ಸನಾತನ ಧರ್ಮ ಮಾಡಿಲ್ಲ ಯಾವುದೇ ತಾರತಮ್ಯ...

ಬ್ರಹ್ಮಾನಂದ ಸರಸ್ವತಿ ಶ್ರೀ ಆಶೀರ್ವಚನ

ಮಹಾಭಿವಂದ್ಯ ಗೌರವಾರ್ಪಣೆ ಸ್ವೀಕಾರ

ವಿಜಯವಾಣಿ ಸುದ್ದಿಜಾಲ ಉಡುಪಿ

ಹೃದಯದಲ್ಲಿ ಅರಳುವ ಸದ್ಭಾವನೆಯೇ ಸಾಕ್ಷಾತ್​ ದೇವರಾಗಿದೆ. ಎಲ್ಲರ ಆತ್ಮವೂ ಪವಿತ್ರವಾಗಿದ್ದು ಬಡವ, ಶ್ರೀಮಂತ, ಮೇಲ್ಜಾತಿ, ಕೀಳು ಜಾತಿ ಎಂಬ ಭೇದ-ಭಾವ ಮಾಡಬಾರದು. ಪವಿತ್ರತೆಯ ವಿಕಸನವೇ ಅಧ್ಯಾತ್ಮವಾಗಿದೆ. ಧರ್ಮವೂ ಸಹ ಅದನ್ನೇ ಬಯಸುತ್ತದೆ. ಈ ವಿಚಾರವಾಗಿ ಸನಾತನ ಧರ್ಮ ಯಾವುದೇ ತಾರತಮ್ಯ ಮಾಡಿಲ್ಲ ಎಂದು ಧರ್ಮಸ್ಥಳ ಶ್ರೀ ರಾಮಕ್ಷೇತ್ರ ಮಹಾಸಂಸ್ಥಾನದ ಬ್ರಹ್ಮಾನಂದ ಸರಸ್ವತಿ ಸ್ವಾಮೀಜಿ ನುಡಿದರು.

ಉಡುಪಿ ಬನ್ನಂಜೆಯ ನಾರಾಯಣಗುರು ಆಡಿಟೋರಿಯಂನಲ್ಲಿ ಆತ್ಮಾನಂದ ಸರಸ್ವತಿ ಕಿರಿಯ ತಾಂತ್ರಿಕ ಮಹಾವಿದ್ಯಾಲಯ ಬಿಲ್ಲಾಡಿ, ಧರ್ಮಸ್ಥಳ ಶ್ರೀ ರಾಮಕ್ಷೇತ್ರ ಉಡುಪಿ ಸಮಿತಿ ಎಜುಕೇಷನಲ್​ ಟ್ರಸ್ಟ್​ ಉಡುಪಿ ಹಾಗೂ ಯುವವಾಹಿನಿ ಉಡುಪಿ ಘಟಕ ಮಾ.16ರಂದು ಸಂಜೆ ಆಯೋಜಿಸಿದ್ದ ಮಹಾಭಿವಂದ್ಯ ಕಾರ್ಯಕ್ರಮದಲ್ಲಿ ಗೌರವ ಅಭಿನಂದನೆ ಸ್ವೀಕರಿಸಿ ಮಾತನಾಡಿದರು.

ದೇಶಕ್ಕೇ ಮಾದರಿ

ಅಭಿನಂದನಾರ್ಪಣೆ ಮಾಡಿದ ಬಂದರು ಮತ್ತು ಮೀನುಗಾರಿಕಾ ಸಚಿವ ಮಂಕಾಳ ವೈದ್ಯ ಮಾತನಾಡಿ, ಸಮಾಜದ ಎಲ್ಲರೂ ಚೆನ್ನಾಗಿ ಬದುಕು ಸಾಗಿಸಬೇಕು ಎನ್ನುವುದು ಶ್ರೀಗಳ ಕಲ್ಪನೆ ಮತ್ತು ಆಶಯವಾಗಿದೆ. ದೇಶದ ಇತಿಹಾಸದಲ್ಲಿಯೇ ಶ್ರೀಗಳ ಧರ್ಮ ನಿಷ್ಠೆ, ಅದಕ್ಕೆ ಪೂರಕವಾದ ಕೆಲಸಗಳು ಮಾದರಿಯಾಗಿದೆ. ಮಹಾಮಂಡಲೇಶ್ವರ ಪದವಿಗೆ ಪಾತ್ರರಾಗುವುದು ದೊಡ್ಡ ಸಾಧನೆಯಾಗಿದೆ ಎಂದರು.

ಒಗ್ಗಟ್ಟು ಅಗತ್ಯ

ಕಾರ್ಯಕ್ರಮ ಉದ್ಘಾಟಿಸಿದ ಡಾ. ಜಿ.ಶಂಕರ ಫ್ಯಾಮಿಲಿ ಟ್ರಸ್ಟ್​ನ ಪ್ರವರ್ತಕ ನಾಡೋಜ ಡಾ. ಜಿ.ಶಂಕರ ಮಾತನಾಡಿ, ಸಮಾಜ ಎಂದ ಮೇಲೆ ಸಣ್ಣಪುಟ್ಟ ಭಿನ್ನಾಭಿಪ್ರಾಯ ಉಂಟಾಗುವುದು ಸಹಜ. ಆದರೆ, ಅದ್ಯಾವುದನ್ನೂ ದೊಡ್ಡದು ಮಾಡದೆ ಅಥವಾ ಅದನ್ನು ತೋರ್ಪಡಿಸದೆ ಒಗ್ಗಟ್ಟು ಸಾಧಿಸಬೇಕು. ಬಿಲ್ಲವರು-ಮೊಗವೀರರು ಸಹಿತ ಎಲ್ಲ ಜಾತಿಯವರೂ ಕೆಟ್ಟ ರಾಜಕೀಯದಿಂದ ದೂರವಿದ್ದು ಒಂದಾಗಿ ಬದುಕಬೇಕು. ಶ್ರೀಗಳ ಮಾರ್ಗದರ್ಶನದಲ್ಲಿ ಎಲ್ಲ ಸಮುದಾಯದವರೂ ಸಹೋದರ ಭಾವದಿಂದ ಮುನ್ನಡೆಯಬೇಕು ಎಂದರು.

ಆತ್ಮಾನಂದ ಸರಸ್ವತಿ ಕಿರಿಯ ತಾಂತ್ರಿಕ ಮಹಾವಿದ್ಯಾಲಯದ ಅಧ್ಯಕ್ಷ ಓಬು ಪೂಜಾರಿ ಅಧ್ಯಕ್ಷತೆ ವಹಿಸಿದ್ದರು. ಶಾಸಕರಾದ ಯಶ್​ಪಾಲ್​ ಸುವರ್ಣ, ಗುರ್ಮೆ ಸುರೇಶ ಶೆಟ್ಟಿ, ಉಡುಪಿ ನಗರಸಭಾ ಅಧ್ಯಕ್ಷ ಪ್ರಭಾಕರ ಪೂಜಾರಿ, ನಗರಾಭಿವೃದ್ಧಿ ಪ್ರಾಧಿಕಾರದ ಅಧ್ಯಕ್ಷ ದಿನಕರ ಹೇರೂರು, ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರದ ಕೋಶಾಧಿಕಾರಿ ಪದ್ಮರಾಜ ಆರ್​., ಉದ್ಯಮಿ ಪ್ರಸಾದರಾಜ್​ ಕಾಂಚನ್​ ಉಪಸ್ಥಿತರಿದ್ದರು.

ಯುವವಾಹಿನಿ ಉಡುಪಿ ಘಟಕದ ಅಧ್ಯಕ್ಷ ದಯಾನಂದ ಕರ್ಕೇರ ಸ್ವಾಗತಿಸಿ, ಪ್ರಾಸ್ತಾವಿಕವಾಗಿ ಮಾತನಾಡಿದರು. ತೇಜಸ್​ ಜೆ. ಬಂಗೇರ ಕಾರ್ಯಕ್ರಮ ನಿರೂಪಿಸಿದರು. ಧರ್ಮಸ್ಥಳ ಶ್ರೀರಾಮಕ್ಷೇತ್ರ ಉಡುಪಿ ಸಮಿತಿ ಎಜುಕೇಷನಲ್​ ಟ್ರಸ್ಟ್​ನ ಕಾರ್ಯದರ್ಶಿ ಭಾಸ್ಕರ ಸುವರ್ಣ ವಂದಿಸಿದರು.

ಸಮಾಜದಲ್ಲಿ ವೈಮನಸ್ಸು, ದ್ವೇಷಭಾವ ಸಲ್ಲ