ಬರದ ಮಧ್ಯೆ ಒಣಮೆಣಸಿನಕಾಯಿ ಬೆಳೆದು ಸಾಧನೆ

ಕುಷ್ಟಗಿ: ಬರಗಾಲದ ಮಧ್ಯೆ ಹನಿ ನೀರಾವರಿ ಮೂಲಕ ಬಂಪರ್ ಮೆಣಸಿನಕಾಯಿ ಬೆಳೆ ಬೆಳೆದ ಹನುಮಸಾಗರ ಹೋಬಳಿಯ ಮಿಯಾಪುರದ ರೈತ ಶರಣಪ್ಪ ಬಾಳಪ್ಪ ಬೇವೂರ ಅವರು ರೈತರಿಗೆ ಮಾದರಿಯಾಗಿದ್ದಾರೆ.

ಮೂರು ಎಕರೆ ಕೃಷಿ ಭೂಮಿಯಲ್ಲಿ ಬೇರೆ ಬೇರೆ ಬೆಳೆ ಬೆಳೆದು ಕೈ ಸುಟ್ಟುಕೊಂಡಿದ್ದ ಶರಣಪ್ಪ, ತೋಟಗಾರಿಕೆ ಇಲಾಖೆ ಸಹಕಾರದಿಂದ ಹನಿ ನೀರಾವರಿ ಸೌಲಭ್ಯ ಪಡೆದು ಕೇವಲ ಒಂದು ಇಂಚು ಬೋರ್‌ವೆಲ್ ನೀರಿನಿಂದ ಮೆಣಸಿನಕಾಯಿ ಬೆಳೆದಿದ್ದು, ಉತ್ತಮ ಇಳುವರಿ ಬಂದಿದೆ. ಜಮೀನಿನಲ್ಲಿಯೇ ಹಸಿಮೆಣಸಿನಕಾಯಿ ಕೆಜಿಗೆ 80 ರೂ. ಯಂತೆ ವ್ಯಾಪಾರಿಗಳು ಖರೀದಿಸಲು ಮುಂದಾಗಿರುವುದು ವಿಶೇಷ.

ಸಿಂಜೆಂಟಾ ಎಚ್‌ಪಿಎಚ್-5531 ಎಂಬ ಮೆಣಸಿನಕಾಯಿ ತಳಿಯ ಬೀಜವನ್ನು ರಾಣೆಬೆನ್ನೂರಿನಿಂದ ತಂದು ಬಿತ್ತನೆ ಮಾಡಿದ್ದು, ಕೇವಲ ಮೂರು ತಿಂಗಳಲ್ಲಿ ಬೆಳೆ ಕೈಗೆ ಬಂದಿದೆ. ಹಸಿರು ಮತ್ತು ಒಣ ಮೆಣಸಿನಕಾಯಿ ಎರಡಕ್ಕೂ ಸೂಕ್ತವಾದ, ಹೆಚ್ಚಿನ ಇಳುವರಿ ನೀಡುವ ಹೈಬ್ರಿಡ್ ಮೆಣಸಿನಕಾಯಿ ತಳಿಯಾಗಿದೆ. ಎರಡು ಟನ್ ಮೆಣಸಿನಕಾಯಿ ಬಂದಿದೆ. ಹೆಚ್ಚು ಖರ್ಚಿಲ್ಲದ ಹನಿ ನೀರಾವರಿ ಮೂಲಕ ಬೆಳೆಯಬಹುದಾಗಿದ್ದು, ರೈತರು ಬೆಳೆದು ಲಾಭ ಕಂಡುಕೊಳ್ಳಬಹುದು ಎಂದು ತಿಳಿಸುವ ಶರಣಪ್ಪ, ಮೂರು ಎಕರೆಯಲ್ಲಿ ಬೆಳೆದ ಒಣಮೆಣಸಿನಕಾಯಿಂದ ಅಂದಾಜು 13 ಲಕ್ಷ ರೂ. ಬಂದಿದೆ ಎನ್ನುತ್ತಾರೆ.

ಕಾಯಿಗಳು ಆರಂಭದಲ್ಲಿ ಮಧ್ಯಮ ಹಸಿರು ಬಣ್ಣದಲ್ಲಿದ್ದು, ಮಾಗಿದ ನಂತರ ಗಾಢವಾದ ಮತ್ತು ಆಕರ್ಷಕ ಕೆಂಪು ಬಣ್ಣಕ್ಕೆ ತಿರುಗುತ್ತವೆ. ಒಣಗಿದ ಕಾಯಿಗಳು ಮಧ್ಯಮ ಸುಕ್ಕುಗಟ್ಟಿದ ಮೇಲ್ಮೈಯನ್ನು ಹೊಂದಿರುತ್ತವೆ. ಕಾಯಿಗಳು ಸಾಮಾನ್ಯವಾಗಿ 10 ರಿಂದ 15 ಸೆಂ.ಮೀ. ಉದ್ದವಿರುತ್ತವೆ. ಇದು ಮಧ್ಯಮ ಪ್ರಮಾಣದ ಖಾರ ಮತ್ತು ಉತ್ತಮ ಬಣ್ಣದ ಮೌಲ್ಯವನ್ನು ಹೊಂದಿದೆ. ಗಿಡಗಳು ಸದೃಢವಾಗಿ ಬೆಳೆಯುತ್ತವೆ ಮತ್ತು ಕಾಯಿಗಳು ದಟ್ಟವಾಗಿ ಬಿಡುತ್ತವೆ. ಸಸಿ ನಾಟಿ ಮಾಡಿದ 70 ರಿಂದ 80 ದಿನಗಳಲ್ಲಿ ಮೊದಲ ಕೊಯ್ಲಿಗೆ ಬರುತ್ತದೆ. ಈ ತಳಿಯು ರೋಗ ತಡೆದುಕೊಳ್ಳುವ ಸಾಮರ್ಥ್ಯವನ್ನೂ ಹೊಂದಿದೆ.