ಕೊಳ್ಳೇಗಾಲ: ತಾಲೂಕಿನ ಪಾಳ್ಯ ಗ್ರಾಮದಲ್ಲಿ ಭಾನುವಾರ ಆಯೋಜಿಸಿದ್ದ ರಾಗಿಮುದ್ದೆ-ಕೋಳಿ ಸಾಂಬಾರ್ ತಿನ್ನುವ ಸ್ಪರ್ಧೆಯಲ್ಲಿ 6 ನಿಮಿಷದಲ್ಲಿ 11 ಮುದ್ದೆ ತಿಂದು ಗಾಡಿ ಕುನ್ನ ಸೀಗನಾಯಕ ಪ್ರಥಮ ಸ್ಥಾನ ಪಡೆದರು. ಮಹಿಳೆಯರ ವಿಭಾಗದಲ್ಲಿ 8 ನಿಮಿಷದಲ್ಲಿ 5 ಮುದ್ದೆ ತಿಂದು ಮಹದೇವಮ್ಮ ಪ್ರಥಮ ಸ್ಥಾನ ಗಳಿಸಿದರು.
ಗ್ರಾಮದ ನಿವಾಸಿ ಎಸ್.ರವಿಕುಮಾರ್ ಪ್ರಥಮ ಬಾರಿಗೆ ರಾಗಿ ಮುದ್ದೆ ತಿನ್ನುವ ಸ್ಪರ್ಧೆ ಏರ್ಪಡಿಸಿದ್ದರು. ಪಂದ್ಯವನ್ನು 10 ನಿಮಿಷ ಊಟದ ಸ್ಪರ್ಧೆಯನ್ನು ಏರ್ಪಡಿಸಲಾಗಿತ್ತು. ಪುರುಷರ ವಿಭಾಗದಲ್ಲಿ ಗೆದ್ದವರಿಗೆ ಪ್ರಥಮ ಬಹುಮಾನವಾಗಿ 5 ಸಾವಿರ ನಗದು ಹಾಗೂ ಒಂದು ಸೆಟ್ ರಾಮ್ರಾಜ್ ಬಟ್ಟೆ, ದ್ವಿತೀಯ ಬಹುಮಾನ 2500 ನಗದು, ಒಂದು ಸೆಟ್ ರಾಮ್ರಾಜ್ ಬಟ್ಟೆ ಮಹಿಳೆಯರಿಗೆ ಪ್ರಥಮ ಬಹುಮಾನ 2,500 ನಗದು ಹಾಗೂ 1 ಸೀರೆ, ದ್ವಿತೀಯ ಬಹುಮಾನ 2 ಸಾವಿರ ನಗದು ಹಾಗೂ 1 ಸೀರೆ ಬಹುಮಾನ ನಿಗದಿಪಡಿಸಲಾಗಿತ್ತು.
ಪಂದ್ಯದಲ್ಲಿ 220 ಗ್ರಾಂ ತೂಕದ 200 ರಾಗಿ ಮುದ್ದೆ, 25 ಕೆಜಿ ನಾಟಿ ಕೋಳಿ ಸಾಂಬರ್ ತಯಾರಿಸಲಾಗಿತ್ತು. 11 ಜನ ಪುರುಷರು, 4 ಮಹಿಳೆಯರು ಭಾಗವಹಿಸಿದ್ದರು. ಪುರುಷರಲ್ಲಿ ಗಾಡಿ ಕುನ್ನಸೀಗ ನಾಯಕ 6 ನಿಮಿಷದಲ್ಲಿ 11 ಮುದ್ದೆ ತಿಂದು ಪ್ರಥಮ ಸ್ಥಾನ, ನಾಗಮಲ್ಲ ನಾಯಕ 7 ನಿಮಿಷದಲ್ಲಿ 9 ಮುದ್ದೆ ಊಟ ಮಾಡಿ ದ್ವಿತೀಯ ಸ್ಥಾನ ಪಡೆದರು. ಮಹಿಳೆಯರಲ್ಲಿ ಮಹದೇವಮ್ಮ 8 ನಿಮಿಷದಲ್ಲಿ 5 ಮುದ್ದೆ ತಿಂದು ಪ್ರಥಮ, ಸ್ಫೂರ್ತಿ 8 ನಿಮಿಷದಲ್ಲಿ 3 ಮುದ್ದೆ ತಿಂದು ಎರಡನೇ ಸ್ಥಾನ ಪಡೆದರು.
ಗ್ರಾಂಪಂ ಮಾಜಿ ಅಧ್ಯಕ್ಷ ಬಿ.ರವಿ, ಪಶು ಇಲಾಖೆಯ ವೈದ್ಯ ರಾಚಪ್ಪಾಜಿ, ದೈಹಿಕ ಶಿಕ್ಷಣ ಶಿಕ್ಷಕ ಬಸವರಾಜು, ಶಿವರುದ್ರಸ್ವಾಮಿ, ಮುಖಂಡರಾದ ಶಿವಪ್ರಕಾಶ್ ನಾಯಕ, ನಂಜುಂಡಸ್ವಾಮಿ, ಮಧುನಾಯಕ ಪ್ರಸಾದ್, ರಾಮು, ರಂಗಸ್ವಾಮಿ ಇತರರು ಇದ್ದರು.