ಮುದಗಲ್: ಹಿಂಗಾರು ಹಂಗಾಮಿನ ಎಳ್ಳ ಅಮವಾಸ್ಯೆಯ ಚರಗ ಹಬ್ಬವನ್ನು ಶುಕ್ರವಾರ ರೈತರು ಸಂಭ್ರಮದಿಂದ ಆಚರಿಸಿದರು. ಎಳ್ಳು, ಶೇಂಗಾ ಹೋಳಿಗೆ, ಸಜ್ಜೆ ರೊಟ್ಟಿ, ಕಾಳು ಪಲ್ಯ, ಹಪ್ಪಳ, ಸಂಡಿಗೆ ಹೀಗೆ ಬಗೆಯ ಖಾದ್ಯ ತಯಾರಿಸಿದ್ದ ಮಹಿಳೆಯರು, ಕುಟುಂಬ ಸಮೇತ ತಮ್ಮ ತಮ್ಮ ಜಮೀನುಗಳಿಗೆ ತೆರಳಿ ಭೂತಾಯಿಗೆ ಪೂಜೆ ಸಲ್ಲಿಸಿ ಸಾಮೂಹಿಕ ಭೋಜನ ಸವಿದರು. ರೈತ ಸಂಗಾತಿ ಆಗಿರುವ ರಾಸುಗಳಿಗೆ ಸಿಂಗರಿಸಿ ಕೃಷಿಕರು ಎತ್ತಿನ ಬಂಡಿಯಲ್ಲಿ ಜಮೀನುಗಳಿಗೆ ತೆರಳುತಿದ್ದ ದೃಶ್ಯ ಸಾಮಾನ್ಯವಾಗಿತ್ತು. ಹಿಂಗಾರು ಮುಖ್ಯ ಬೆಳೆಯಾದ ಬಿಳಿ ಜೋಳ, ಕಡಲೆ ಈ ವರ್ಷ ಉತ್ತಮವಾಗಿ ಬೆಳೆದಿರುವುದು ಎಳ್ಳ ಅಮಾವಾಸ್ಯೆ ಸಂಭ್ರಮ ಇಮ್ಮಡಿಗೊಳಿಸಿತು.