ಕಾಫಿ ಫಸಲು ಕಳವು ತಡೆಗೆ ಖಾಕಿ ಕಟ್ಟೆಚ್ಚರ

ಕಾಫಿ ಕೊಯ್ಲು ಹಂತಕ್ಕೆ ಬರುತ್ತಿದ್ದಂತೆಯೇ ಕಳ್ಳರ ಹಾವಳಿ ಹೆಚ್ಚಾಗುವುದು ಇತ್ತೀಚಿನ ಸಾಮಾನ್ಯ ಬೆಳವಣಿಗೆ ಆಗಿದೆ. ಇದಕ್ಕೆ ಕಡಿವಾಣ ಹಾಕಲು ಪೊಲೀಸ್ ಇಲಾಖೆ ಎಲ್ಲಾ ರೀತಿಯ ಸಿದ್ಧತೆ ಮಾಡಿಕೊಂಡಿದೆ. ಕದ್ದಿರುವ ಕಾಫಿಯನ್ನು ಖರೀದಿಸುವವರ ಮೇಲೆಯೇ ಹದ್ದಿನ ಕಣ್ಣು ಇಡುವ ಮೂಲಕ ಖದೀಮರ ಕೈಯನ್ನೇ ಕಟ್ಟಿ ಹಾಕಲು ಮುಂದಾಗಿದೆ.

ಶುಕ್ರವಾರದ ಮಾರುಕಟ್ಟೆ ಮಾಹಿತಿ ಪ್ರಕಾರ ಅರೆಬಿಕಾ ಪಾರ್ಚಿಮೆಂಟ್ 60 ಕೆಜಿ ಚೀಲದ ಬೆಲೆ 23,550-23,600 ರೂ. ಅರೆಬಿಕಾ ಚೆರಿ ದರ 14,150-14,200 ರೂ. ರೋಬಸ್ಟಾ ಪಾರ್ಚಿಮೆಂಟ್ ದರ 17,450-17,500 ರೂ., ರೋಬಸ್ಟಾ ಚೆರಿಯ ದರ 9,300-9350 ರೂ. ಹಾಗೂ ಕರಿಮೆಣಸು ದರ ಕೆಜಿಗೆ 640-670 ರೂ. ಇದೆ. ಆಕರ್ಷಕವಾಗಿ ಕಾಣುವ ಈ ದರ ಸಿಗಬೇಕಾದರೆ ಕಾಫಿ ಬೆಳೆಗಾರ ವರ್ಷಪೂರ್ತಿ ಬೆವರು ಸುರಿಸಿರುತ್ತಾನೆ. ತೋಟದ ನಿರ್ವಹಣೆಗಾಗಿ ದೊಡ್ಡ ಮೊತ್ತದ ಹಣವನ್ನು ವಿನಿಯೋಗಿಸಿರುತ್ತಾನೆ. ಮತ್ತೊಂದು ಕಡೆ ಯಾರದ್ದೋ ತೋಟದ ಕಡೆ ಕಳ್ಳರನ್ನು ಸೆಳೆಯುವಂತೆ ಈ ದರ ಮಾಡುತ್ತಿದೆ.

ಪ್ರತಿವರ್ಷವೂ ಕಾಡುವ ಅತಿವೃಷ್ಠಿ, ಅನಾವೃಷ್ಠಿ, ಪ್ರಾಕೃತಿಕ ವಿಕೋಪ, ಮಾನವ-ವನ್ಯಜೀವಿ ಸಂಘರ್ಷ... ಹೀಗೆ ಹಲವು ಕಾರಣಗಳಿಂದ ಕಾಫಿ ಬೆಳೆಗಾರರು ನಷ್ಟಕ್ಕೆ ಒಳಗಾಗುವುದು ಸಾಮಾನ್ಯ. ಇದರ ಜತೆಗೆ ವರ್ಷದಿಂದ ವರ್ಷಕ್ಕೆ ಏರುತ್ತಲೇ ಹೋಗುತ್ತಿರುವ ತೋಟಗಳ ನಿರ್ವಹಣಾ ವೆಚ್ಚ, ಉತ್ಪಾದನಾ ವೆಚ್ಚಕ್ಕೆ ಸರಿದೂಗದ ಮಾರುಕಟ್ಟೆ ಬೆಲೆ ಕಾಫಿ ಬೆಳೆಗಾರರನ್ನು ಈ ಕೃಷಿಯಿಂದ ಬಹುತೇಕ ವಿಮುಖರಾಗುವಂತೆ ಮಾಡಿರುವುದೂ ನಿಜ. ಈ ಎಲ್ಲಾ ಕಾರಣಗಳಿಂದ ಜಿಲ್ಲೆಯ ಬಹುತೇಕ ಕಾಫಿ ತೋಟಗಳು ಮಾರಾಟವಾಗಿದ್ದರೆ. ಕೆಲವರು ತೋಟಗಳನ್ನು ಗುತ್ತಿಗೆ ಕೊಟ್ಟು ನಗರ ಸೇರಿಕೊಂಡಿದ್ದಾರೆ. ಈ ಮಧ್ಯೆ ಅಲ್ಲಲ್ಲಿ ಉಳಿದುಕೊಂಡಿರುವ ಕಾಫಿ ತೋಟಗಳಿಗೆ ಈಗ ಕಳ್ಳರ ಹಾವಳಿಯಿಂದಾಗಿ ಬೆಳೆಗಾರ ಬೇಸತ್ತು ಹೋಗುವಂತೆ ಆಗಿದೆ.

ಕಾಫಿಗೆ ಬೆಲೆ ಇಲ್ಲ ಎಂದು ಬೆಳೆಗಾರ ಕೊರಗುತ್ತಿರುವ ಹೊತ್ತಿನಲ್ಲಿ ಕಳೆದ ವರ್ಷದಿಂದ ಈಚೆಗೆ ಕಾಫಿಗೆ ಉತ್ತಮ ದರ ಸಿಗುತ್ತಿದೆ. ಇದರಿಂದ ಬೆಳೆಗಾರು ಸಂಭ್ರಮ ಪಡಬೇಕಾಗಿದ್ದಲ್ಲಿ ಹಣ್ಣಾಗಿರುವ ಕಾಫಿ ಮತ್ತು ಕೊಯ್ಲು ಮಾಡಿ ಒಣಹಾಕಿರುವ ಕಾಫಿಯನ್ನು ಮಾರುಕಟ್ಟೆ ತಲುಪಿಸುವ ತನಕ ನೆಮ್ಮದಿ ಕಳೆದುಕೊಳ್ಳುವಂತಾಗಿದೆ. ಕಣದಲ್ಲಿ ಒಣಹಾಕಿದ ಕಾಫಿಯನ್ನು ಮಾತ್ರ ದೋಚದ ಕಳ್ಳರು ಗಿಡದಿಂದಲೂ ಕದ್ದುಕೊಂಡು ಹೋಗುವ ಪರಿಪಾಟ ರೂಢಿಸಿಕೊಂಡಿದ್ದಾರೆ.

ಸಾಮಾನ್ಯವಾಗಿ ಕಾಫಿ ಒಣ ಹಾಕಿದ್ದ ಕಣಕ್ಕೆ ಇಳಿದು ದೋಚುತ್ತಿದ್ದ ಕಳ್ಳರು ಇದೀಗ ಇನ್ನೂ ಒಂದು ಹೆಜ್ಜೆ ಮುಂದೆ ಹೋಗಿದ್ದಾರೆ. ಗಿಡಗಳಿಂದ ರೆಂಬೆ ಸಹಿತ ಕಾಫಿ ಹಣ್ಣನ್ನು ಕಿತ್ತು ಚೀಲಕ್ಕೆ ತುಂಬಿಸಿಕೊAಡು ಪರಾರಿ ಆಗುತ್ತಿದ್ದಾರೆ. ಕಳ್ಳರ ಈ ದುಷ್ಕೃತ್ಯದಿಂದ ಫಸಲು ಮಾತ್ರ ನಾಶವಾಗುವುದಲ್ಲದೆ ಕಾಫಿಗಿಡಗಳೂ ಹಾನಿಗೆ ಒಳಗಾಗುತ್ತಿವೆ. ಜಿಲ್ಲೆಯ ಬಹುತೇಕ ಭಾಗಗಳಲ್ಲಿ ಇಂಥ ಕೆಲಸ ಕಳೆದ ವರ್ಷದಿಂದ ಶುರುವಾಗಿದೆ. ಕೆಲವು ಕಡೆಗಳಲ್ಲಿ ಇಂಥ ಕಳ್ಳರು ಬೆಳೆಗಾರರ ಕೈಗೆ ಸಿಕ್ಕಿಬಿದ್ದ ನಂತರ ಪೊಲೀಸರ ವಶಕ್ಕೆ ಒಪ್ಪಿಸಲಾಗಿದೆ.

ಕಾಫಿಯ ಜತೆಗೆ ಕಪ್ಪು ಬಂಗಾರ ಕರಿಮೆಣಸು ಕಳುವು ಕೂಡ ಕೊಡಗಿನ ಕಾಫಿ ತೋಟಗಳಲ್ಲಿ ಸಾಮಾನ್ಯವಾಗಿದೆ. ಇಂಥ ಪ್ರಕರಣಗಳು ಹೆಚ್ಚಾಗುತ್ತಿರುವಂತೆಯೇ ಪೊಲೀಸರು ಅಲರ್ಟ್ ಆಗಿದ್ದಾರೆ. ಕಳುವು ಮಾಡಿದ ಮಾಲು ಖರೀದಿಸುವವರು ಇದ್ದಾಗ ಮಾತ್ರ ಕಳ್ಳತನ ಹೆಚ್ಚಾಗುತ್ತದೆ ಎನ್ನುವುದು ಅರಿತಿರುವ ಪೊಲೀಸರು ಇಂಥ ಖರೀದಿದಾರರ ಮೇಲೆಯೇ ನಿಗಾ ಇಡಲಾರಂಭಿಸಿದ್ದಾರೆ. ಮುನ್ನೆಚ್ಚರಿಕಾ ಕ್ರಮವಾಗಿ ಜಿಲ್ಲೆಯಲ್ಲಿನ ಕಾಫಿ ಮತ್ತು ಕಾಳು ಮೆಣಸು ವ್ಯಾಪಾರ ಮಾಡುವವರೊಂದಿಗೆ ಸಭೆ ನಡೆಸಿ ಸೂಕ್ತ ಸಲಹೆ ಸೂಚನೆಗಳನ್ನು ನೀಡುವಂತೆ ಮತ್ತು ಕಾಫಿ ಹಾಗೂ ಕಾಳುಮೆಣಸು ವ್ಯಾಪಾರಸ್ಥರ ಸಂಪೂರ್ಣ ಮಾಹಿತಿಯನ್ನು ಸಂಗ್ರಹಿಸುವAತೆ ಆಯಾಯ ಪ್ರದೇಶದ ಸ್ಥಳೀಯ ಪೊಲೀಸ್ ಠಾಣಾಧಿಕಾರಿಗಳಿಗೆ ಈಗಾಗಲೇ ಎಸ್‌ಪಿ ಕೆ. ರಾಮರಾಜನ್ ಸೂಚನೆಗಳನ್ನು ನೀಡಿದ್ದಾರೆ.

ಕಾಫಿ ಮತ್ತು ಕಾಳು ಮೆಣಸು ವ್ಯಾಪಾರಸ್ಥರು ಕಾಫಿ ಮತ್ತು ಕಾಳು ಮೆಣಸು ಖರೀದಿ ಮಾಡುವ ಸಂದರ್ಭದಲ್ಲಿ ಹೆಸರು, ವಿಳಾಸ, ಮೊಬೈಲ್ ಸಂಖ್ಯೆ, ವಹಿವಾಟಿನ ವಿವರ ತೂಕ ಹಾಗೂ ಮೊತ್ತ ಸೇರಿದಂತೆ ಮಾರಾಟ ಮಾಡುವವರ ಸಂಪೂರ್ಣ ಮಾಹಿತಿಯನ್ನು ವ್ಯಾಪಾರಿಗಳು ಸಂಗ್ರಹಿಸಿ ಇಟ್ಟುಕೊಳ್ಳಬೇಕು. ಕಾಫಿ ಅಥವಾ ಕರಿಮೆಣಸು ಖರೀದಿ ಸಂದರ್ಭ ಸಂಶಯ ಉಂಟಾದಲ್ಲಿ ಅಂಥ ವ್ಯಕ್ತಿಗಳ ಫೋಟೋ ತೆಗೆದುಕೊಳ್ಳಬೇಕು. ಈ ಮಾರಾಟಗಾರರ ಹಿನ್ನೆಲೆ ಪರಿಶೀಲಿಸಿ ಎಚ್ಚರಿಕೆಯಿಂದ ವ್ಯವಹರಿಸಬೇಕು ಎನ್ನುವ ಸೂಚನೆಗಳನ್ನು ವ್ಯಾಪಾರಿಗಳಿಗೆ ನೀಡಲಾಗಿದೆ.

ಕಾಫಿ ವ್ಯಾಪಾರಸ್ಥರು ಕಾಫಿ ಅಥವಾ ಕರಿಮೆಣಸು ಮಾರಾಟ ಮಾಡುವವರ ವಿವರಗಳನ್ನು ಪಡೆಯುವುದು ಕಡ್ಡಾಯ ಮಾಡಲಾಗಿದೆ. ಒಂದು ವೇಳೆ ಪೊಲೀಸರ ಈ ಸೂಚನೆಗಳನ್ನು ನಿರ್ಲಕ್ಷಿಸಿ ದಾಖಲಾತಿಗಳನ್ನು ನಿರ್ವಹಿಸದಿರುವುದು ಕಂಡುಬAದಲ್ಲಿ ಅಂಥÀವರ ವಿರುದ್ಧ ಜಿಎಸ್‌ಟಿ ಇಲಾಖೆಗೆ ಮಾಹಿತಿ ಕೊಡುವುದಲ್ಲದೆ ಯಾವುದೇ ದಾಖಲಾತಿ ನಿರ್ವಹಿಸದೇ ವ್ಯವಹರಿಸಿರುವುದನ್ನು ಉದ್ದೇಶಪೂರ್ವಕವಾಗಿ ಕಳುವು ಮಾಲನ್ನು ಕಡಿಮೆ ಬೆಲೆಯಲ್ಲಿ ಪಡೆದಿರುವುದಾಗಿ ಪರಿಗಣಿಸಿ ವ್ಯಾಪಾರಸ್ಥರ ಮೇಲೆ ಪ್ರಕರಣ ದಾಖಲಿಸಲಾಗುತ್ತದೆ. ಇಂಥವರಿಗೆ ನ್ಯಾಯಾಲಯದಿಂದ 3 ರಿಂದ 10 ವರ್ಷಗಳವರೆಗೆ ಜೈಲು ಶಿಕ್ಷೆ ಹಾಗೂ ದಂಡ ವಿಧಿಸುವ ಸಾಧ್ಯತೆಗಳಿರುತ್ತದೆ ಎನ್ನುವ ಎಚ್ಚರಿಕೆಯನ್ನೂ ನೀಡಲಾಗಿದೆ.

"