ಕೊಪ್ಪಳದ ಹನ್ನೊಂದು ಕೇಂದ್ರಗಳಲ್ಲಿ ನೀಟ್​ ಪರೀಕ್ಷೆ

ಕಳೆದ ಪರೀಕ್ಷೆ ಯಲ್ಲಿ ಅಕ್ರಮ ನಡೆದ ಕಾರಣ ಈ ಬಾರಿ ಬಿಗಿ ಭದ್ರತೆಯಲ್ಲಿ ಪರೀಕ್ಷೆ ನಡೆಸಲಾಯಿತು. ಮಧ್ಯಾಹ್ನ 1.30 ಗಂಟೆಯೊಳಗೆ ಅಭ್ಯರ್ಥಿಗಳು ಪರೀಕ್ಷಾ ಕೇಂದ್ರದೊಳಗೆ ಇರುವಂತೆ ಸೂಚಿಸಲಾಗಿತ್ತು. ಅದರಂತೆ ಬೆಳಗ್ಗೆ 11 ಗಂಟೆಗೆ ಕೆಲ ಪಾಲಕರು ತಮ್ಮ ಮಕ್ಕಳೊಡನೆ ಆಗಮಿಸಿದ್ದು ಕಂಡುಬಂತು. ಗೇಟ್​ ಹೊರಭಾಗದಲ್ಲಿ ಕಾಯುತ್ತಾ ನಿಂತಿದ್ದರು. ಪರೀಾ ಕೇಂದ್ರದ ಸಿಬ್ಬಂದಿ ಬಿಟ್ಟರೆ ಬೇರೆ ಯಾರಿಗೂ ಕೇಂದ್ರದ ಒಳಗೆ ಪ್ರವೇಶ ನೀಡಲಿಲ್ಲ.

ವಿವಿಧ ಬ್ಯಾಂಕ್​ಗಳಲ್ಲಿ ಪ್ರಶ್ನೆ ಪತ್ರಿಕೆಗಳನ್ನು ಇರಿಸಲಾಗಿತ್ತು. ಸರಿಯಾದ ಸಮಯಕ್ಕೆ ಮೇಲಧಿಕಾರಿಗಳ ಸೂಚನೆ ನೀಡಿದ ಬ್ಯಾಂಕಿನಿಂದ ಪ್ರಶ್ನೆ ಪತ್ರಿಕೆಗಳನ್ನು ಪೊಲೀಸ್​ ಬಂದೋಬಸ್ತ್​ನಲ್ಲಿ ಕೇಂದ್ರಗಳಿಗೆ ತಲುಪಿಸಲಾಯಿತು. ಮೊದಲೇ ಹೊರಡಿಸಿದ ಮಾರ್ಗಸೂಚಿ ಪಾಲಿಸುವಂತೆ ಅಭ್ಯರ್ಥಿಗಳಿಗೆ ಸೂಚಿಸಲಾಯಿತು. ಕೆಲವರು ಪ್ರವೇಶ ಪತ್ರದಲ್ಲಿನ ಫೋಟೋ ಹಾಗೂ ತಾವು ತಂದ ಫೋಟೋ ದಲ್ಲಿ ವ್ಯತ್ಯಾಸ ಆದ ಕಾರಣ ವಾಪಸ್​ ತೆರಳುವಂತಾಯಿತು.

ಜಿಲ್ಲಾಧಿಕಾರಿ ಡಾ.ಸುರೇಶ ಬಿ.ಇಟ್ನಾಳ, ಎಸ್ಪಿ ಡಾ.ರಾಮ್​ ಎಲ್​.ಅರಸಿದ್ದಿ ಬಾಲಕರ ಸರ್ಕಾರಿ ಪಿಯು ಕಾಲೇಜು ಕೇಂದ್ರಕ್ಕೆ ಭೇಟಿ ನೀಡಿ ಸಿದ್ಧತೆ ಪರಿಶೀಲಿಸಿದರು. ಮಕ್ಕಳು ಹಾಗೂ ಪರೀಾ ಸಿಬ್ಬಂದಿಯಿಂದ ಮಾಹಿತಿ ಪಡೆದುಕೊಂಡರು. ನಿಯಮಾನುಸಾರ ಎಕ್ಸಾಂ ನಡೆಸುವಂತೆ ನಿರ್ದೇಶಿಸಿದರು.

ಗವಿಸಿದ್ದೇಶ್ವರ ಪದವಿ ಕಾಲೇಜು, ಸರ್ಕಾರಿ ಪ್ರಥಮ ದರ್ಜೆ ಕಾಲೇಜು, ಬಾಲಕಿಯರ ಸರ್ಕಾರಿ ಪಿಯು ಕಾಲೇಜು, ಸರ್ಕಾರಿ ಪ್ರಥಮ ದರ್ಜೆ ಮಹಿಳಾ ಕಾಲೇಜು, ಟಣಕನಕಲ್​ ಆದರ್ಶ ವಿದ್ಯಾಲಯ, ತಳಕಲ್​ ಸರ್ಕಾರಿ ಎಂಜಿನಿಯರಿಂಗ್​ ಕಾಲೇಜು, ದದೇಗಲ್​ ಸರ್ಕಾರಿ ಪಾಲಿಟೆಕ್ನಿಕ್​ ಕಾಲೇಜು, ಭಾಗ್ಯನಗರ ಸರ್ಕಾರಿ ಪಿಯು ಕಾಲೇಜು, ಕೊಪ್ಪಳದ ಬಾಲಕರ ಸರ್ಕಾರಿ ಪಿಯು ಕಾಲೇಜು, ಕಾಳಿದಾಸ ಪ್ರೌಢಶಾಲೆ, ಪಿಎಂಶ್ರೀ ಕೇಂದ್ರೀಯ ವಿದ್ಯಾಲಯ ಕೇಂದ್ರದಲ್ಲಿ ಪರೀಕ್ಷೆ ನಡೆದವು.

ಕಟ್ಟುನಿಟ್ಟಾಗಿ ಪರೀೆ ಆಯೋಜಿಸಿದ್ದು ಮಾರ್ಗಸೂಚಿ ಕಡ್ಡಾಯವಾಗಿ ಪಾಲಿಸುವಂತೆ ಅಭ್ಯರ್ಥಿಗಳಿಗೆ ಸೂಚಿಸಲಾಗಿತ್ತು. ಹೀಗಿದ್ದರೂ ಕೆಲವರು ಸಮಯಕ್ಕೆ ಸರಿಯಾಗಿ ಬಾರದ ಕಾರಣ ಪರೀಕ್ಷೆ ಬರೆಯಲು ಕೇಂದ್ರದ ಸಿಬ್ಬಂದಿ ಅವಕಾಶ ಮಾಡಿಕೊಡಲಿಲ್ಲ. ಗಂಗಾವತಿಯ ಬೀಬಿ ಫಾತಿಮಾ ಎಂಬ ಅಭ್ಯರ್ಥಿ 1.54 ಗಂಟೆಗೆ ಬಂದರೂ ಪರೀೆ ಬರೆಯಲು ಅವಕಾಶ ಸಿಗದೆ ಕಣ್ಣೀರು ಹಾಕಿದಳು. ಕೆಲ ಯುವಕರು 5-10 ನಿಮಿಷ ತಡವಾಗಿ ಬಂದು ಅಂಗಲಾಚಿದರು ಅವಕಾಶ ಇಲ್ಲದ ಕಾರಣ ಕಣ್ಣೀರಾದರು. ಗವಿಮಠ ಕಾಲೇಜು ಕೇಂದ್ರದಲ್ಲಿ ಬಂದ ಮಹಿಳಾ ಅಭ್ಯರ್ಥಿಗಳು ಬಂಗಾರದ ಆಭರಣ, ಮೂಗುತಿ ಬಿಚ್ಚಿ ಪಾಲಕರ ಕೈಯಲ್ಲಿ ಕೊಟ್ಟು ಕೇಂದ್ರ ಪ್ರವೇಶಿಸಿದ್ದು ಕಂಡುಬಂತು.