸುತ್ತೇವೆ. ಆಡಳಿತಾತ್ಮಕ ಅನುಕೂಲಕ್ಕಾಗಿ ನಮ್ಮ ಮಕ್ಕಳ ಭವಿಷ್ಯವನ್ನು ಬಲಿ ಕೊಡುವ ಈ ಜಡ ಮನೋಭಾವ ಒಪ್ಪುವುದಿಲ್ಲ ಎಂದು ಘೋಷಿಸುವ ಸಮಯ ಇದಾಗಿದೆ ಎಂದೂ ಹೇಳಿದರು.

ಮುಖಂಡರಾದ ಚಂದ್ರಿಕಾ, ಅಭಿ, ದಿನಾ, ಚಂದ್ರಕಲಾ, ಶಿವಪ್ರಕಾಶ್, ಸ್ವಾಮಿನಾಥ್, ಕೃಷ್ಣಪ್ರಸಾದ್ ಇನ್ನಿತರರಿದ್ದರು