ಅರಿವಿನ ಬೆಳಕಿಂದ ಮನದ ಅಂಧಕಾರ ದೂರ...

ಅಪರ ಜಿಲ್ಲಾಧಿಕಾರಿ ಅಬೀದ್​ ಗದ್ಯಾಳ ಅಭಿಮತ

ಕಾರಂತರ ಬದುಕು-ಬರಹ ಉಪನ್ಯಾಸ ಉದ್ಘಾಟನೆ

ವಿಜಯವಾಣಿ ಸುದ್ದಿಜಾಲ ಉಡುಪಿ

ಯಾವುದೇ ಮೂಲದಿಂದಾರೂ ಅರಿವಿನ ಬೆಳಕು ಹರಿದಾಗ ಮನದ ಅಂಧಕಾರ ಕಳೆಯುತ್ತದೆ. ಸಾರಸ್ವತ ಲೋಕದಲ್ಲಿ ಡಾ. ಕೋಟ ಶಿವರಾಮ ಕಾರಂತರು ಸೂರ್ಯನ ಬೆಳಕಿನಂತೆ ಜ್ಞಾನಗಳ ಮಾಲೆಯನ್ನೆ ಪೋಣಿಸಿದ್ದಾರೆ. ಸಾಹಿತ್ಯದಲ್ಲಿ ಎಲ್ಲ ಪ್ರಕಾರದ, ಎಲ್ಲ ವಿಭಾಗದ ವಿಚಾರ ಹಾಗೂ ವಿಷಯವನ್ನು ಅಕ್ಷರ ರೂಪದಲ್ಲಿ ಇಳಿಸಿದ್ದು, ಆ ಮೂಲಕ ನಮ್ಮೊಂದಿಗೆ ಕಾರಂತರು ಚಿರಸ್ಥಾಯಿಯಾಗಿಯೇ ಇರುತ್ತಾರೆ ಎಂದು ಅಪರ ಜಿಲ್ಲಾಧಿಕಾರಿ ಅಬೀದ್​ ಗದ್ಯಾಳ ಅಭಿಮತ ವ್ಯಕ್ತಪಡಿಸಿದರು.

ಉಡುಪಿಯ ಬ್ರಹ್ಮಗಿರಿಯಲ್ಲಿರುವ ರೆಡ್​ ಕ್ರಾಸ್​ ಭವನದ ಹೆನ್ರಿ ಡುನ್ಯಾಂಟ್​ ಸಭಾಂಗಣದಲ್ಲಿ ಉಡುಪಿ ಜಿಲ್ಲಾ ಡಾ. ಶಿವರಾಮ ಕಾರಂತ ಟ್ರಸ್ಟ್​ ವತಿಯಿಂದ ಹಾಗೂ ರಥಬೀದಿ ಗೆಳೆಯರು (ರಿ.) ಉಡುಪಿ ಸಹಕಾರದಲ್ಲಿ ಜುಲೈ 22ರಂದು ಸಂಜೆ ಆಯೋಜಿಸಿದ್ದ ಅರಿವಿನ ಬೆಳಕು ಉಪನ್ಯಾಸ ಮಾಲೆ-7 ಉದ್ಘಾಟಿಸಿ ಮಾತನಾಡಿದರು.

ಟ್ರಸ್ಟ್​ನ ಅಧ್ಯಕ್ಷ ಡಾ.ಗಣನಾಥ ಶೆಟ್ಟಿ ಎಕ್ಕಾರು ಅಧ್ಯಕ್ಷತೆ ವಹಿಸಿದ್ದರು. ಹಿರಿಯ ಭಾಷಾ ವಿಜ್ಞಾನಿ ನಾಡೋಜ ಡಾ. ಕೆ.ಪಿ. ರಾವ್​, ರಥಬೀದಿಯ ಗೆಳೆಯರು ಅಧ್ಯಕ್ಷ ಉದ್ಯಾವರ ನಾಗೇಶಕುಮಾರ್​, ಕನ್ನಡ ಅಬಿವೃದ್ಧಿ ಪ್ರಾಧಿಕಾರದ ಕಾರ್ಯದರ್ಶಿ ಡಾ. ಸಂತೋಷ ಹಾನಗಲ್​ ಉಪಸ್ಥಿತರಿದ್ದರು.

ನಾಡಗೀತೆಯೊಂದಿಗೆ ಕಾರ್ಯಕ್ರಮ ಆರಂಭಿಸಲಾಯಿತು. ಕಾರಂತ ಟ್ರಸ್ಟ್​ನ ಸದಸ್ಯ ಕಾರ್ಯದರ್ಶಿ ಹಾಗೂ ಜಿಲ್ಲಾ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆಯ ಸಹಾಯಕ ಕಾರ್ಯದರ್ಶಿ ಪೂರ್ಣಿಮಾ ಸ್ವಾಗತಿಸಿದರು. ಕನ್ನಡ ಉಪನ್ಯಾಸಕಿ ಡಾ. ನಿಕೇತನಾ ಕಾರ್ಯಕ್ರಮ ನಿರೂಪಿಸಿದರು.

21ನೇ ಶತಮಾನದಲ್ಲೂ 'ಕಡಲ ಭಾರ್ಗವ' ಪ್ರಸ್ತುತ