ಹುಬ್ಬಳ್ಳಿ: ಇಲ್ಲಿಯ ಕೆಎಲ್ಇ ತಾಂತ್ರಿಕ ಮಹಾವಿದ್ಯಾಲಯವು ಕರ್ನಾಟಕ ಸರ್ಕಾರದ ಇಎಲ್, ಐಟಿ ಮತ್ತು ಬಯೊಟೆಕ್ನಾಲಜಿ (ಇಎಲ್, ಐಟಿ ಮತ್ತು ಬಿಟಿ) ಇಲಾಖೆ, ಕರ್ನಾಟಕ ಇನ್ನೋವೇಶನ್ ಮತ್ತು ಟೆಕ್ನಾಲಜಿ ಸೊಸೈಟಿ (ಕೆಐಟಿಎಸ್) ವತಿಯಿಂದ ಪ್ರಸ್ತುತಗೊಳ್ಳುತ್ತಿರುವ ಕರ್ನಾಟಕ ಸ್ಟಾರ್ಟಪ್ ಪಾಲಿಸಿಯ 2022-27ರ ಅಡಿಯಲ್ಲಿ ನ್ಯೂ ಏಜ್ ಇನ್ನೋವೇಶನ್ ನೆಟ್ವರ್ಕ್ (ಎನ್ಎಐಎನ್) 2.0 ಕಾರ್ಯಕ್ರಮಕ್ಕೆ ಆಯ್ಕೆಯಾಗಿದೆ.
ಮಹಾವಿದ್ಯಾಲಯವು ಹೊಸ ಆವಿಷ್ಕಾರ ಮತ್ತು ಉದ್ಯಮಶೀಲತೆಯನ್ನು ಉತ್ತೇಜಿಸಲು ಬದ್ಧವಾಗಿದ್ದು, ಈ ಗೌರವವು ಇದಕ್ಕೆ ಇನ್ನಷ್ಟು ಪೂರಕವಾಗಿದೆ.
ಎನ್ಎಐಎನ್ 2.0 ಕಾರ್ಯಕ್ರಮವು ರಾಜ್ಯದ ಯುವ ಉದ್ಯಮಶೀಲತೆಗೆ ಶಕ್ತಿ ನೀಡಲು ಕರ್ನಾಟಕ ಸರ್ಕಾರದ ಮಹತ್ವಾಕಾಂಕ್ಷೆಯ ಕಾರ್ಯಕ್ರಮವಾಗಿದೆ. ಈ ಕಾರ್ಯಕ್ರಮಕ್ಕೆ ಆಯ್ಕೆಯಾಗಿದ್ದರಿಂದ ಕೆಎಲ್ಇ ತಾಂತ್ರಿಕ ಮಹಾವಿದ್ಯಾಲಯವು ಶೈಕ್ಷಣಿಕ ಪರಿಸರದಲ್ಲಿ ಆವಿಷ್ಕಾರಾತ್ಮಕ ಚಟುವಟಿಕೆಗಳನ್ನು ಉತ್ತೇಜಿಸಲು ಅಗತ್ಯವಾದ ಮೂಲಸೌಕರ್ಯ, ಮಾರ್ಗದರ್ಶನ ಮತ್ತು ಉದ್ಯಮಪರ ಸಂಪರ್ಕಗಳಿಗೆ ಅನುವು ಮಾಡಿಕೊಡುತ್ತದೆ.
ಕೆಎಲ್ಇ ತಾಂತ್ರಿಕ ಮಹಾವಿದ್ಯಾಲಯದ ಆಡಳಿತ ಮಂಡಳಿ ಹಾಗೂ ಪ್ರಾಂಶುಪಾಲ ಡಾ. ಮನು ಟಿ.ಎಂ. ಅವರು ಈ ಯಶಸ್ಸಿನ ಬಗ್ಗೆ ಸಂತಸ ವ್ಯಕ್ತಪಡಿಸಿದ್ದಾರೆ.
"ಈ ಸಾಧನೆ ನಮ್ಮ ಸಂಸ್ಥೆಗೆ ಹೆಮ್ಮೆಯ ಸಂಗತಿಯಾಗಿದೆ. ಎನ್ಎಐಎನ್ 2.0 ಕಾರ್ಯಕ್ರಮವು ನಮ್ಮ ವಿದ್ಯಾರ್ಥಿ ಉದ್ಯಮಿಗಳಿಂದ ಹೊರಹೊಮ್ಮಿದ ಆವಿಷ್ಕಾರಗಳನ್ನು ಮುಂದಿನ ಹಂತಕ್ಕೆ ತಲುಪಿಸಲು ಮಹತ್ತರ ಸಾಧನೆ ಮಾಡಲಿದೆ' ಎಂದು ಅವರು ಹೇಳಿದರು.