ತುಮಕೂರು: ನನ್ನ ಕೊಲೆಗೆ ಸುಪಾರಿ ಕೊಟ್ಟಿರುವ ಬಗ್ಗೆ ಎಂಎಲ್ಸಿ ಆರ್.ರಾಜೇಂದ್ರ ಶುಕ್ರವಾರ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಕೆ.ವಿ.ಅಶೋಕ್ರನ್ನು ಭೇಟಿ ಮಾಡಿ ಸಾಕ್ಷ್ಯ ಒದಗಿಸುವ "ಪೆನ್ ಡ್ರೈವ್' ಸಮೇತ ಲಿಖಿತ ದೂರನ್ನು ಸಲ್ಲಿಸಿದರು.
ಎಸ್ಪಿ ಸಲಹೆಯಂತೆ ಘಟನೆ ನಡೆದ ವ್ಯಾಪ್ತಿಗೆ ಬರುವ ಕ್ಯಾತಸಂದ್ರ ಠಾಣೆಗೆ ತೆರಳಿ ರಾಜೇಂದ್ರ ದೂರು ನೀಡಿದರು. ಈ ದೂರಿನಲ್ಲಿ ಸಿಎಂ ಆಪ್ತ ಬೆಂಬಲಿಗರಾದ ನಮ್ಮ ತಂದೆ ಸಹಕಾರ ಸಚಿವ ಕೆ.ಎನ್.ರಾಜಣ್ಣ ಹಾಗೂ ದೂರುದಾರನಾದ ನನ್ನ ವಿರುದ್ಧ ಬಲವಾದ ರಾಜಕೀಯ ದ್ವೇಷವನ್ನು ಕೆಲವು ಉನ್ನತ ರಾಜಕಾರಣಿಗಳು ಹೊಂದಿದ್ದು, ಬೆದರಿಕೆ, ಕ್ರಿಮಿನಲ್ ಒಳಸಂಚು ಹಾಗೂ ಆಮಿಷಗಳ ಮಾರ್ಗದಿಂದ ರಾಜಕೀಯವಾಗಿ ಸಂಚು ರೂಪಿಸುತ್ತಾರೆ ಎಂದು ದೂರಿದ್ದಾರೆ.
ಬೆಂಗಳೂರು ಮೂಲದ ಪ್ರಬಲ ವ್ಯಕ್ತಿಗಳು ಈ ಪಿತೂರಿ ನಡೆಸಿದ್ದು ಈ ಕೊಲೆ ಸಂಚಿಗೆ 70 ಲಕ್ಷ ರೂ., ಸುಪಾರಿ ಕೊಟ್ಟಿದ್ದು ದುಷ್ಕರ್ಮಿಗಳಿಗೆ 5 ಲಕ್ಷ ರೂ., ಮುಂಗಡವಾಗಿ ಕೊಟ್ಟಿರುವುದು ಆಡಿಯೋ ಸಂಭಾಷಣೆಯಲ್ಲಿರುವುದನ್ನು ದೂರಿನಲ್ಲಿ ರಾಜೇಂದ್ರ ಉಲ್ಲೇಖಿಸಿರುವುದು ಕುತೂಹಲಕಾರಿ ಅಂಶವೆನಿಸಿದೆ.