ಚಿಕ್ಕ ಜಿಲ್ಲೆ ಕೊಡಗಿನಿಂದ ಕ್ರೀಡೆಗೆ ದೊಡ್ಡ ಕೊಡುಗೆ

ಕೊಡಗು ಸಣ್ಣ ಜಿಲ್ಲೆಯಾಗಿದ್ದು ಜನಸಂಖ್ಯೆಯೂ ಕಡಿಮೆ ಆಗಿದ್ದರೂ ಕ್ರೀಡೆಗೆ ದೊಡ್ಡ ಕೊಡುಗೆ ನೀಡಿದೆ ಎಂದು ಮುಖ್ಯಮಂತ್ರಿಗಳ ಕಾನೂನು ಸಲಹೆಗಾರರೂ ಆಗಿರುವ ವೀರಾಜಪೇಟೆ ಶಾಸಕ ಎ.ಎಸ್. ಪೊನ್ನಣ್ಣ ಹೇಳಿದರು. ಮಡಿಕೇರಿ ಅರೆಭಾಷೆ ಗೌಡ ಸ್ಪೋರ್ಟ್ಸ್ ಅಕಾಡೆಮಿ ವತಿಯಿಂದ ಮಡಿಕೇರಿಯ ಗಾಂಧಿ ಮೈದಾನದಲ್ಲಿ ಗೌಡ ಜನಾಂಗ ಬಾಂಧವರಿಗಾಗಿ ಏರ್ಪಡಿಸಲಾಗಿದ್ದ, ಎರಡು ದಿನಗಳ ಕಾಲ ನಡೆದ ಹೊನಲು ಬೆಳಕಿನ ಗೌಡ ಕ್ರೀಡಾ ಹಬ್ಬದ ಸಮಾರೋಪ ಸಮಾರಂಭದಲ್ಲಿ ಪಾಲ್ಗೊಂಡು ಸೋಮವಾರ ಮಾತನಾಡಿದರು.

ಕೊಡಗು ಜಿಲ್ಲೆಯಲ್ಲಿ ಇದೀಗ ಹಬ್ಬದ ವಾತಾವರಣವಿದೆ. ಯಾವುದೇ ಮೈದಾನ ನೋಡಿದರೂ ಅಲ್ಲಿ ಕ್ರೀಡಾಕೂಟಗಳು ನಡೆಯುತ್ತಿವೆ. ಎಲ್ಲ ಜನಾಂಗ, ಧರ್ಮ, ಜಾತಿ, ವರ್ಗ, ಪಂಗಡ ಎಲ್ಲ ಒಟ್ಟು ಸೇರಿ ಕ್ರೀಡೆಯಲ್ಲಿ ಭಾಗವಹಿಸುತ್ತಿರುವದು ಹೆಮ್ಮೆಯ ವಿಷಯವಾಗಿದೆ. ಒಂದು ಜಿಲ್ಲೆಯಿಂದ ದೇಶದಲ್ಲಿ ಅತಿ ಹೆಚ್ಚು ಸಂಖ್ಯೆಯ ಒಲಿಂಪಿಯನ್ಸ್, ಅಂತಾರಾಷ್ಟಿçÃಯ ಆಟಗಾರರನ್ನು ನೀಡಿರುವ ಜಿಲ್ಲೆಯೆಂದರೆ ಅದು ಕೊಡಗು. ಕ್ರೀಡಾ ಹಬ್ಬಗಳು ಇಂದಿನ ಅವಶ್ಯಕತೆ ಕೂಡಾ ಹೌದು. ಮೈದಾನದಲ್ಲಿ ಆಟವಾಡದಿದ್ದರೂ ಮಕ್ಕಳು, ಯುವಕ-ಯುವತಿಯರು, ಮಹಿಳೆಯರು ಓಡಾಡಿಕೊಢಿದ್ದರೆ ಸಮಾಜ ಜಾಗೃತವಾಗಿದೆ ಎಂದರ್ಥ. ಕ್ರೀಡಾಕೂಟ ಆಯೋಜನೆ ಕಷ್ಟದ ಹಾಗೂ ಫಲಾಪೇಕ್ಷೆಯಿಲ್ಲದ ಕೆಲಸ. ಎಲ್ಲರೂ ಆಟವಾಡಿ ಹೋಗುತ್ತಾರೆ. ಆಯೋಜಕರ ಶ್ರಮವನ್ನು ಗುರುತಿಸುವುದಿಲ್ಲ. ಅಂತಹದ್ದರಲ್ಲಿ ಅರೆಭಾಷೆ ಸ್ಪೋರ್ಟ್ಸ್ ಅಕಾಡೆಮಿಯ ಶ್ರಮ ಶ್ಲಾಘನೀಯ. ಎಲ್ಲರಲ್ಲೂ ಪ್ರತಿಭೆಯಿದ್ದು ಎಲ್ಲರಿಗೂ ವೇದಿಕೆ ಹಾಗೂ ಅವಕಾಶಗಳ ಕೊರತೆ ಇರುತ್ತದೆ. ಇಂತಹ ಕಾರ್ಯಕ್ರಮಗಳ ಮೂಲಕ ಕ್ರೀಡಾ ಸಂಸ್ಕೃತಿ-ಪರAಪರೆ ಮುಂದುವರಿಯಬೇಕು. ಈ ಒಂದು ಕ್ರೀಡಾ ಹಬ್ಬದಲ್ಲಿ ಲೆಜೆಂಡ್ಸ್ ತಂಡದಲ್ಲಿ 60ವರ್ಷಕ್ಕೂ ಮೇಲ್ಪಟ್ಟವರು ಕೂಡ ಭಾಗವಹಿಸಿರುವದು ಸಂತೋಷದ ವಿಷಯ. ಹಲವಾರು ಪ್ರತಿಭಾವಂತರು ಇರುತ್ತಾರೆ. ಅವರುಗಳಿಗೆ ಕ್ರೀಡೆ ಮುಂತಾದ ಚಟುವಟಿಕೆಗಳಿಂದ ಸಾಧನೆ ಮಾಡಲು ಸಾಧ್ಯವಿದೆ. ಕ್ರೀಡೆಯಲ್ಲಿ ಭಾಗವಹಿಸುವುದರಿಂದ ಸೋಲು-ಗೆಲುವನ್ನು ಸಮಾನವಾಗಿ ಸ್ವೀಕರಿಸುವ ಮನೋಭಾವದೊಂದಿಗೆ ಸೋತು ಗೆಲ್ಲುವ ಸಾಮರ್ಥ್ಯ ಬರಲಿದೆ ಎಂದರು.

ಉದ್ಯಮಿ ಎಡಿಕೇರಿ ಪ್ರಸನ್ನ, ರಾಜ್ಯ ಒಕ್ಕಲಿಗರ ಸಂಘದ ಕಾರ್ಯಾಧ್ಯಕ್ಷ ಹರಪಳ್ಳಿ ರವೀಂದ್ರ ಕ್ರೀಡಾ ಹಬ್ಬಕ್ಕೆ ಶುಭ ಹಾರೈಸಿದರು. ಇದಕ್ಕೂ ಮುನ್ನ ಶಾಸಕ ಪೊನ್ನಣ್ಣ ಹಗ್ಗಜಗ್ಗಾಟ ಅಂತಿಮ ಪಂದ್ಯಾವಳಿಗೆ ಚಾಲನೆ ನೀಡಿದರು. ಕಾರ್ಯಕ್ರಮದಲ್ಲಿ ಮಡಿಕೇರಿ ನಗರಸಭಾಧ್ಯಕ್ಷೆ ಪಿ. ಕಲಾವತಿ, ಉಪಾಧ್ಯಕ್ಷ ಮಹೇಶ್ ಜೈನಿ, ಸದಸ್ಯೆ ಕುಟ್ಟನ ಶ್ವೇತಾ ಪ್ರಶಾಂತ್, ನಾಮ ನಿರ್ದೇಶಿತ ಸದಸ್ಯ ಮುದ್ದುರಾಜ್, ಅಯ್ಯಂಗೇರಿ ಗ್ರಾ.ಪಂ. ಮಾಜಿ ಅಧ್ಯಕ್ಷ ಕುಯ್ಯಮುಡಿ ರಂಜು, ಕಾಂಗ್ರೆಸ್ ಮುಖಂಡ ಅಪ್ರು ರವೀಂದ್ರ, ಸಮಾಜ ಸೇವಕ ಸೂರಜ್ ಹೊಸೂರು, ದಾನಿಗಳಾದ ಬೊಮ್ಮನ ಕಿರಣ್, ತೋಟಂಬೈಲ್ ಅನಂತ್‌ಕುಮಾರ್, ದಂಬೆಕೋಡಿ ಕವನ ಭೀಷ್ಮ, ಸರ್ಕಾರಿ ನೌಕರರ ಸಂಘದ ಜಿಲ್ಲಾಧ್ಯಕ್ಷ ಮುಕ್ಕಾಟಿ ಅರುಣ್‌ಕುಮಾರ್ ಹಾಗೂ ಗೌಡ ಸ್ಪೋರ್ಟ್ಸ್ ಅಕಾಡೆಮಿ ಪದಾಧಿಕಾರಿಗಳು ಇದ್ದರು. ನಂತರ ನಾಲ್ಕು ವಿಭಾಗಗಳ ಫುಟ್ಬಾಲ್ ಪಂದ್ಯಾವಳಿಗಳ ಅಂತಿಮ ಪಂದ್ಯಾಟಗಳು ನಡೆದು ಬಳಿಕ ಬಹುಮಾನ ವಿತರಣೆ ಮಾಡಲಾಯಿತು.

ದ್ವಿತೀಯ ಪಿಯುಸಿಯಲ್ಲಿ ರಾಜ್ಯಕ್ಕೆ ನಾಲ್ಕನೇ ಸ್ಥಾನ ಹಾಗೂ ಜಿಲ್ಲೆಗೆ ಪ್ರಥಮ ಸ್ಥಾನ ಪಡೆದುಕೊಂಡಿರುವ ವಿದ್ಯಾರ್ಥಿನಿ ಹೊಸಮನೆ ಸಿಂಚನಾಳನ್ನು ಅಕಾಡೆಮಿ ವತಿಯಿಂದ ಕಾರ್ಯಕ್ರಮದಲ್ಲಿ ಸನ್ಮಾನಿಸಲಾಯಿತು. ಇದೇ ಸಂದರ್ಭದಲ್ಲಿ ಶಾಸಕ ಪೊನ್ನಣ್ಣ ಅವರೂ ಕೂಡ ವೈಯಕ್ತಿಕವಾಗಿ ಸಿಂಚನಾಳನ್ನು ಸನ್ಮಾನಿಸಿದರು. ಈ ವೇಳೆ ಮಾತನಾಡಿದ ಪೊನ್ನಣ್ಣ ಜಿಲ್ಲೆಯ ವಿದ್ಯಾರ್ಥಿನಿ ಹೊಸಮನೆ ಸಿಂಚನ ಪ್ರಸನ್ನ ಶೇ.99.5 ಅಂಕಗಳೊAದಿಗೆ ಪ್ರಥಮ ಗಳಿಸಿರುವದು ಹೆಮ್ಮೆಯ ವಿಷಯ. ಇಲ್ಲಿ ಎಲ್ಲರಿಗೂ ಪ್ರಥಮ ಸ್ಥಾನ ಪಡೆಯಲು ಸಾಧ್ಯವಿಲ್ಲ. ಇದಕ್ಕೆ ಶಿಕ್ಷಣ ಕ್ಷೇತ್ರದಲ್ಲೂ ಉತ್ತರವಿಲ್ಲ ಎಂದು ಹೇಳಿದರು. ಸಿಂಚನಾಳ ತಂದೆ ಪ್ರಸನ್ನ, ತಾಯಿ ವೀಣಾ, ಸಹೋದರಿ ಸಮೃದ್ಧಿ, ಅಜ್ಜಿ ಇದ್ದರು.