ಗ್ರಾಮಸ್ಥರ ಹಲವು ದಶಕಗಳ ಕನಸು ನನಸು

ವಿಜಯವಾಣಿ ಸುದ್ದಿಜಾಲ ಅಳವಂಡಿ

ಗ್ರಾಮಸ್ಥರ ಹಲವು ದಶಕಗಳ ಬೇಡಿಕೆಯಾದ ಘಟ್ಟಿರಡ್ಡಿಹಾಳ-ಅಳವಂಡಿ ಮಾರ್ಗ ಮಧ್ಯದ ಹಳ್ಳಕ್ಕೆ ಸೇತುವೆ ಹಾಗೂ ರಸ್ತೆ ನಿರ್ಮಾಣ ಕಾರ್ಯ ಪೂರ್ಣಗೊಂಡಿದ್ದು ಉದ್ಘಾಟನೆಗೆ ಸಿದ್ಧಗೊಂಡಿದೆ.

ಘಟ್ಟಿರಡ್ಡಿಹಾಳ ಕೊಪ್ಪಳ ತಾಲೂಕಿನ ಕಟ್ಟಕಡೆಯ ಗ್ರಾಮವಾಗಿದ್ದು, 1500 ಜನಸಂಖ್ಯೆ ಹೊಂದಿದೆ. ತಾಲೂಕು ಕೇಂದ್ರದಿಂದ 40 ಕಿಮೀ, ಅಳವಂಡಿಯಿಂದ 6 ಕಿ.ಮೀ. ದೂರ ಹೊಂದಿದೆ. ಗ್ರಾಮಸ್ಥರು ಜಿಲ್ಲಾ ಕೇಂದ್ರ ಕೊಪ್ಪಳಕ್ಕೆ ತೆರಳಲು 6 ಕಿಮೀ ದೂರದ ಮುಂಡರಗಿಗೆ ತೆರಳಿ ಸಂಚರಿಸಬೇಕಿತ್ತು. ಅಳವಂಡಿಗೆ 12 ಕೀಮಿ ಸುತ್ತಿ ಬಳಸಿ ಬರಬೇಕಿತ್ತು. ಸೇತುವೆ-ರಸ್ತೆ ನಿರ್ಮಾಣದಿಂದ ಈ ತಾಪತ್ರವೀಗ ತಪ್ಪಿದೆ.

ಘಟ್ಟಿರಡ್ಡಿಹಾಳ ಮಾರ್ಗ ಮಧ್ಯ ಹಿರೇಹಳ್ಳವಿದ್ದು ಇದರಲ್ಲಿ ಯಾವಾಗಲೂ ನೀರಿರುವ ಕಾರಣ ವಾಹನ ಸಂಚಾರ ಕಷ್ಟವಾಗಿತ್ತು. ಇದಲ್ಲದೇ ಇನ್ನೆರಡು ಸಣ್ಣ ಹಳ್ಳಗಳಿದ್ದು ಮಳೆಗಾಲದಲ್ಲಿ ತುಂಬಿ ಹರಿವ ಕಾರಣ ಮುಂಡರಗಿಗೆ ಹೋಗಿಯೇ ಜಿಲ್ಲಾ ಕೇಂದ್ರ ತಲುಪಬೇಕಿತ್ತು. ಇದೇ ರಸ್ತೆಗೆ ಹೊಂದಿಕೊಂಡು ಸಾವಿರಾರು ಎಕರೆ ಕೃಷಿ ಭೂಮಿ ಇದ್ದು, ಮಳೆಗಾಲದಲ್ಲಿ ಕೃಷಿ ಟುವಟಿಕೆಗೆ ಹಿನ್ನೆಡೆಯಾಗುತ್ತಿತ್ತು. ಈ ಎಲ್ಲ ಸಮಸ್ಯೆಗೆ ಇದೀಗ ಮುಕ್ತಿ ಸಿಕ್ಕಂತಾಗಿದೆ.

ಬಹು ದಶಕಗಳ ಗ್ರಾಮಸ್ಥರ ಕನಸನ್ನು ಶಾಸಕ ರಾಘವೇಂದ್ರ ಹಿಟ್ನಾಳ ನನಸು ಮಾಡಿದ್ದು, ಕಲ್ಯಾಣ ಪಥ ಯೋಜನೆ 2024-25 ಅಡಿಯಲ್ಲಿ ಸೇತುವೆ ನಿರ್ಮಾಣಕ್ಕೆ 2.44 ಕೋಟಿ., ರಸ್ತೆ ನಿರ್ಮಾಣಕ್ಕೆ 4.26 ಕೋಟಿ ರೂ. ಮಂಜೂರು ಮಾಡಿ ಕಾಮಗಾರಿ ಪೂರ್ಣಗೊಳಿಸಿದ್ದರಿಂದ ಗ್ರಾಮಸ್ಥರಲ್ಲಿ ಸಂಭ್ರಮ ಮನೆ ಮಾಡಿದೆ.

ಸೇತುವೆ ಹಾಗೂ ರಸ್ತೆ ನಿರ್ಮಾಣದಿಂದ ಹೊಬಳಿ ಕೇಂದ್ರಕ್ಕೆ ತೆರಳುವವರಿಗೆ ಅನೂಕೂಲ ಆಗಲಿದೆ. ಅಲ್ಲದೇ ಜಿಲ್ಲಾ ಕೇಂದ್ರ ಕೊಪ್ಪಳಕ್ಕೆ ತೆರಳುವವರಿಗೆ 12 ಕೀಮಿ ಕಡಿಮೆ ಆಗಲಿದೆ. ಸರ್ಕಾರಿ ಕಚೇರಿ ಕೆಲಸ, ವಾಣಿಜ್ಯ ವಹಿವಾಟು, ಶಿಕ್ಷಣ ಮುಂತಾದ ಕಾರ್ಯಗಳಿಗೆ ತೆರಳುವವರಿಗೆ ತುಂಬಾ ಅನೂಕೂಲ ಆಗಲಿದೆ.