ಕಬ್ಬು ಬೆಳೆದವರ ಬದುಕಲ್ಲಿ ಕತ್ತಲು

ಕಬ್ಬು ಬೆಳೆಗಾರರಿಗೆ ಸರ್ಕಾರ ಆದೇಶದ ಪ್ರಕಾರ 50 ರೂ. ಪ್ರೋತ್ಸಾಹ ಧನ ನೀಡುವ ಸಂಬಂಧಿಸಿದಂತೆ ತಾಲೂಕಿನಲ್ಲಿರುವ ಕೊಪ್ಪದ ಎನ್‌ಎಸ್‌ಎಲ್ ಹಾಗೂ ಭಾರತೀನಗರದ ಚಾಂಷುಗರ್ ಕಾರ್ಖಾನೆಗಳು ನ್ಯಾಯಾಲಯದ ಮೊರೆ ಹೋಗಿವೆ. ಈ ನಡುವೆ 50 ರೂ. ಪ್ರೋತ್ಸಾಹ ಧನವನ್ನು ಈ ಕೂಡಲೇ ಪಾವತಿಸಿ ನಂತರ ಕಬ್ಬು ಅರೆಯಬೇಕೆಂದು ಕಬ್ಬು ಬೆಳೆಗಾರರು, ರೈತ ಸಂಘದವರು ಹಾಗೂ ವಿವಿಧ ಪ್ರಗತಿಪರ ಸಂಘಟನೆಗಳು ಕಾರ್ಖಾನೆಗಳ ಮಾಲೀಕರ ವಿರುದ್ಧ ಹೋರಾಟ ಮಾಡಿದ್ದವು. ಸಾಮಾನ್ಯವಾಗಿ ಜೂನ್ ತಿಂಗಳಲ್ಲಿ ಸಕ್ಕರೆ ಕಾರ್ಖಾನೆಗಳು ಕಬ್ಬು ಅರೆಯುವುದು ವಾಡಿಕೆಯಾಗಿದ್ದು, ಈ ಬಾರಿ ಒಂದು ತಿಂಗಳ ನಂತರ ಜು.10 ರಂದು ಶುಕ್ರವಾರದಿಂದ ತಾಲೂಕಿನ ಎರಡು ಕಾರ್ಖಾನೆಗಳನ್ನು ಕಬ್ಬು ಅರೆಯುವುದನ್ನು ಪ್ರಾರಂಭಿಸಿವೆ. ಒಂದು ತಿಂಗಳು ತಡವಾಗಿರುವುದರಿಂದ ರೈತರಿಗೆ ಹಲವು ರೀತಿಯಲ್ಲಿ ಸಮಸ್ಯೆ ಉಂಟಾಗಲಿದೆ.

ಹೌದು, ಈಗಾಗಲೇ ಕಾರ್ಖಾನೆಗಳು ಕಬ್ಬು ಅರೆಯುವ ಕಾರ್ಯ ಒಂದು ತಿಂಗಳು ತಡವಾಗಿದೆ. ಕಬ್ಬು ಬೆಳೆ ಜಮೀನಲ್ಲೇ ಕಡಿಯದೆ ಹಾಗೆ ಉಳಿದು ಕೊಂಡಿದೆ. ಮೇಘರಾಜನ ಕೃಪೆಯಿಲ್ಲದೇ ಫಸಲು ಒಣಗುವ ಸ್ಥಿತಿಗೆ ಬಂದಿದೆ. ಇದರಿಂದ ಇಳುವರಿ ಕಡಿಮೆಯಾಗಿ ರೈತರಿಗೆ ಆರ್ಥಿಕವಾಗಿ ನಷ್ಟ ಉಂಟಾಗುತ್ತದೆ.

ಕಬ್ಬು ಒಣಗಿ ಇಳುವರಿ ಕಡಿಮೆಯಾಗಿರುವುದರಿಂದ ಬೆಳೆಗಾರರ ಹಿತದೃಷ್ಟಿಯಿಂದ ಕಾರ್ಖಾನೆಯ ವತಿಯಿಂದಲೇ ಕಬ್ಬು ಕಾಟಾವು ಹಾಗೂ ಸಾಗಣೆ ವೆಚ್ಚ ಭರಿಸುವ ಮೂಲಕ ರೈತರಿಗೆ ಅನುಕೂಲ ಕಲ್ಪಿಸಬೇಕೆಂದು ರೈತರು ಆಗ್ರಹಿಸಿದ್ದಾರೆ.

ಕೊಪ್ಪದ ಎನ್.ಎಸ್.ಎಲ್.ಕಾರ್ಖಾನೆಯು ಶುಕ್ರವಾರದಿಂದ ಕಬ್ಬು ಅರೆಯುವುದನ್ನು ಪ್ರಾರಂಭಿಸಿದೆ. ಪ್ರಸಕ್ತ ವರ್ಷ 8.50 ಲಕ್ಷ ಮೆ.ಟನ್ ಕಬ್ಬು ಅರೆಯುವ ಗುರಿ ಹೊಂದಿದ್ದು, ಪ್ರತಿನಿತ್ಯ 5 ಸಾವಿರ ಮೆ.ಟನ್ ಕಬ್ಬು ಅರೆಯುವ ಸಾಮಾರ್ಥ್ಯ ಹೊಂದಿದೆ. ಮುಂದಿನ ದಿನಗಳಲ್ಲಿ ಮಳೆ ಬಾರದೆ ಹೋದರೆ ರೈತರಿಗೂ ಹಾಗೂ ಕಾರ್ಖಾನೆಗೂ ಕಷ್ಟವಾಗುತ್ತದೆ ಎಂದು ಅಧಿಕಾರಿಗಳು ಆತಂಕ ವ್ಯಕ್ತಪಡಿಸಿದ್ದಾರೆ.