19 ಬೇಚರಾಕ್ ಹಳ್ಳಿಗಳಿನ್ನು ಕಂದಾಯ ಗ್ರಾಮ

ಕಂದಾಯ ಇಲಾಖೆಯಲ್ಲಿ ಆಗಿರುವ ಈ ಎಲ್ಲ ಕಾರ್ಯಗಳು ರೈತರ ಸಾಕಷ್ಟು ಸಮಸ್ಯೆಗಳಿಗೆ ಪರಿಹಾರ ನೀಡಬಲ್ಲವು. ಆರ್‌ಟಿಸಿ ಪಡೆಯಬೇಕೆಂದರೆ ಪರಿತಪಿಸುತ್ತಿದ್ದ ಹಾಗೂ ಭೂಮಿಯ ದಾಖಲೆಗಳನ್ನು ಪಡೆಯಬೇಕೆಂದರೆ ಹರಸಾಹಸಪಡುವ ಕಾಲವೂ ಇತ್ತು. ಆದರೆ ಕಂದಾಯ ಮಂತ್ರಿ ಕೃಷ್ಣಬೈರೇಗೌಡರ ನಿರ್ದೇಶನದಂತೆ ಕಂದಾಯ ಇಲಾಖೆ ಆಧುನಿಕ ತಂತ್ರಜ್ಞಾನ ಬಳಕೆಯತ್ತ ಮುಖ ಮಾಡಿದ ಮೇಲೆ ಅಧಿಕಾರಿಗಳೂ ಹೊಸತನಕ್ಕೆ ತಮ್ಮನ್ನು ತಾವು ತೊಡಗಿಸಿಕೊಂಡಿದ್ದಾರೆ. ಪರಿಣಾಮ ವ್ಯವಸ್ಥೆಯಲ್ಲಿನ ಸುಧಾರಣೆ ಕಾಣತೊಡಗಿದ್ದು, ಹುಣಸೂರು ತಾಲೂಕು ಕಂದಾಯ ಇಲಾಖೆ ಪರಿಣಾಮಕಾರಿಯಾಗಿ ಕಾರ್ಯನಿರ್ವಹಿಸುತ್ತಿದೆ. ಹಲವು ಅಭಿಯಾನಗಳ ಮೂಲಕ ತಾಲೂಕು ಕಚೇರಿಗೆ ಜನರು ಅಲೆಯುವುದನ್ನು ತಪ್ಪಿಸಲು ಕ್ರಮವಹಿಸಲಾಗಿದೆ.

ಕಂದಾಯ ಗ್ರಾಮಗಳಾದ ಬೇಚರಾಕ್ ಗ್ರಾಮಗಳು: ತಾಲೂಕಿನಲ್ಲಿ 19 ಬೇಚರಾಕ್ ಗ್ರಾಮಗಳು ಕಂದಾಯ ಗ್ರಾಮವಾಗಬೇಕೆಂದು 40 ವರ್ಷಗಳಿಂದ ತಾಲೂಕು ಆಡಳಿತದ ಮೇಲೆ ಒತ್ತಡ ಹೇರಿ ಹೋರಾಟ ನಡೆಸಲಾಗಿತ್ತು. ಅಧಿಕೃತವಾಗಿ ಕಂದಾಯ ಸ್ಥಾನಮಾನ ಇಲ್ಲದ ಗ್ರಾಮಗಳನ್ನು ಬೇಚರಾಕ್ ಗ್ರಾಮಗಳೆಂದು ಗುರುತಿಸಲಾಗುತ್ತದೆ. ಪ್ರಮುಖ ಗ್ರಾಮವೊಂದರ ಹೊರವಲಯದಲ್ಲಿ ಹುಟ್ಟಿಕೊಂಡ ಸಮೂಹವೊಂದರ ಪ್ರದೇಶ ತನ್ನ ಎಲ್ಲ ಆಗುಹೋಗುಗಳನ್ನು ಪ್ರಮುಖ ಗ್ರಾಮದೊಂದಿಗೆ ಹೊಂದಿರುತ್ತದೆ. ಭೂಮಿಯ ಆಸ್ತಿಯ ದಾಖಲೆಗಳು ಪ್ರಮುಖ ಗ್ರಾಮದ ಹೆಸರಿನಲ್ಲಿಯೇ ಇರುತ್ತದೆ. ಸಣ್ಣ ಸಮೂಹವಿರುವ ಪ್ರದೇಶದಲ್ಲಿ ಗ್ರಾಮಠಾಣಾವಾಗಲಿ, ಮೂಲಸೌಕರ್ಯಗಳಾಗಲಿ ದುರ್ಲಭವಾಗಿರುತ್ತದೆ. ಅಲ್ಲಿನ ಕುಟುಂಬಗಳಲ್ಲಿ ತಮ್ಮ ಆಸ್ತಿಯ ಮೇಲಿನ ಹಕ್ಕನ್ನು ಪ್ರತಿಪಾದಿಸಲು ಅಗತ್ಯ ದಾಖಲೆಗಳು ಇರುವುದಿಲ್ಲ. ಆಸ್ತಿ ಹಂಚಿಕೆ, ಮಾರಾಟ, ಖರೀದಿ, ಬ್ಯಾಂಕ್ ಸಾಲಸೌಲಭ್ಯ ಇದ್ಯಾವುದಕ್ಕೂ ಸರ್ಕಾರದ ಅಧಿಕೃತ ಮನ್ನಣೆ ಸಿಗುವುದಿಲ್ಲ. ಇದರಿಂದಾಗಿ ಬೇಚರಾಕ್ ಗ್ರಾಮದ ನಿವಾಸಿಗಳಿಗೆ ಅಭಿವೃದ್ಧಿ ಎನ್ನುವುದು ಗಗನಕುಸುಮವಾಗಿದೆ.

2019ರಲ್ಲಿ ರಾಜ್ಯ ಸರ್ಕಾರ ಬೇಚರಾಕ್ ಗ್ರಾಮಗಳನ್ನು ಕಂದಾಯ ಗ್ರಾಮಗಳಾಗಿ ಪರಿವರ್ತಿಸಲು ಸೂಚಿಸಿ ಆದೇಶಿಸಿತು. ಅದರಂತೆ ತಾಲೂಕಿನಲ್ಲಿ ಪ್ರಸ್ತುತ 19 ಬೇಚರಾಕ್ ಗ್ರಾಮಗಳ ಪೈಕಿ ಇದೀಗ 18 ಕಂದಾಯ ಗ್ರಾಮಗಳಾಗಿ ಮತ್ತು 5 ಉಪಗ್ರಾಮಗಳ ಪೈಕಿ ಒಂದು ಉಪಗ್ರಾಮ ಕಂದಾಯ ಗ್ರಾಮವಾಗಿ ಪರಿವರ್ತಿತವಾಗಿದೆ. ದಶಕಗಳ ಕಾಲ ತಮ್ಮ ಆಸ್ತಿ ಪಾಸ್ತಿ, ಹಕ್ಕು, ವ್ಯವಹಾರಕ್ಕೆ ಮನ್ನಣೆಯೇ ಸಿಗದೆ ಆರ್ಥಿಕವಾಗಿ ಕುಗ್ಗಿಹೋಗಿದ್ದ ಈ ಎಲ್ಲ ಗ್ರಾಮಗಳ ನಿವಾಸಿಗಳು ಇದೀಗ ನಿಟ್ಟುಸಿರು ಬಿಡುವಂತಾಗಿದೆ. 18 ಗ್ರಾಮಗಳಲ್ಲಿ ಒಟ್ಟು 592 ಹಕ್ಕುಪತ್ರಗಳನ್ನು ಅನುಮೋದನೆಗೊಂಡಿದ್ದು, 274 ಆಸ್ತಿಗಳನ್ನು ನೋಂದಣಿ ಮಾಡಿಕೊಡಲಾಗಿದೆ. ಬಾಕಿಯಿರುವ ಹಕ್ಕುಪತ್ರಗಳನ್ನು ಶೀಘ್ರ ನೋಂದಣಿ ಮಾಡಿಕೊಡಲಾಗುವುದು ಎಂದು ತಹಸೀಲ್ದಾರ್ ಜೆ.ಮಂಜುನಾಥ್ ತಿಳಿಸಿದ್ದಾರೆ.