ಜಿನ್ನಾಗರದಮ್ಮ ಮಹಿಮೆ ಅಪಾರ

ತಾಲೂಕಿನ ಹೊಟ್ಟೇಗೌಡನದೊಡ್ಡಿ ಗ್ರಾಮದ ಸುಂದರ ಪರಿಸರದಲ್ಲಿ ನೆಲೆಗೊಂಡಿರುವ ಶ್ರೀ ಜಿನ್ನಾಗರದಮ್ಮ ದೊಡ್ಡಮ್ಮ ದೇವಿ ಭಕ್ತರ ಇಷ್ಟಾರ್ಥಗಳನ್ನು ಈಡೇರಿಸುವ ಮೂಲಕ ಆರಾಧ್ಯ ದೇವಿಯಾಗಿ ನೆಲೆಸಿದ್ದಾಳೆ. ದೇಗುಲಕ್ಕೆ ಆಗಮಿಸಿ ಶ್ರದ್ಧಾ-ಭಕ್ತಿಯಿಂದ ಪೂಜಿ ಸಲ್ಲಿಸಿದರೆ ವಿವಾಹವಾಗದವರಿಗೆ ವಿವಾಹ, ಸಂತಾನ ಪ್ರಾಪ್ತಿ, ವ್ಯಾಪಾರದಲ್ಲಿ ಲಾಭ ಸೇರಿದಂತೆ ಜೀವನದಲ್ಲಿ ಅಂದುಕೊಂಡ ಎಲ್ಲ ಇಷ್ಟಾರ್ಥಗಳೂ ಇಲ್ಲಿ ಈಡೇರುತ್ತದೆ. ಇದರೊಂದಿಗೆ ಕಷ್ಟಗಳು ಮಂಜಿನಂತೆ ಕರಗಿ ಜೀವನದಲ್ಲಿ ಸುಖ, ಶಾಂತಿ ಹಾಗೂ ನೆಮ್ಮದಿ ನೆಲೆಸುತ್ತದೆ ಎಂಬುದು ಭಕ್ತರ ನಂಬಿಕೆ.

ತಾಲೂಕಿನ ಹೊಟ್ಟೇಗೌಡನದೊಡ್ಡಿ, ನಿಡಘಟ್ಟ, ಹುಣಸೇಮರದೊಡ್ಡಿ, ಗೌಡಗೆರೆ ಸೇರಿದಂತೆ ಮಂಡ್ಯ, ಬೆಂಗಳೂರು, ಮೈಸೂರು ಸೇರಿದಂತೆ ವಿವಿಧ ಭಾಗಗಳಲ್ಲಿ ಅಪಾರವಾದ ಭಕ್ತ ಸಮೂಹವಿದೆ. ದೇಗುಲಕ್ಕೆ ಬಂದು ವಿಶೇಷ ಪೂಜೆ ಸಲ್ಲಿಸಿ ಹರಕೆ ಕಟ್ಟಿಕೊಂಡು ಹೋದವರು ಹರಕೆ ಈಡೇರಿದ ನಂತರ ದೇಗುಲಕ್ಕೆ ಆಗಮಿಸಿ ಹೂವಿನ ಅಲಂಕಾರ, ಪಂಚಾಮೃತ ಅಭಿಷೇಕ, ಅನ್ನ ಸಂತರ್ಪಣೆ ಸೇರಿದಂತೆ ಶಕ್ತಿಯಾನುಸಾರ ದೇವಿಯ ಸೇವೆ ಮಾಡುವುದು ಇಂದಿಗೂ ರೂಢಿಯಲ್ಲಿದೆ.

ಮಹಿಳೆಯರು ಸತತ 9 ವಾರಗಳ ಕಾಲ ದೇಗುಲಕ್ಕೆ ಆಗಮಿಸಿ ದೇವಿಗೆ ಮಡಿಲಕ್ಕಿ, ಸೀರೆ, ರವಕೆ ಕಣ, ಹೂವು, ಅರಿಶಿಣ ಕುಂಕುಮ ನೀಡಿದರೆ ಇಷ್ಟಾರ್ಥ ಈಡೇರುತ್ತದೆ ಎಂಬುವುದು ಮಹಿಳಾ ಭಕ್ತರ ನಂಬಿಕೆ. ಅಲ್ಲದೆ ದೇವಿಗೆ ಮಹಿಳಾ ಭಕ್ತರು ಹೆಚ್ಚಿನ ಸಂಖ್ಯೆಯಲ್ಲಿರುವುದು ವಿಶೇಷ.

ಹೂ ಕೊಡುವ ದೇವಿ: ದೇಗುಲದಲ್ಲಿ ಪ್ರತಿ ಮಂಗಳವಾರ, ಶುಕ್ರವಾರ ಹಾಗೂ ಭಾನುವಾರ ವಿಶೇಷ ಪೂಜಾ ಕಾರ್ಯಕ್ರಮ ನೆರವೇರಲಿದ್ದು, ಭಕ್ತರಿಗೆ ತೀರ್ಥ ಪ್ರಸಾದ ವಿತರಣೆ ಮಾಡಲಾಗುತ್ತದೆ. ಈ ದಿನಗಳಲ್ಲಿ ದೇವಿ ಬಲ ಭಾಗದಿಂದ ಹೂವು ನೀಡಿದರೆ ಭಕ್ತರ ಇಷ್ಟಾರ್ಥ ಈಡೇರುತ್ತದೆ ಎಂಬುದು ಬಲವಾದ ನಂಬಿಕೆ.

ಮಾರ್ಗ: ಮದ್ದೂರಿನಿಂದ ನಿಡಘಟ್ಟ ಮಾರ್ಗವಾಗಿ 9 ಕಿ.ಮೀ., ಚನ್ನಪಟ್ಟಣದಿಂದ ನಿಡಘಟ್ಟ ಮಾರ್ಗವಾಗಿ 14 ಕಿ.ಮೀ. ಹಾಗೂ ಬೆಸಗರಹಳ್ಳಿಯಿಂದ ನಿಡಘಟ್ಟ ಮಾರ್ಗವಾಗಿ 10 ಕಿ.ಮೀ.ದೂರ ಕ್ರಮಿಸಿದರೆ ದೇಗುಲ ಸಿಗಲಿದೆ.