ಪ್ರಾಣಿ ಸಂಕುಲಕ್ಕೆ ಕಂಟಕವಾದ ಗ್ರಾನೈಟ್ ತ್ಯಾಜ್ಯ!

ಕುಷ್ಟಗಿ: ಪಟ್ಟಣ ಹೊರವಲಯದ ದೋಟಿಹಾಳ ರಸ್ತೆ ಪಕ್ಕದ ಜಮೀನಿನಲ್ಲಿ ಗ್ರಾನೈಟ್ ಫ್ಯಾಕ್ಟರಿಯ ತ್ಯಾಜ್ಯ ಸುರಿಯಲಾಗುತ್ತಿದೆ. ಕುರಿ ಇನ್ನಿತರ ಜಾನುವಾರುಗಳು ತ್ಯಾಜ್ಯದಲ್ಲಿ ಸಿಕ್ಕಿ ಹಾಕಿಕೊಂಡು ನರಳಾಡುತ್ತಿದ್ದು, ಭಾನುವಾರ ತ್ಯಾಜ್ಯದಲ್ಲಿ ಸಿಲುಕೊಂಡ ಕುರಿಯೊಂದು ಹೊರಬಾರದೆ ಸತ್ತಿದೆ.

ಪಟ್ಟಣದಲ್ಲಿರುವ ವಿವಿಧ ಗ್ರಾನೈಟ್ ಫ್ಯಾಕ್ಟರಿ ಮಾಲೀಕರು ಫ್ಯಾಕ್ಟರಿಯಲ್ಲಿ ಉತ್ಪತ್ತಿಯಾಗುವ ತ್ಯಾಜ್ಯ(ಕಲ್ಲಿನ ಪುಡಿ)ಯನ್ನೆಲ್ಲ ದೋಟಿಹಾಳ ರಸ್ತೆ ಪಕ್ಕ ತಂದು ಸುರಿಯುತ್ತಿದ್ದಾರೆ. ತ್ಯಾಜ್ಯದಿಂದ ತುಂಬಿದ ಸುಮಾರು 6ಎಕರೆ ಪ್ರದೇಶ ಕೆರೆಯಂತೆ ಕಂಡುಬರುತ್ತಿದೆ. ಸದ್ಯ ಮಳೆ ನೀರು ಸಂಗ್ರಹಗೊಂಡು ತ್ಯಾಜ್ಯವೆಲ್ಲ ಸಿಮೆಂಟ್ ಕಾಂಕ್ರಿಟ್‌ನಂತಾಗಿದೆ. ಸುತ್ತಲೂ ರಕ್ಷಣಾ ಗೋಡೆಯಾಗಲಿ, ತಂತಿ ಬೇಲಿಯಾಗಲಿ ಅಳವಡಿಸಿಲ್ಲ. ಆಹಾರ ಅರಸಿ ಹೋಗುವ ಕುರಿ ಇನ್ನಿತರ ಜಾನುವಾರುಗಳು ತ್ಯಾಜ್ಯದಲ್ಲಿ ಸಿಲುಕಿಕೊಳ್ಳುತ್ತಿವೆ. ಹೀಗೆ ಸಿಲುಕಿಕೊಂಡ ಜಾನುವಾರುಗಳನ್ನು ಹೊರ ತಗೆಯಲು ರೈತರು ಪರದಾಡುತ್ತಿದ್ದಾರೆ. ಜಮೀನುಗಳಿಗೆ ತೆರಳುವ ರೈತರೂ ಸಹ ತ್ಯಾಜ್ಯದಲ್ಲಿ ಸಿಲುಕಿಕೊಳ್ಳುತ್ತಿದ್ದು, ಇತ್ತೀಚೆಗೆ ಜಮೀನಿಗೆ ತೆರಳುತ್ತಿದ್ದ ಬಾಲಕನೊಬ್ಬ ಸಿಲುಕಿಕೊಂಡಿದ್ದರಿಂದ ಜೆಸಿಬಿ ಸಹಾಯದಿಂದ ಮೇಲಕ್ಕೆತ್ತಲಾಯಿತು. ಅದೃಷ್ಟವಶಾತ್ ಬಾಲಕ ಪ್ರಾಣಾಪಾಯದಿಂದ ಪಾರಾದ ಎಂದು ರೈತರು ಹೇಳುತ್ತಿದ್ದಾರೆ.