ಗೋ ಹತ್ಯೆ ನಿಷೇಧ ಕಟ್ಟು ನಿಟ್ಟಾಗಿ ಜಾರಿಗೆ ತನ್ನಿ: ಬಜರಂಗದಳ ಆಗ್ರಹ

ನಗರದ ಪೊಲೀಸ್​ ಆಯುಕ್ತ ಕಚೇರಿ ಎದುರು ನೂರಾರು ಕಾರ್ಯಕರ್ತರು, ಮುಖಂಡರು ಪ್ರತಿಭಟನೆ ನಡೆಸಿ, ಗೋ ವಧೆ ಮಾಡುವ ಸ್ಥಳಗಳನ್ನು ಸರ್ಕಾರ ಮುಟ್ಟುಗೋಲು ಹಾಕಬೇಕು ಎಂಬ ನಿಯಮವಿದ್ದು, ಅದನ್ನು ನಗರದಲ್ಲಿ ಅನ್ವಯಿಸಿ, ಕಟ್ಟು ನಿಟ್ಟಾಗಿ ಜಾರಿ ಮಾಡಬೇಕು ಎಂದು ಮನವಿ ಮಾಡಿದರು.

ಅಕ್ರಮ ಗೋ ಸಾಗಣೆಯ ವಾಹನದ ಮಾಲಿಕರನ್ನು ಬಂಧಿಸಬೇಕು, ಪದೇ ಪದೆ ಗೋ ಅಪರಾಧ ಮಾಡುತ್ತಿರುವವರಿಗೆ ಜಾಮೀನು ಸಿಗದಂತೆ ಕೋರ್ಟ್​ಗೆ ಮಾಹಿತಿ ನೀಡಬೇಕು, ಮೇ 28ರವರೆಗೆ ಗೋ ಸಾಗಿಸುತ್ತಿದ್ದ ವಾಹನಗಳನ್ನು ಠಾಣೆಯಲ್ಲಿ ಇರಿಸಿಕೊಳ್ಳಬೇಕು, ಬಿಡಾಡಿ ಗೋವುಗಳನ್ನು ಕದಿಯುವ ಸಾಧ್ಯತೆ ಇದ್ದು, ನಿಗಾ ಇಡಬೇಕು, ಎಲ್ಲ ಜಿಲ್ಲೆಗಳಲ್ಲಿ ಸರ್ಕಾರಿ ಗೋ ಶಾಲೆಗಳನ್ನು ತೆರೆಯಬೇಕು, ಗೋರಕ್ಷಣೆಗೆ ಪೊಲೀಸರು ಸಾರ್ವಜನಿಕರ ಸಹಕಾರ ತೆಗೆದುಕೊಳ್ಳಬೇಕು ಎಂದು ಆಗ್ರಹಿಸಿದರು.

ಬೆಂಗಳೂರಿನಲ್ಲಿ ರಚಿಸಿದ ಹಾಗೆ ಕಲಬುರಗಿ ನಗರ, ಜಿಲ್ಲೆಯಲ್ಲೂ ಬಕ್ರೀದ್​ ವೇಳೆ ಕುರ್ಬಾನಿ ಆಗದಂತೆ ವಿವಿಧ ಇಲಾಖೆಗಳ ಸಮನ್ವಯದಲ್ಲಿ ತಂಡ ರಚಿಸಬೇಕು, ಸಾರ್ವಜನಿಕರಿಂದ ಮಾಹಿತಿ ಸಿಕ್ಕ ಕೂಡಲೇ ಗೋವುಗಳನ್ನು ರಸಬೇಕು, ದೂರು ದಾಖಲಾಗದಿದ್ದರೆ ಕಾರಣರಾದವರ ವಿರುದ್ಧ ಕ್ರಮ ಕೈಗೊಳ್ಳಬೇಕು ಎಂದು ಆಗ್ರಹಿಸಿದರು.

ಬಜರಂಗದಳದ ಪ್ರಾಂತ ಸಂಯೋಜಕ ಬಸವರಾಜ ಸೂಗೂರ, ಸಹ ಸಂಯೋಜಕ ಶಿವಕುಮಾರ ಸುಕಲೂರ, ಮಹಾನಗರ ಸಂಯೋಜಕ ರಾವೇಂದ್ರ ಗುತ್ತೇದಾರ್​, ಸಹ ಸಂಯೋಜಕ ಶಶಿಕುಮಾರ ಶೆಟ್ಟಿ, ಗೋರಾ ಪ್ರಮುಖ ಕೌಸ್ತುಬ ಕುಲ್ಕರ್ಣಿ, ಪ್ರಮುಖರಾದ ಎಂ.ಎಸ್​.ಪಾಟೀಲ್​ ನರಿಬೋಳ, ದಿವ್ಯಾ ಹಾಗರಗಿ, ಸಿದ್ದರಾಮಯ್ಯ ಹಿರೇಮಠ, ಪ್ರಸಾದ ಜೋಶಿ ಇತರರಿದ್ದರು.