ಸಂತಸಕ್ಕೆ ಕಾರಣ ನಾವೇ ಹುಡುಕಿಕೊಳ್ಳಬೇಕು: ಕವಿ ಬಿ.ಆರ್​. ಲಕ್ಷ್ಮಣರಾವ್​ ಅಭಿಮತ

ಬೆಂಗಳೂರು: ಜೀವನದಲ್ಲಿ ಸಂತಸದಿಂದ ಇರಲು ಬೇಕಾಗುವ ಕಾರಣಗಳನ್ನು ನಾವೇ ಹುಡುಕಿಕೊಳ್ಳಬೇಕು ಎಂದು ಹಿರಿಯ ಕವಿ ಬಿ.ಆರ್​. ಲಕ್ಷ್ಮಣರಾವ್​ ಹೇಳಿದ್ದಾರೆ.

ಸಂಗೀತಧಾಮ ಟ್ರಸ್ಟ್​ ಬಸವನಗುಡಿಯ ನ್ಯಾಷನಲ್​ ಕಾಲೇಜಿನ ಡಾ. ಎಚ್​.ಎನ್​. ಮಲ್ಟಿಮೀಡಿಯಾ ಸಭಾಂಗಣದಲ್ಲಿ ಭಾನುವಾರ ಆಯೋಜಿಸಿದ್ದ ಶೈಲೇಶ್​ ಪಟವರ್ಧನ್​ ರಚಿಸಿದ "ಖುಷಿಪಡಲು ಕಾರಣ' ಕವನ ಸಂಕಲನ ಹಾಗೂ ಮೃತ್ಯುಂಜಯ ದೊಡ್ಡವಾಡ ಸಂಗೀತ ನಿರ್ದೇಶನದ 47ನೇ ಧ್ವನಿಸಾಂದ್ರಿಕೆ ಬಿಡುಗಡೆ ಕಾರ್ಯಕ್ರಮದಲ್ಲಿ ಮಾತನಾಡಿದರು.

ಕುವೆಂಪು, ದ.ರಾ. ಬೇಂದ್ರೆ ಅವರು ಗೇಯ ಗೀತೆ ಬರೆಯುತ್ತಿದ್ದರು. ಅವರು ಛಂದೋಬದ್ಧವಾಗಿ ಇದ್ದುದರಿಂದ ಹಾಡಲು ಅನುಕೂಲಕರವಾಗಿತ್ತು. ಆಕಾಶವಾಣಿ ಮೂಲಕ ಈ ಹಾಡುಗಳು ಜನರಿಗೆ ತಲುಪಲು ಆರಂಭವಾಯಿತು. ಆಕಾಶವಾಣಿ ನಂತರ ಕ್ಯಾಸೆಟ್​ಗಳ ಮುನ್ನೆಲೆಗೆ ಬಂತು. "ನಿತ್ಯೋತ್ಸವ' ಮೊದಲ ಕ್ಯಾಸೆಟ್​ ಆಗಿದ್ದು, ಇದು ಬಿಡುಗಡೆಯಾದ ಬಳಿಕ ಭಾವಗೀತೆಯ ಸ್ವರೂಪ ಬದಲಾಯಿತು. ಅಲ್ಲಿಯವರೆಗೆ ಕವಿಗಳು ಬರೆದ ಗೀತೆಗಳಿಗೆ ರಾಗ ಸಂಯೋಜನೆ ಮಾಡಲಾಗುತ್ತಿತ್ತು, ಇದೆಲ್ಲವೂ ಕವನ ಸಂಕಲನಗಳೇ ಆಗಿದ್ದವು. ನಿತ್ಯೋತ್ಸವದಲ್ಲಿ ಹಾಡಲೆಂದೇ ಕವಿತೆಗಳನ್ನು ಬರೆಯಲಾಗಿತ್ತು. ಕವಿಗಳೇ ಇದನ್ನು ಬರೆಯುತ್ತಿದ್ದುದರಿಂದ ಕಾವ್ಯದ ಸತ್ವ ಇರುತ್ತಿತ್ತು. ಪ್ರಸ್ತುತ ಕ್ಯಾಸೆಟ್​, ಸಿ.ಡಿ. ಕಾಲ ಅಂತ್ಯವಾಗಿದೆ. ಆಲ್ಬಂ ಹಾಡು ಇಂದಿನ ಟ್ರೆಂಡ್​ ಆಗಿದ್ದು, ಇದು ಲಾಭದಾಯಕ ಉದ್ಯಮ ಎಂದು ಸಂಪೂರ್ಣವಾಗಿ ಹೇಳಲು ಸಾಧ್ಯವಿಲ್ಲ ಎಂದರು.

ದೂರದರ್ಶನದ ಬೆಂಗಳೂರು ವಿಭಾಗದ ನಿರ್ದೇಶಕಿ ಡಾ.ನಿರ್ಮಲಾ ಎಲಿಗಾರ್​ ಮಾತನಾಡಿ, ಉಸಿರು ನಿಲ್ಲುವತನಕದ ಬದುಕಿನ ಬವಣೆಯನ್ನು "ಖುಷಿ ಪಡಲು ಕಾರಣ' ಗೀತ ದೃಶ್ಯ ಸುಂದರವಾಗಿ ಕಟ್ಟಿಕೊಟ್ಟಿದೆ. 15 ವರ್ಷಗಳ ಹಿಂದೆ ದೂರದರ್ಶನದಲ್ಲಿ ಆಲ್ಬಂ ಹಾಡುಗಳನ್ನು ಕಾರ್ಯಕ್ರಮದ ಮಧ್ಯದಲ್ಲಿ ಫಿಲ್ಲರ್​ಗಳಾಗಿ ಪ್ರಸಾರ ಮಾಡಲಾಗುತ್ತಿತ್ತು. ಅಂದಿಗೆ ವಿನೂತನವಾಗಿದ್ದ ಈ ಪ್ರಯತ್ನ ಯಶಸ್ವಿಯಾಗಿತ್ತು ಎಂದು ತಿಳಿಸಿದರು.

ಆಕಾಶವಾಣಿ ನಿವೃತ್ತ ಕಾರ್ಯಕ್ರಮ ನಿರ್ವಹಣಾಧಿಕಾರಿ ಗೋಪಾಲ್​ ನಾಯಕ್​, ನ್ಯಾಷನಲ್​ ಎಜುಕೇಷನ್​ ಸೊಸೈಟಿ ಪ್ರಧಾನ ಕಾರ್ಯದರ್ಶಿ ವಿ. ವೆಂಕಟಶಿವಾರೆಡ್ಡಿ, ಪಿಇಎಸ್​ ಕಾಲೇಜಿನ ಕನ್ನಡ ವಿಭಾಗದ ಪ್ರಾಧ್ಯಾಪಕ ಪಿ.ಎಲ್​. ನಂದಾ ಮತ್ತಿತರರಿದ್ದರು.