ಕೊಪ್ಪದಲ್ಲಿ ಸಾಮರಸ್ಯದ ಉತ್ಸವ

ಮದ್ದೂರು: ತಾಲೂಕಿನ ಕೊಪ್ಪದಲ್ಲಿ ಹಿಂದು ಮುಸ್ಲಿಮರು ಒಗ್ಗೂಡಿ ಗೌರಿ, ಗಣೇಶನ ರ್ಮೂರ್ತಿಗಳನ್ನು ವಿಸರ್ಜಿಸುವ ಮೂಲಕ ಗಮನ ಸೆಳೆದರು.

ಗ್ರಾಮದ ಇಂದಿರಾ ನಗರದಲ್ಲಿ 11 ದಿನಗಳಿಂದ ಗೌರಿ, ಗಣೇಶನ ಮೂರ್ತಿಗಳನ್ನು ಪ್ರತಿಷ್ಠಾಪಿಸಲಾಗಿತ್ತು. ಈ ವೇಳೆ ಪ್ರತಿನಿತ್ಯ ಹಿಂದು ಮುಸ್ಲಿಮರು ಒಟ್ಟಿಗೆ ಸೇರಿ ಗಣೇಶನಿಗೆ ವಿಶೇಷ ಪೂಜೆ ಸಲ್ಲಿಸುವ ಮೂಲಕ ಶಾಂತಿ ಸೌಹಾರ್ದತೆ ಮೆರೆದರು.

ಗುರುವಾರ 11ನೇ ದಿನವಾದ ಕಾರಣ ಇಂದಿರಾನಗರದಿಂದ ಕೊಪ್ಪ ಕೆರೆಯವರೆಗೆ ಅದ್ದೂರಿ ಮೆರವಣಿಗೆ ಹಮ್ಮಿಕೊಳ್ಳಲಾಗಿತ್ತು. ಈ ವೇಳೆ ಮುಸ್ಲಿಮರು ಸಾರ್ವಜನಿಕರಿಗೆ ನೀರು, ಸಿಹಿ ವಿತರಿಸಿದರು.

ಸುಮಾರು 15 ವರ್ಷಗಳಿಂದ ಕೊಪ್ಪದಲ್ಲಿ ಹಿಂದು ಮುಸ್ಲಿಮರು ಒಟ್ಟಿಗೆ ಸೇರಿಕೊಂಡು ಏಕತೆ ಸಾರುವ ಗಣೇಶೋತ್ಸವ ಆಚರಣೆ ಮಾಡುತ್ತಿರುವುದು ಮಾದರಿಯಾಗಿದೆ. ಈ ವೇಳೆ ಪರ್ವಿಜ್ ಅಹಮದ್, ರುದ್ರೇಶ್, ಕೃಷ್ಣ, ಸುನಿಲ್, ಅಭಿ, ಸಂತೋಷ್, ನಾಜಿಮ್, ಶೇರು, ಶರತ್, ಪುನಿ, ರವಿ, ಅತಿಕ್ ಇತರರು ಇದ್ದರು.