ಆಂಧ್ರ ಪೋರಿಗೆ ಕನ್ನಡದಲ್ಲಿ ಪೂರ್ಣ ಅಂಕ!

ಆಂಧ್ರದ ಪುಲಿಸಿಮಾನುಪೆಂಟ ಗ್ರಾಮದ ಮಲ್ಲು ವೆಂಕಟರಮಣ, ಸರಸ್ವತಿ ಪುತ್ರಿ ನಂದಿನಿ ಶ್ರೀನಿವಾಸಪುರ ಗಡಿ ಭಾಗದ ಮುದಿಮಡಗು ಸರ್ಕಾರಿ ಪ್ರೌಢಶಾಲೆಯಲ್ಲಿ ವ್ಯಾಸಂಗ ಮಾಡಿದ್ದಾರೆ. ತಂದೆ ಕುರಿಗಾಹಿಯಾಗಿದ್ದು, ತಾಯಿ ಕೂಲಿ ಕೆಲಸ ಮಾಡುತ್ತಾರೆ. ಮನೆಯ ಆರ್ಥಿಕ ಪರಿಸ್ಥಿತಿ ಅಷ್ಟೊಂದು ಚೆನ್ನಾಗಿಲ್ಲದ ಕಾರಣ ಆರಂಭದಲ್ಲಿ ವಿದ್ಯಾರ್ಥಿನಿಯ ಓದಿಗೆ ಮನೆಯ ಕೆಲಸಗಳೇ ಅಡ್ಡಿಯಾಗುತ್ತಿದ್ದವು. ವಿದ್ಯಾರ್ಥಿನಿಯ ಓದಿನ ಕುರಿತ ಆಸಕ್ತಿ ಗಮನಿಸಿದ ಶಾಲೆಯ ಶಿಕ್ಷಕರು ಒಮ್ಮೆ ಮನೆಗೆ ಭೇಟಿ ನೀಡಿ, ಮಗಳು ಉತ್ತಮವಾಗಿ ಓದುತ್ತಿದ್ದು, ಎಸ್ಸೆಸ್ಸೆಲ್ಸಿ ಮಹತ್ತರ ಟ್ಟವಾದ್ದರಿಂದ ಓದಿಗೆ ಅನುವು ಮಾಡಿಕೊಡುವಂತೆ ಮನವಿ ಮಾಡಿದರು.

ಪಾಲಕರು ಸಹಕಾರ ನೀಡಿದ್ದು ಇಂದು ನಂದಿನಿ ಶೇ.99 ಅಂಕ ಗಳಿಸಿದ್ದಾಳೆ. ಹುಟ್ಟಿದ್ದು, ಬೆಳೆದಿದ್ದೆಲ್ಲವೂ ಆಂಧ್ರಪ್ರದೇಶದಲ್ಲಾದರೂ ಕನ್ನಡ ಭಾಷೆಯಲ್ಲಿ ಸಾಧನೆ ಮಾಡುವ ಮೂಲಕ ಕನ್ನಡಿಗರ ಮನಸ್ಸು ಗೆದ್ದಿದ್ದಾಳೆ.

ಗ್ರಾಮದಿಂದ ವ್ಯವಸ್ಥಿತ ಸಾರಿಗೆ ಇಲ್ಲದ ಕಾರಣ ಪ್ರತಿದಿನ ಸುಮಾರು 8 ಕಿಮೀ ದೂರದಿಂದ ಪ್ರಯಾಣ ಮಾಡುತ್ತಿದ್ದಳು. ಓದುವ ಛಲದಿಂದ ನಿಗದಿತ ಸಮಯಕ್ಕೆ ಶಾಲೆಗೆ ಬಂದು ಶಿಕ್ಷಕರ ಪಾಠ ಮಾರ್ಗದರ್ಶನದಲ್ಲಿ ಛಲ ಬಿಡದೆ ಗುರಿ ಮುಟ್ಟಿ ಗಮನ ಸೆಳೆದಿದ್ದಾಳೆ. ಮುಂದಿನ ಶಿಕ್ಷಣಕ್ಕೆ ವಿದ್ಯಾರ್ಥಿನಿಗೆ ಆರ್ಥಿಕ ಸಹಕಾರ ಬೇಕಿದ್ದು, ಕನ್ನಡಾಭಿಮಾನಿಗಳು ಮುಂದೆ ಬರಬೇಕಿದೆ.

ರಾಯಲ್ಪಾಡಿನ ಸರ್ಕಾರಿ ಪ್ರೌಢಶಾಲೆಯಲ್ಲಿ ವ್ಯಾಸಂಗ ಮಾಡಿದ ಕಾವ್ಯಶ್ರೀ ಬಡತನ ಮತ್ತು ಕಠಿಣ ಪರಿಸ್ಥಿತಿಯ ನಡುವೆಯೂ ಪ್ರಸಕ್ತ ಸಾಲಿನ ಎಸ್​ಎಸ್​ಎಲ್​ಸಿ ಪರೀೆಯಲ್ಲಿ 625ಕ್ಕೆ 601 ಅಂಕ ಪಡೆಯುವ ಮೂಲಕ ಶೇ.96.16 ರಿಸಲ್ಟ್​ ಪಡೆದು ಮಾದರಿಯಾಗಿದ್ದಾರೆ.

ಕೆಲ ವರ್ಷಗಳ ಹಿಂದೆ ತಂದೆ ಮನೆ ಬಿಟ್ಟು ಹೋದವರು ಬಂದೇ ಇಲ್ಲ, ತಾಯಿ ಅಂಗನವಾಡಿಯಲ್ಲಿ ಸಹಾಯಕಿಯಾಗಿ ಕೆಲಸ ಮಾಡುತ್ತಿದ್ದು, ಮಗಳ ಸಾಧನೆಯ ಹಿಂದೆ ಬಲವಾಗಿ ನಿಂತಿದ್ದರಿಂದ ಸಾಧನೆ ಸಾಧ್ಯವಾಗಿದೆ. ನಿತ್ಯ ಕದಿರಂಪಲ್ಲಿಯಿಂದ ರಾಯಲ್ಪಾಡು ಶಾಲೆಗೆ ಬಂದು ವ್ಯಾಸಂಗ ಮಾಡಿ ಗುರಿ ತಲುಪಿದ್ದಾಳೆ.

ರಾಯಲ್ಪಾಡಿನ ಸರ್ಕಾರಿ ಪ್ರೌಢ ಶಾಲೆಯಲ್ಲಿ ಕೇವಲ ಮೂವರು ಕಾಯಂ ಶಿಕ್ಷಕರಿದ್ದಾರೆ. ಆದರೂ ಬಾಲಕಿ ಛಲ ಬಿಡದೆ ಓದಿ ಉತ್ತಮ ಅಂಕಪಡೆದಿರುವುದು ಶ್ಲಾಘನೀಯ ಎಂದು ತಾಲೂಕು ನೌಕರರ ಸಂಘದ ನಿರ್ದೇಶಕ ಕೆ.ರಾಜಣ್ಣ ಹರ್ಷ ವ್ಯಕ್ತಪಡಿಸಿದ್ದಾರೆ.